بۇگىندە ءتول سپورتىمىزعا ءبولىنىپ جاتقان كوڭىل دە، قولداۋ دا از ەمەس. ەسەسىنە جامبىلدىق جامپوزدار ەل بىرىنشىلىكتەرىمەن قاتار، الەمدىك ارەنالاردا دا اتوي سالۋدا. اسىرەسە، قازاقتىڭ ۇلتتىق سپورتى  — قازاق كۇرەسىنەن بەيبىت ىستىبايەۆتاي ءاپايتوس بالۋاندارىمىز شىعۋدا. ەندى مىنە تۇيە بالۋاندار بەلدەسكەن كۇرەسكە بالعىندارىمىزدا كەلىپ وتىر. اتاپ ايتساق، كۇنى كەشە «تورتكۇل» كەرۋەن سارايىندا جاسوسپىرىمدەر بوزكىلەمدە ب ا ق سىناسىپ، «وقۋشىلار ارلانىن» انىقتادى.

جاستار جىلىنا وراي وبلىس اكىمدىگىنىڭ ءبىلىم باسقارماسىنىڭ «عىلىمي-تاجىريبەلىك دەنە شىنىقتىرۋ ورتالىعىنىڭ» ۇيىمداستىرۋىمەن وتكەن  ءدۇبىرلى دوداعا  تاراز قالاسى مەن اۋدانداردان بارلىعى 87 بالۋان  قاتىسىپ، كىل مىقتىنىڭ ىشىنەن شىن مىقتىنى انىقتادى. 

جالپى مەكتەپ وقۋشىلارى اراسىندا ۇيىمداستىرىلىپ وتىرعان تۇڭعىش تۋرنير 60 كەلىدەن جوعارى ابسوليۋتتىك سالماق دارەجەسىندە جانە وليمپيادالىق جۇيە بويىنشا ءوتتى.  بۇل كۇنى بالعىن بالۋانداردىڭ ونەرىن تاماشالاۋعا «تورتكۇل» كەرۋەن سارايىنا جيىلعانداردىڭ  قاراسى قالىڭ بولدى. بالۋاندارعا قولداۋ ءبىلدىرىپ جان-جاقتان قيقۋلاعان جانكۇيەرلەردىڭ داۋىسىنان قۇلاق تۇندى.

ارينە، جارىس بولعاننان كەيىن  بىرەۋ جەڭىپ، ال بىرەۋ جەڭىلىپ جاتاتىنى زاڭدىلىق.  بۇل جولعى باسەكەدە جامبىل اۋدانى، بەساعاش اۋىلى، اباي اتىنداعى ورتا مەكتەپتىڭ 11-سىنىپ وقۋشىسى نۇرلان قىرعىزبەك قارسىلاستارىن الىپ تا، شالىپ تا ۇرىپ، «وقۋشىلار ارلانى» اتاندى. ال اقتىق اينالىمدا ءسال ساتتىلىك جەتىسپەگەن وبلىستىق سپورتتاعى دارىندى بالالارعا ارنالعان مەكتەپ-ينتەرناتىنىڭ 11-سىنىپ وقۋشىسى باقداۋلەت ەركىنبەك ۇلى  ەكىنشى ورىننان كورىندى.  ۇزدىك ۇشتىكتى جامبىل اۋدانى، اسا اۋىلى، يۋ.گاگارين اتىنداعى ورتا مەكتەپتىڭ 11-سىنىپ وقۋشىسى جانتورە جۇماباي تۇيىندەدى.

جارىس جەڭىمپازدارى مەن جۇلدەگەرلەرىنە م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ رەكتورى ماحمەتعالي سارىبەكوۆ ءبىر جىلدىق وقۋ اقىسىنا 50 مەن 100 پايىز ارالىعىندا  جەڭىلدىك  تاعايىنداسا، تاراز يننوۆاسيالىق-گۋمانيتارلىق ۋنيۆەرسيتەتىنىڭ رەكتورى ەربولات ساۋرىقوۆ  ءبىرىنشى  ورىنعا – 150 مىڭ، ەكىنشى ورىنعا – 100 مىڭ جانە ءۇشىنشى ورىنعا – 50 مىڭ تەڭگە كولەمىندە سىياقى بەردى. بۇدان بولەك، تۋنير جەڭىمپازىنا قاس شەبەرلەر  قولدان ارنايى دايىنداعان «وقۋشى ارلانى» ءتۋرنيرىنىڭ لوگوتيپى بەينەلەنگەن بەلبەۋ تابىس ەتىلدى. 

ەندى جەڭىمپازدار مەن جۇلدەگەرلەر اعىمداعى جىلدىڭ 25-26 مامىر كۇندەرى الماتى قالاسىندا وتەتىن «حالىق بارىسى» رەسپۋبليكالىق الامانىندا ءوڭىر نامىسىن قورعايتىن بولادى.     

جايدار ازامات