جاستار جىلىنا وراي تاراز قالاسىنداعى  «تاراز-ارەنا» سپورت كەشەنىندە جوعارى جانە ارناۋلى ورتا وقۋ ورىندارىنىڭ  ستۋدەنتتەرى اراسىندا وبلىستىق سپارتاكيادا ءوتتى. جارىسقا 200-گە جۋىق سپورتشى قاتىسىپ، سپورتتىڭ ۆولەيبول،ۇستەل تەننيسى، قول كۇرەسى، توعىزقۇمالاق، جەڭىل اتلەتيكا  سىندى  9 تۇرىنەن جۇلدەلەر جيىنتىعىن ساراپقا سالدى.

ەڭ الدىمەن ۋنيۆەرسيتەت جاستارى اراسىندا وتكەن تارتىستى جارىس  سپارتاكيادا كوركىن قىزدىرا ءتۇستى.  ۆولەيبولدان ۇلدار اراسىندا  تاراز يننوۆاسيالىق-گۋمانيتارلىق  ۋنيۆەرسيتەتىنىڭ ستۋدەنتتەرى قارسىلاس شاق كەلتىرمەسە، م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ جىگىتتەرى ەكىنشى، ال تاراز مەملەكەتتىك پەداگوگيكالىق ۋنيۆەرسيتەتىنىڭ ۇلاندارى ءۇشىنشى ورىنعا تابان تىرەدى. قىزدار اراسىندا تارمپۋ-دىڭ بۇرىمدىلارى قارسىلاستارىنان وق بويى وزا شاپتى.

ۇستەل تەننيسىندە تارمۋ-دىڭ تۇلەگى ايدوس مۇقاشيەۆ تەڭدەسسىز اتانسا، قىزداردىڭ ىشىندە وسى وقۋ ورداسىنىڭ تاعى ءبىر ستۋدەنتى ساۋلە يمانالىنىڭ ايى وڭىنان تۋدى.  قول كۇرەسىندە تارمۋ-دىڭ ۇكىلەپ قوسقان ءۇمىتى ەميل ابباسوۆ كۇش اتاسىن تانىمايتىنىن تانىتسا،  قىزدار اراسىندا دا تارمۋ-دىڭ جاسى وكسانا پيسمەننايانىڭ شوقتىعى بيىك بولدى.  اسىق اتۋدان تاراز مەملەكەتتىك ۋنيۆەرسيتەتىنىڭ ورەندەرى نۇراسىل شەگەتاي، ءادىل لەس جانە ەرزات ورىنباي جۇلدەلى ءۇش ورىندى ءوزارا ءبولىسىپ الدى.

جەڭىل اتلەتيكا سىنىندا تاراز مەملەكەتتىك ۋنيۆەرسيتەتىنىڭ جاستارى 100، 200، 1000 جانە 2000 شاقىرىم قاشىقتىقتا  تاعى توپ جاردى. توعىزقۇمالاق ويىنىندا بولسا،  ۇلدار مەن قىزدار اراسىندا تارمپۋ-دىڭ ەكى ستۋدەنتتى الديار بەكبەرگەنوۆ پەن ايگەرىم مەيىرحانوۆا قولا جۇلدەگە قول جەتكىزسە، قالعان جۇلدەلەردىڭ بارلىعى  تاراز مەملەكەتتىك ۋنيۆەرسيتەتىنىڭ قورجىنىندا كەتتى.

ال  ارناۋلى ورتا وقۋ ورىندارى  اراسىندا كىشى فۋتبولدان جامبىل پوليتەحنيكالىق جوعارعى كوللەدجىنىڭ جاستارى جۇزدەن جۇيرىك شىقسا، ۆولەيبولدان «استانا» مەن «پاراسات» كوللەدجدەرىنىڭ باعى جاندى.  ۇستەل تەننيسىنەن «تاراز-عاسىر»  كوللەدجىنىڭ بىلىمگەرى بەكزات قۇنانباي جەڭىس تۇعىرىنان كورىنسە، قىزدار اراسىندا قورداي اۋدانىنان كەلگەن ساليما يۋسۋپوۆا باس جۇلدەنى قانجىعاسىنا بايلادى.

قول كۇرەسىنەن جامبىل پوليتەحنيكالىق جوعارعى كوللەدجىنىڭ سپورتشىسى بارىش رەيسوۆكە ەشكىمنىڭ شاماسى جەتپەسە، قىزدار سىنىندا دا وسى وقۋ ورنىنىڭ ستۋدەنتتى ارۋجان قارامان قارسىلاستارىن قوعاشا جاپىردى.

اسىق اتۋدان شۋ كوللەدجىنىڭ ءۇمىتى اليحان الپاروۆتىڭ اسىعى الشاسىنان تۇسسە، شەكەم تاس لاقتىرۋدا قوردايلىق فاتيما مىرزاعايەۆا  الدىنا جان سالمادى.   

جەڭىل اتلەتيكادا 100 مەتر قاشىقتىقتا «استانا» كوپسالالى كوللەدجىنىڭ بىلىمگەرلەرى بيىكتەن كورىنسە، 200 مەتردە قوردايلىقتار، 1000 مەتردە جامبىل پوليتەحنيكالىق جوعارعى كوللەدجىنىڭ،  2000 مەتردە «پاراساتتىڭ» جاستارى جاسىنداي جارقىرادى.

تارتىستى وتكەن سپارتاكيادا قورىتىندىسىندا جالپى كوماندالىق ەسەپتە جامبىل پوليتەحنيكالىق كوللەدجىنىڭ ستۋدەنتتەرى جەكە دارا كوش باستاسا، «پاراسات» كوللەدجى ەكىنشى، ال قورداي اۋدانىنىڭ بىلىمگەرلەرى ءۇشىنشى ورىننان كورىندى. جارىس سوڭىندا بارلىق جەڭىمپازدار ديپلوم جانە باعالى سىيلىقتارمەن ماراپاتتالدى.

باقىت جالعاس