جاستار جىلى اياسىندا جامبىلدىق جاستار دا تىڭ باستامالاردى قولعا الىپ، جارقىن جوبالارىمەن جۇرتشىلىقتى سۇيسىنتۋدە. ماسەلەن، جامبىل اۋداندىق جاستار رەسۋرستىق ورتالىعىنىڭ قىزمەتكەرلەرى ايماقتاعى بيىك شىڭدارعا شىعىپ، ەلىمىزدىڭ وزگە وڭىرلەرىندەگى ارىپتەستەرىنە ەستافەتا رەتىندە جولداۋدا. ولار كەزەكتى رەت مەركى اۋدانىنداعى 4200 مەترلىك بيىكتىككە كوتەرىلدى.

جاستار جىلى اياسىندا شىڭعا شىققان جامبىلدىق جاستاردىڭ تاعى ءبىر ماقساتى اتاۋى جوق شىڭعا حالىق جازۋشىسى، كورنەكتى قالامگەر شەرحان مۇرتازانىڭ ەسىمىن بەرۋ بولاتىن. ولاردىڭ بۇل جولعى باستاماسىنا شىمكەنت قالاسىنىڭ الپينيزم فەدەراسياسىنىڭ باسشىسى ەربول ورازالين، وبلىستىق ۇلتتىق سپورت فەدەراسياسى «اۋليە اتا» كوكپار كومانداسىنىڭ اۋدارىسپاقتان جاتتىقتىرۋشىسى ازات ءجۇمادىلوۆ، وبلىستىق الپينيزم جانە سپورتتىق تۋريزم فەدەراسياسىنىڭ باسشىسى نيمات مۋرسايتوۆ، وبلىستىق سكالولاز فەدەراسياسىنىڭ جەتەكشىسى اسلانبي سىزدىقوۆ، سونداي-اق ءوڭىردىڭ الپينيستەرى قولداۋ ءبىلدىردى. ولار قار باسقان، ادام اياعى تيمەگەن شىڭعا شىعۋ ءۇشىن 4 تاۋلىكتەرىن جۇمساعان. سەبەبى، ەشكىم باسىپ بىلمەگەن ءارى قارلى شىڭ ءقاۋىپتى ەدى. سوندىقتان قۇمبەل شاتقالىنداعى شىڭعا كوتەرىلۋگە ۇمتىلعان توپ مۇشەلەرى ءار قادامدارىن اڭداپ باسىپ، 4200 مەترلىك نۇكتەگە جەتتى. وسىلايشا، وسى شىڭنىڭ ۇشار باسىنا جاستار جىلىنىڭ ارنايى تۋىن تىكتى.  وعان ەسىمىن بەرگەن. ەندىگى جەردە جامبىل اۋدانى جاستارىنىڭ باستاماسىمەن جۇرتقا تانىلعان شىڭ حالىق جازۋشىسى شەرحان مۇرتازانىڭ ەسىمىمەن اتالادى.

– جاستار جىلىنىڭ اياسىندا بيىك شىڭعا شىعۋىمىز بەكەر ەمەس. سەبەبى، وسى ارقىلى ءوڭىر جاستارىنىڭ نازارىن وزىمىزگە اۋدارىپ، ءوز ومىرلەرىنىڭ بيىگىنە ۇمتىلسا ەكەن دەيمىز. ال 4200 مەتردەگى شىڭعا شەرحان مۇرتازانىڭ اتىن بەرۋىمىزدىڭ سەبەبى، ول كىسى قازاق رۋحانياتىنان بولەك قوعامنىڭ دامۋىنا دا ەلەۋلى ەڭبەك سىڭىرگەن بىرەگەي دارا تۇلعا. ونىڭ ەسىمى قازاق تاريحى مەن ادەبيەتىنە التىن ارىپتەرمەن جازىلعانى بەلگىلى. سوعان قاراماستان جاستار جىلىندا ونىڭ اتىن قۇزار شىڭعا بەرىلۋىن زاڭدى دەپ ەسەپتەيمىز، – دەيدى جامبىل اۋداندىق جاستار رەسۋرستىق ورتالىعىنىڭ ءبولىم باسشىسى نۇربەك ساكەنوۆ.

ايتا كەتەرلىگى، وسىعان دەيىن جامبىل اۋدانى جاستار رەسۋرستىق ورتالىعىنىڭ  ۇيىمداستىرۋىمەن زامانداستارىمىز جاستار جىلىنىڭ جاريالانۋىنا بايلانىستى ت.رىسقۇلوۆ اۋدانى اۋماعىنداعى 3200 مەتر بيىكتەگى «دەگەرەز» شىڭىنا ورمەلەگەن بولاتىن. وسىلايشا، اۋدان جاستارى «جاس وتان» جاستار قاناتىنىڭ سول كەزدەگى ءتوراعاسى دانيار ماناربەكۇلىنا جانە جاستاردىڭ جاناشىرى، ءماجىلىس دەپۋتاتى گەنناديي شيپوۆسكيحكە، كورشىلەس جاتقان شىمكەنت قالاسى مەن  الماتى وبلىسىنىڭ جاستارىنا ءوز وڭىرلەرىندەگى بيىك شىڭدارعا شىعۋدى ۇسىنىپ، ۆيدەو ەستافەتا جولداعان ەدى. قازىرگى تاڭدا ولار دا بۇل باستامانى قولداپ، وڭ نيەت تانىتىپ وتىر ەكەن.

باقىت جالعاس