جۇرە بەرسەڭ، كورە بەرەسىڭ دەيتىن بە ەدى وسىندايدا. 50 جىل بويى شاشىنا سۋ تيگىزبەي، ۇستارا تيگىزبەي كەلگەن ۆەتنامدىقتىڭ تاعدىرى ءبىزدى ايتارلىقتاي قىزىقتىردى. ەندەشە ءبىز قۇپياسىن اشالىق، ءسىز وقىڭىز!

وسىنداي ەرەكشە ارەكەت جاساعانىمەن، تران ۆان حەي گيننەستىڭ رەكوردتار كىتابىنا ەنبەگەن. بۇل اقپارات كىشكەنتاي ەلدى-مەكەندەگى قاراپايىم تۇرعىننىڭ ومىرىنەن بولعاندىقتان، ءىرى جوبانىڭ وكىلدەرىنە جەتپەي قالسا كەرەك. تران ۆان حەيدىڭ شاشتاراز الدىنا بارماعانىنا 50 جىلدان استام ۋاقىت وتكەن. ءقازىر ونىڭ شاشىنىڭ ۇزىندىعى 6 مەتردى قۇرايدى.

تران ۆان حەي – 1931 جىلى دۇنيەگە كەلگەن ۆەتنامدىق قارت. ول ەلۋ جىل بۇرىن ءوزىنىڭ شاشىن الدىرۋ بارىسىندا تەرىسىنە زاقىم كەلىپ، سودان كەيىن وسىرە بەرگەندى ءجون كورىپتى. ۋاقىت وتە كەلە ۇزىن ءارى قالىڭ، ونىڭ ۇستىنە جۋىلمايتىن شاش اعاش دىڭىنە ۇقسايتىن دۇنيەگە اينالىپ كەتكەن.

سالماعى 10 كيلوگرامنان اساتىن، ۇزىندىعى 6 مەتردى قۇرايتىن شاش بۋماسىنىڭ سىرت ءپىشىمى جىلاندى ەسكە سالادى. ءوزىنىڭ ايتۋىنشا، ول بۇل شاشىنا ابدەن ۇيرەنىپ كەتكەن جانە قولايلىلىق ءۇشىن ودان ارىلۋعا قۇلىقسىز.

ول قىدىراتىن كەزدە نەمەسە ۆەلوسيپەدپەن جۇرەتىن كەزدە ۇزىن ءارى قالىڭ شاشىن ۇلكەن ورامالمەن وراپ الادى. بۇل سىرت كوزگە تىم قوراش ءارى كۇلكىلى كورىنسە دە، حەي وعان الاڭداي قويمايدى.

سونىمەن قاتار، حەي وسىنشالىقتى ۇزىن شاشتى ومىرىندە بىرنەشە رەت قانا جۋعان ەكەن. سوندىقتان، ونىڭ سىرت كورىنىسى كوز تارتارلىقتاي ەمەس. جەرگىلىكتى تۇرعىنداردىڭ ايتۋىنشا، ونىڭ سوڭعى رەت باس جۋعانىنا دا 10 جىلدان اسا ۋاقىت ءوتىپتى.

تران ۆان حەيدىڭ گيننەستىڭ رەكوردتار كىتابىنا ەنبەۋ سەبەبى – ول ەشقاشان ءوزىنىڭ ۇزىن شاشىنىڭ رەكوردتىق كورسەتكىش ەكەنى تۋرالى ءوتىنىش بەرمەگەن. ءوزىنىڭ سوزىنە سۇيەنسەك، ول بۇل قادامعا ماجبۇرلىكتەن بارعان، ال ول ءۇشىن ماقتاۋ ەستىگىسى كەلمەيدى-مىس.

اۋدارعان: ادىلەت مادەنيەت