ماڭعىستاۋ وبلىسىنىڭ اكىمى ەرالى توعجانوۆ وڭىردەگى 61 ەلدى-مەكەندى تۇگەل ارالاپ شىقتى. نەگىزگى ماقسات- تۇرعىندارمەن كەزدەسىپ، اۋىلدىڭ تىنىس-تىرشىلىگىمەن جاقىننان تانىسۋ. ايماق باسشىسى بەينەۋ اۋدانىنا قاراستى وزبەكستان ەلىمەن شەكارالاس ورنالاسقان تاجەن جانە اقجىگىت اۋىلىندا بولدى. ەرالى توعجانوۆ جۇمىس ساپارى بارىسىندا بەينەۋ اۋدانىنان باستاپ تاجەنگە دەيىن سالىنىپ جاتقان اۆتوموبيل جولىنىڭ قۇرىلىس جۇمىستارىمەن تانىستى. مەردىگەر كومپانيا باسشىلارى قۇرىلىس جۇمىستارىن قىركۇيەك ايىنا دەيىن تولىق اياقتاپ، تاپسىراتىندارىن جەتكىزدى. ەگەر جول پايدالانۋعا بەرىلسە، اۋىل حالقىنا دا مول مۇمكىندىك تىرشىلىكتىڭ جاڭا باعىتى پايدا بولماق.
ايماق باسشىسى الدىمەن تاجەن اۋىلىندا تۇرعىندارمەن جۇزدەسىپ، اۋىل اكىمىنىڭ ەسەبىن تىڭدادى. تاجەن اۋىلى بەينەۋ اۋدانىنان 85 شاقىرىم قاشىقتىقتا ورنالاسقان. حالىق سانى – 217 ادام. ودان سوڭ وبلىس اكىمى اقجىگىت اۋىلىندا بولدى. «بۇل اۋىلداعى اعايىننىڭ نەگىزىگى كاسىبى مال شارۋاشىلىعى. 21 شارۋا قوجالىعى تىركەلگەن. 446 باس سيىر، 20 986 باس قوي مەن ەشكى، 1 387 باس جىلقى جانە 4 340 باس تۇيە بار. اۋىلدىڭ 5 ازاماتى جەڭىلدەتىلگەن پايىزبەن اۋىل شارۋاشىلىعىن قولداۋ باعىتى بويىنشا «اتامەكەن» ميكرو-قارجى ۇيىمى ارقىلى 21 ملن تەڭگە نەسيە السا، ءبىر ازامات «سىباعا» باعدارلاماسى ارقىلى قوي ءوسىرۋ ءۇشىن 6ملن تەڭگە الدى. «بيزنەس 3 كۇندە» جوباسى ارقىلى قولداۋ كورىپ، ءوز جۇمىسىن باستاعان 3 وتباسى بار. ەكەۋى تىگىنمەن اينالىسىپ، تىگىن سەحىن اشۋدا، بىرەۋى اعاش بۇيىمدارىن جاساۋمەن اينالىسىپ وتىر» - دەدى اۋىل اكىمى سەرىك قامىسبايەۆ. كەزدەسۋ كەزىندە اۋىل تۇرعىندارى وبلىس اكىمىنە ەلدى-مەكەننىڭ دامۋىنا قاتىستى ۇسىنىستارىن ايتىپ، ويلارىن ورتاعا سالدى.
سونداي-اق، وبلىس اكىمى بەينەۋ اۋدانىنداعى جۇمىس ساپارى بارىسىندا بىرنەشە جاڭا نىساننىڭ اشىلۋىنا قاتىستى. سونىڭ ءبىرى، بەينەۋ اۋىلىنداعى 160 ورىندىق دەنە شىنىقتىرۋ-ساۋىقتىرۋ كەشەنى. ءبىر ساتتە 600 ادامعا دەيىن قابىلداي الاتىن سپورت كەشەنىندە فۋتبول، ۆولەيبول، ۇستەل تەننيسى، باسكەتبول وينايتىن الاڭدار مەن كۇرەس زالى جانە ترەناجەر زالى بار. سپورت كەشەنىنىڭ اشىلۋ سالتاناتىنان سوڭ، ەرالى توعجانوۆ جاس سپورتشىلارمەن جانە اۋداننىڭ بەلسەندى جاستارىمەن كەزدەستى. كەزدەسۋ بارىسىندا وبلىسىمىزدىڭ ماقتانىشى الەم چەمپيوناتىنىڭ، ەۆروپا كۋبوگىنىڭ يەگەرى، ازيا چەمپيونى باۋىرجان ناربايەۆ جاستاردىڭ اتىنان العىسىن ايتىپ، سپورتقا دەگەن قولداۋى ءۇشىن ريزاشىلىعىن جەتكىزدى. ەل يگىلىگىنە بەرىلگەن سۋ جاڭا تاعى ءبىر نىسان جابىق ءجۇزۋ باسسەينىمەن فيتنەس زالى. ەندى بەينەۋ اۋدانىنىڭ بۇلدىرشىندەرى جاڭا ۇلگىدەگى باسسەيندە شومىلىپ، فيتنەس زالدا جاتتىعاتىن بولادى. نىساننىڭ جالپى كولەمى 600 م2. 240 ادامعا دەيىن قابىلداي الادى. بەرەكەلى بەينەۋدە پايدالانۋعا بەرىلگەن تاعى ءبىر نىساننىڭ ءبىرى بورانقۇل اۋىلىنداعى سۋ تازارتۋ زاۋىتى. سۋ تازارتۋ يماراتىنىڭ ونىمدىلىگى ساعاتىنا 198 تەكشە مەتر، تازا سۋعا ارنالعان 3000 م3 قويما ورنالاسقان.
