ءومىردىڭ نازىك يىرىمدەرىن جان جۇرەگىمەن سەزىنە بىلگەن ناديرا اۋحادييەۆانىڭ ويماقتاي ويلارىن نازارلارىڭىزعا ۇسىنامىز. وزگەلەرگە ايتار وزىندىك پاراساتى بار ارۋدىڭ سۇحباتى Qamshy.kz اقپارات اگەنتتىگىندە جارىق كورگەن بولاتىن. بۇگىنگى تاڭدا الەۋمەتتىك جەلىدە بەلسەندى ارۋدىڭ جازبالارى دا ەشكىمدى بەي-جاي قالدىرعان ەمەس.
ءاربىر ءساتىڭىز باقىتقا تولى
ءسىزدى شىنايى قۋانىشقا بولەيتىن ءىس – ەڭ الدىمەن ءوزىڭىزدىڭ كوزقاراسىڭىز بەن ۇستانىمىڭىزعا بايلانىستى. كەيبىر ادامدار مەن مىناداي جاعداي بولعاندا ءوزىمدى قۋانىشتى سەزىنەمىن، بەلگىلى ءبىر جەتىستىككە جەتكەن كەزدە مەن باقىتتى بولامىن دەيدى. سونى ءسىز نەگە ءقازىر سەزىنە المايسىز؟ نە سەبەپتى ۋاقىت ءوتىپ جاتسا دا جەتىستىككە جەتكەن جوقسىز؟ سەبەبى مەن مىناداي جاعداي بولعاندا عانا قۋانىشتى بولامىن دەپ ەمەس، ءدال قازىرگى جاعدايدا قۋانىشتى بولۋدى ۇيرەنىڭىز! ادام قولدا باردىڭ ءقادىرىن تۇسىنبەيدى. ودان ايىرىلعان ساتتە عانا كوز جەتكىزە باستايدى. بەتىن ءارى قىلسىن، ءبىراق ۇيىڭدە بىرەۋ اۋىرىپ قالسا عانا ونى باعالايسىڭ، جاعدايىن تۇسىنە باستايسىڭ.
سيقىرلى تاياقشاسىن سەرمەسە ءومىرىمىز گۇل بولادى دەپ ويلايمىز
كەمشىلىكسىز پەندە جوق. مەنىڭ دە ۇلگى الۋعا بولمايتىن كەمشىلىكتەرىم جەتكىلىكتى. الايدا مەن ءالى دە سول مىنەزىمدى تۇزەتىپ، ءالى دە جۇمىس ىستەۋمەن كەلەمىن. ادام قاتەلىكتەر جاساۋ ارقىلى عانا شىڭدالادى. سول ارقىلى وسەسىڭ، ۇيرەنەسىڭ ءبىر جەتىستىككە جەتەسىڭ. ءبىر تۇجىرىم جاساپ، ءبىر قورىتىندىعا كەلەسىڭ. مەنىڭ قاتەلىگىم – حالىقتىق ەمدەرگە سەنىپ ءجۇرىپ، ءبىراز ۋاقىتىمدى جوعالتىپ العانىمدا. دارىگەرلەرگە سەنبەي ءجۇردىم. ءقازىر ءبىر جەردە ەمشى بار ەكەن، ءومىرىمدى 100% بولجاپ بەردى دەسە، سول اداممەن سويلەسكىم كەلمەيدى. ونداي قاتەلىكتى ەندى جاسامايمىن دەيمىن. مىسالى، ءسىزدىڭ باسىڭىزدا شەشىمىن تاپپاعان ءبىر ماسەلە بار. نە ىستەسەم ەكەن دەپ، كۇندىز-تۇنى باس قاتىراسىز. الايدا سول ماسەلەڭىزدى شەشىپ بەرەتىن ارنايى ماماننىڭ دا بار ەكەنىن بىلەسىز عوي؟! ول كىسى وقىعان، قانشاما جىل سول ماماندىق بويىنشا جۇمىس ىستەپ جاتىر. ءسىز سول مامانعا باراسىز، ماسەلەڭىزدى ايتاسىز، شەشىمىن تاباسىز. ەڭ قىسقا جولى سول. مەن سياقتى سان ءتۇرلى جولىن ىزدەمەۋ كەرەك. ومىردە بارلىعى قاراپايىم. ءار ءتۇرلى عىلىمي نەگىزدە دالەلدەنگەن كىتاپتار بار. سونداي كىتاپتاردى وقۋ كەرەك. ەڭ الدىمەن نە نارسەنىڭ بولسا دا، سەبەبىن ىزدەگەن دۇرىس. ءبىز كەيدە جالقاۋلىعىمىز ۇستاپ، ودان دا باقسىعا بارىپ، 1000 تەڭگەسىن بەرە سالايىق دەيمىز. ونىڭ سيقىرلى تاياقشاسى بار، سونى سەرمەسە، ءومىرىمىز گۇل بولادى دەپ ويلايمىز. مەن دە دارىگەرلەرگە سەنبەدىم، قورىقتىم. قورقىنىش سەزىمى مەنى دۇرىس ەمەس جولدارعا يتەرمەلەدى. ول سەزىمدى مۇلدەم الىپ تاستاۋ كەرەك. باسىندا پروتەزبەن جۇرگەن كەزدە "قۇلاپ قالام با؟" دەپ قورقاتىنمىن. ول دا كەدەرگى بولۋى مۇمكىن.
تەاترعا بارعاندى ۇناتامىن. اباي اتىنداعى وپەرا جانە بالەت تەاترىنا، مۇحتار اۋەزوۆ تەاترىنا ءجيى بارامىن. مىسالى، وپەرا جانە بالەت تەاترىندا جاندى داۋىستا وركەستر وينايدى. ول جەردە كلاسسيكا ورىندالادى. تازا، ءتىرى مۋزىكا تىڭداپ قايتاسىڭ. سونداي جەردە وتىرىپ جاندى داۋىستاعى مۋزىكا اۋەنىنە قۇلاق تۇرسەڭ، كادىمگىدەي دەمالىپ شىعاسىڭ. اۋەندى ەستىپ، ءاربىر نوتاسىن بويىڭا دارىتاسىڭ. شىنايى مۋزىكا كوڭىل-كۇيىڭە اسەر ەتەدى. تەاتر – شىنايىلىقتىڭ ايناسى. ادام جۇرەگىن رۋحاني بايلىققا تولتىرعىسى كەلسە مىندەتتى تۇردە تەاترعا بارسىن.
مۇگەدەكتەردىڭ جۇمىسقا تۇرۋى قيىن
بىزدە كەزەككە تۇرىپ ءۇي الۋ وتە قيىن. مىسالى، مەنى جانە ءىنىمدى انام ءقازىر تۇرىپ جاتقان پاتەرىمىزگە ۇلەسكەر رەتىندە جازىپ قويعان ەكەن. مۇگەدەكتىك بويىنشا كەزەككە تۇرۋعا بولادى، ءۇي بەرىلەدى ەكەن دەگەندى بىرەۋدەن ەستىدىم. مەن دە كەزەككە قۇجاتتارىمدى تاپسىرىپ قويايىن دەپ ويلادىم. ول 1-2 جىلدىڭ كولەمىندە كەلە قالمايدى عوي. ونى 10 جىلداپ كۇتەسىڭ. ءبىر ەمەس ءۇش رەت قۇجات تاپسىردىم. ۇشەۋىندە دە "ماعان ءۇي بەرىلمەيدى" دەدى. ءسويتىپ مەنى ۇلەسكەرلىكتەن شىعارىپ، ءۇيدى انامنىڭ اتىنا عانا اۋداراتىن بولساق، تاعى بەس جىل كۇتەدى ەكەنبىز. ويتكەنى بەس جىل كولەمىندە سەنىڭ اتىڭدا ەشقانداي دۇنيە-مۇلىك بولماۋ كەرەك. تۇرعىن ءۇي قۇرىلىس جيناق بانكىنە باردىم. ول جەردە اقشا سالىپ، ءۇش جىل كولەمىندە جينايدى ەكەنسىڭ. اڭگىمە ونىمەن دە بىتپەيدى. باعدارلامامەن ءۇي الۋ ءۇشىن سەنىڭ جالاقىڭ ورتاشا ەسەپتەگەندە 200 مىڭ تەڭگە بولۋ كەرەك. ودان تومەن بولسا بەرمەيدى. سودان كەيىن مەن كوپ ويلاندىم. ونداي جالاقىعا كىم مەنى جۇمىسقا الادى؟ مىسالى مەنىڭ جاعدايىمدا ساعات تاڭعى توعىزدان كەشكى التىعا دەيىن ىستەي المايمىن.
وزىڭە سەنىمدى بول
وزىڭە سەنىم ارتا ءبىل. بىردە مەن ءوزىمنىڭ رەنىشىممەن جۇمىس ىستەگىم كەلدى. ناقتىراق ايتار بولسام، كەيبىر ادامداردى كەشىرىپ، رەنىشىمدى باسۋدى ويلادىم. ءسويتىپ وسى جونىندە ءبىر ماقالا وقىدىم (قاي جەردەن وقىعانىم ەسىمدە جوق). ول جەردە ءوزىڭ رەنجىگەن ادامداردىڭ ءتىزىمىن جازىپ، نە ءۇشىن رەنجىگەنىڭدى قاعازعا ءتۇسىر دەپ ايتىلعان. سوسىن ول ادامدى ويشا ەلەستەتىپ، سەنى كەشىردىم دەپ ىشىڭنەن قايتالاۋىڭ كەرەك ەكەن. مەنىڭ ويىمشا، رەنىشتى ۇمىتۋدىڭ ەڭ ءتيىمدى ءتاسىلى – رەنجىتكەن ادامىڭنان مىقتى بولا ءتۇسۋ كەرەك. ءوزىڭدى ءوزىڭ جەتىلدىر، وقى، ىزدەن، ەڭبەكتەن. ەڭبەكتەنسەڭ بويىڭدا سەنىمدىلىك پايدا بولادى.. وزىنە سەنىمدى ادام وزگەلەرگە وكپە ارتپايدى. وزىنە سەنىمدى ادامدى ەشكىم دە رەنجىتە المايدى.
ەڭ الدىمەن ءار نارسەنىڭ سەبەبىن ىزدەڭىز. نەگە؟ نەگە ءسىز وزىڭىزگە سەنبەيسىز؟ مۇمكىن بالا كەزىڭىزدە ءسىزدىڭ كەمشىلىكتەرىڭىزدى بەتىڭىزگە باسقان بولار. سەنىڭ قولىڭنان كەلمەيدى، قويا سال دەگەندەر بولعان شىعار. سول ءۇشىن ەڭ الدىمەن كەزدەسكەن قيىنشىلىقتىڭ سەبەبىن ىزدەۋ كەرەك. جانە سول سەبەبىن مۇلدەم الىپ تاستاۋعا تىرىسۋ كەرەك. بۇل دەنساۋلىققا دا بايلانىستى. ءبىر جەرىمىز اۋىرسا ءدارى جازىپ بەرەدى، ءدارى - اۋرۋدىڭ بەلگىلەرىن الىپ تاستايدى. مىسالى، باسىڭىز اۋىرىپ تۇر دەلىك، سىزگە ءدارى جازىپ بەرەدى. باس اۋرۋىنىڭ بەلگىلەرى كەتەدى. ال نە سەبەپتى باس اۋرۋى پايدا بولدى دەگەنگە ءمان بەرمەيمىز. سەبەبىن ىزدەمەيمىز. نەگىزى ەڭ الدىمەن سەبەبىن انىقتاۋىمىز كەرەك. ماسەلە دە سول سياقتى. ەڭ الدىمەن سەبەبىمەن كۇرەسىڭىز.
مەنىڭ اياققا تۇرىپ، ومىرگە وزگەشە كوزقاراسپەن قاراۋىما ەشقانداي موتيۆاسيالىق كىتاپتار، ترەنينگتەر اسەر ەتكەن جوق. مەن تابيعاتىمنان مىنەزىم قاتتى اداممىن. ءاردايىم العا قويعان ماقساتىما جەتۋگە تىرىسامىن. وزگەلەردىڭ ماعان اياۋشىلىق سەزىممەن قاراعانىن قالاماعاننان بولار، توسەككە تاڭىلىپ جاتقىم كەلمەدى. كوبىرەك سەرۋەندەپ، ەل الدىندا جۇرگەندى ۇناتامىن. سىزدە ەرتەڭگى كۇندى نەمەسە وزگەشە ءساتتى كۇتىپ، ءبىر باقىتتىڭ بولارىن توسىپ جاتپاڭىز. باقىتتى بولۋعا بۇگىنگى كۇننەن، ءدال قازىرگى ساتتەن باستاپ اقىرىن قادام جاساڭىز. مەن دە بولاشاقتان زور ءۇمىت كۇتەمىن. ەرتەڭگى كۇنىمنىڭ جارقىن بولارىنا سەنەمىن.
دايىنداعان: مارجان سابەت
وقي وتىرىڭىز:
