حالىقارالىق Qazaq quresi فەدەراسياسى ۇجىمى قازاق كۇرەسىنەن ەۋروپا چەمپيوناتىنىڭ «تۇمارىن» بەكىتتى. ول — گنوم ەسكەرتكىشى. گنومنىڭ سيمۆول رەتىندە تاڭدالۋى كەزدەيسوق ەمەس دەپ جازادى Qamshy.kz اقپارات اگەنتتىگى حالىقارالىق Qazaq quresi فەدەراسياسىنىڭ باسپا ءسوز ورتالىعىنىڭ دەرەگىن نەگىزگە الىپ. 

وسىعان دەيىن اتاپ وتكەندەي، قازاق كۇرەسىنەن ەۋروپا چەمپيوناتى پولشانىڭ ۆروسلاۆ قالاسىندا وتەدى. بۇل قالا ءوزىنىڭ ەرەكشە ارحيتەكتۋراسى، قوناقجايلىعىمەن عانا ەمەس، قالا ىشىندەگى كوپتەگەن گنوم ەسكەرتكىشتەرىمەن ەرەكشەلەنەدى. كەيبىر دەرەكتەردە العاشقى 40-سانتيمەترلىك گنوم ەسكەرتكىشى ۆروسلاۆ قالاسىندا 2011 جىلى سالىنعان. سودان بەرى قالا ىشىندە ءتۇرلى گنوم ەسكەرتكىشتەرى كوبەيە باستاعان.

بۇگىندە ۆروسلاۆتاعى كوپتەگەن ۇيىمدار مەن فيرمالار تاريحي جادىگەر رەتىندە گنومدارعا ارنايى تاپسىرىس بەرىپ، ونى ورناتۋدى داستۇرگە اينالدىرعان. سايكەسىنشە، گنومدار قازىرگى تاڭدا قالانىڭ تۋريستىك برەندىنە اينالدى. ءتىپتى، گنومدار ورنالاسقان كوشەلەرگە ارنايى كارتالار جاسالعان.

ەگەر قازاق كۇرەسىنەن ەۋروپا چەمپيوناتىنىڭ بيىلعى «تۇمارىنا» نازار اۋدارار بولساق، ءبىزدىڭ گنوم قازاق كۇرەسىنىڭ ارنايى فورماسىن كيگەن. باسقلاردان ەرەكشەلىگى دە وسى.

الداعى ەۋروپا چەمپيوناتىنىڭ «تۇمارى» بۇگىندە قازاق سپورتى تاريحىنىڭ ءبىر بولىگىنە اينالىپ ۇلگىردى. سەبەبى، حالىقارالىق Qazaq quresi فەدەراسياسى – سپورت سۇيەر قاۋىمدى عانا ەمەس، الەم جانە ەۋروپا چەمپيوناتتارىن وتكىزۋگە مۇددەلى تۇلعالاردى بىرىكتىرەتىن قازاقستانداعى سپورتتىق بىرلەستىك.

ۆروسلاۆ قالاسىنىڭ قوناقتارى مەن تۇرعىندارى گنوم جانىندا ەستەلىك سۋرەتكە ءتۇسىپ قانا قويماي، ءوز ارمان-تىلەكتەرىن تىلەۋدى داستۇرگە اينالدىرعان.  

تۇمار-گنوم پالۋانداردىڭ رۋحىن كوتەرىپ، جىگەرلەندىرىپ، سپورتشىلارعا ساتتىلىك اكەلەتىنىنە سەنەمىز! 

ۇسىنعان: اسەل بولات قىزى