تۇڭعىشىنان ويدا-جوقتا ايىرىلعان اتا-انا وسىلاي دەپ زار جىلاپ وتىر. ەرلى-زايىپتىلاردىڭ باۋىر ەتى بالاسى بەس اي بۇرىن كىسى قولىنان قازا تاپسا دا، قىلمىستىق ءىس دۇرىس تەرگەلمەي، سيىرقۇيىمشاقتانىپ كەتكەن. ءتىپتى ىسكە ەش قاتىسى جوق تۇلعالار سوت الدىندا جاۋاپ بەرىپ جاتقان كورىنەدى. توبەلەستىڭ قۇربانى بولعان جىگىتتىڭ تۋىستارى ادىلدىك ىزدەپ الەك. بۇل تۋرالى Qamshy.kz اقپارات اگەنتتىگى ەۋرازيا ءبىرىنشى ارناسىنا سىلتەمە جاساپ حابارلايدى. 

"تۇلا بويىم تۇڭعىشىم. ەندى بيىل كەلىن الايىن دەپ جوسپارلاپ قويعانمىن. ءبارىن دايىنداپ قويعانمىن كەلىن العانعا"، - دەيدى قازا تاپقان جىگىتتىڭ اناسى.

كەلىن ءتۇسىرىپ، نەمەرە سۇيەمىن دەپ وتىرعان وتباسى تۇڭعىشتارىنان ايىرىلعالى بەس ايدان اسقان. ادام قولىنان مەرت بولعان سوڭ شىندىق ىزدەپ شىرىلداپ ءجۇر. اتا-انانىڭ ايتۋىنشا، الاتاۋ اۋدانىنىڭ تەرگەۋشىلەرى ءىستى بۇرمالاپ، سوت الدىندا كىناسىزدەردى جاۋاپقا تارتىپ جاتىر. ۇلدارىن كوكالا قويداي ساباپ، پىشاقتاپ، ازاپتاپ ولتىرگەن ناعىز قىلمىسكەرلەر بوستاندىقتا ءجۇر دەپ كۇيىنەدى. 

"سەنبەيمىن تەرگەۋشىلەرگە. ەشكىمگە سەنبەيمىن. جاسىرىپ ەكى ادامدى وتىرعىزىپ قويىپ وتىر. قۇدايدان جەتكىرلەر تايراڭداپ ءجۇر. 10 ادامنىڭ ءبارىن ۇكىمەتتىڭ ءبارىن ساتىپ السا، اللانى ساتىپ المايدى. جازاسىن بەرەتىن شىعار"، - دەيدى مارقۇمنىڭ اناسى ءومىرحان ءامىرجان.

قىرعىن توبەلەس مارقۇم دانيار اسقاربەكتىڭ جولداسىمەن كافەگە بارۋىنان باستالادى. كورشى ۇستەلدە ىشىمدىك ءىشىپ، داستارحانعا تۇكىرگەن جىگىتتەرگە ەسكەرتۋ جاساعانىندا ولار تەكەتىرەسكە شاقىرىپتى. ءسويتىپ، 12-قاڭتار كۇنى 4-5 قارا كولىككە مىنگەن، وتىز شاقتى بالا ولاردى تۋرا جاتاقحانانىڭ الدىنان كۇتىپ الادى. اۋەلگىدە "بەسكە بەس" جەكپە-جەككە شىعاسىڭدار دەپ بۇيىرعانىمەن، قولدارىنا پىشاق ۇستاعاندار سوزدەرىنەن تايىپ، جابىلا كەتكەن. 

"ءبىر ادام پىشاقتاۋى مۇمكىن ەمەس. ويتكەنى ارتىنان جۇگىرگەننىڭ بارىندە پىشاق بولدى. مەن كورگەن التاۋىندا بولدى. ءبىرىنشى بوپ پىشاقتى اۋەز ءوزى الدى. ودان كەيىن تاراتتى. ەشقايسى سوتتا جوق. اناۋ ەندى بىرەۋى بولدى. ونىڭ قاتىسى جوق"، - دەيدى مارقۇمنىڭ دوسى اسحات ەرمەك.

"ىشىنەن كىندىك تۇسىنان 20 سم جەرىن ۇلكەن پىشاقپەن جۇرەك پەن اسقازان ورتاسىنداعى ءۋاننا قانتامىرىن كەسكەن. سىرتقى بۇيرەكتەن بۇيرەكتى ەكى جارىپ ارقا قانتامىرىنا بارعان. مىنە اياۋسىز تۇردە ءولتىرىپ وتىر"، - دەيدى قازا تاپقان جىگىتتىڭ اكەسى اسقاربەك دۇيسەنبەك.  

اياۋسىز ولتىرگەندەردىڭ قولدارىندا ۇلكەن پىشاق بولعان دەيدى قارا جامىلعان وتباسى. ال، زاڭ الدىندا جاۋاپقا تارتىلىپ جاتقان جىگىت مارقۇمعا ەكى رەت اشىلىپ-جابىلاتىن قالتا باكىسىن سۇعىپ العانىن ايتتى سۋدياعا. ءبىراق، توبەلەسكە شاقىرعان بىردە ءبىر "دوسىن" تانىماي وتىر. اۋەلگىدە تەرگەۋشىلەرگە باسقا تۇسىنىك بەرىپ، بۇگىن ءبارىن موينىنا الدى. 

سوتتاعى ديالوگ:

- ول ماعان قاراي جۇگىرگەن كەزدە مەن ىشىنە تىعىپ الدىم. ودان كەيىن سەزبەدى ول. ارتىنان تىعىپ الدىم. قاشتى.

- قانداي پىشاق ەدى؟

- باكى بولعان.

- ۇزىندىعى؟

- ۇزىندىعىن بىلمەيمىن. 

"سوت مەديسينالىق ساراپتامانىڭ قورىتىندىسىنا سايكەس ءىرى تامىرلاردى زاقىمدانعان. توبەلەس بارىسىندا اياپوۆ قارسىلاسى اسقاربەكوۆكە قاساقانا اۋىر زيان كەلتىرۋ وي تۋىنداعان"، - دەيدى ءبولىم پروكۋرورى دىنمۇحامبەت ماحامبەتقۇل.

مارقۇمنىڭ تۋىستارىن كۇمانداندىرىپ وتىرعانى دا وسى. ويتكەنى، كۋاگەرلەر كۇدىكتىلەردىڭ ول توبەلەستە بولماعانىن جايىپ سالدى. "الماتىدا ءتىرى جۇرگىزبەيمىز" دەپ قورقىتقاندار جازادان قۇتىلىپ كەتە مە دەپ الاڭداۋلى. سوندىقتان، ادىلدىك بولماسا، جوعارعى سوتقا دەيىن ارىزدانۋعا بەكىنگەن.

ۇسىنعان: ادىلەت مادەنيەت