ماڭعىستاۋ وبلىسىنىڭ اكىمى جۇمىس ساپارىمەن جاڭاوزەن قالاسىنا باردى. ايماق باسشىسى ساپار بارىسىندا الدىمەن «بەيبىتشىلىك» تۇرعىن ءۇي كەشەنىنىڭ قۇرىلىسىمەن تانىستى. قازىرگى تاڭدا اتالمىش كەشەنگە قاراستى ءتورت تۇرعىن ءۇيدىڭ قۇرىلىسى بىتۋگە دايىن. مامانداردىڭ ايتۋىنشا، ءبىر بولىگى شىلدە جانە قىركۇيەك ايلارىندا تۇرعىندارعا بەرىلمەك. ودان بولەك تاعى دا 4 ءۇيدىڭ قۇرىلىس جۇمىستارى جۇرگىزىلۋدە.
«بيزنەس 3 كۇندە» جوباسى اياسىندا كاسىبىن باستاعان الدابەرگەنوۆ ناۋرىزبەكتىڭ جىلىجايىنىڭ قۇرىلىسىمەن دە تانىستى. جەكە كاسىپكەرلەر مەن مەسانتتاردىڭ كومەگىمەن ناۋرىزبەككە جىلىجاي قۇرىلىسىنا قاجەتتى جابدىقتار تولىقتاي ساتىپ الىنىپ بەرىلگەن. ول بۇگىندە العاشقى ەگىندى باستاپ كەتكەنى جايىندا مالىمدەدى.
سونىمەن قاتار، قۇراق كورپەلەر، قىز جاساۋلارىن تىگىپ، حالىق يگىلىگىنە ۇسىنىپ وتىرعان ەلۋبايەۆا زۋحرا مەن ابيشيەۆا ۋتيبيكە سىندى كوپ بالالى انالاردىڭ دا جۇمىسىمەن تانىستى. ادال ەڭبەگىنىڭ ارقاسىندا ءناپاقاسىن تاۋىپ وتىرعان انالار قولداۋ كورسەتىپ، قامقورلىق جاساعان ازاماتتارعا العىسىن جەتكىزدى.
بۇدان كەيىن ايماق باسشىسى جاڭاوزەن قالاسىنىڭ تۇرعىندارىمەن، قوعام بەلسەندىلەرىمەن كەزدەستى. جيىندا قالا اكىمى ادىلبەك داۋىلبايەۆ شاھاردىڭ ەكونوميكالىق-الەۋمەتتىك دامۋ كورسەتكىشتەرىنە توقتالدى.
2019 جىلى نەگىزى كاپيتالعا ينۆەستيسيالار 10،4 ملرد. تەڭگەنى قۇراعان. بۇگىنگى تاڭدا قالادا جۇمىس ىستەپ تۇرعان 7،7 مىڭ شاعىن جانە ورتا كاسىپكەرلىك سۋبەكتىلەرى بار، بۇل 2018 جىلدىڭ كەزەڭىمەن سالىستىرعاندا 19،8% - عا ارتىق كورسەتكىش. قالا بويىنشا جاڭا 1 972 جۇمىس ورنى اشىلعان. ال، «نۇر كاپيتال" ايماقتىق باعدارلاماسى بويىنشا 182 جۇمىس ورنىن اشۋ كوزدەلۋدە. سونىمەن قاتار، "راحات" كەنتىندە 300 ورىندىق مادەنيەت ءۇيىنىڭ قۇرىلىسى جۇرگىزىلۋدە. "وڭىرلەردى 2020 جىلعا دەيىن دامىتۋ" باعدارلاماسى اياسىندا سۋ تازارتۋ قۇرىلعىسىنان مەرەي شاعىن اۋدانىنا دەيىن سۋ قۇبىرىنىڭ قۇرىلىسى جانە جەرگىلىكتى بيۋدجەت قاراجاتى ەسەبىنەن راحات، اقسۋ، مەرەي، جۇلدىز شاعىن اۋداندارىندا درەناج جۇيەسى مەن نوسەر كاناليزاسياسىنىڭ قۇرىلىستارى جۇرگىزىلۋدە.
قالا تۇرعىندارىمەن كەزدەسكەن ايماق باسشىسى حالىقتىڭ ءومىر ءسۇرۋ دەڭگەيىن ارتتىرۋ – ەلباسى قويعان باسىم مىندەتتەردىڭ ءبىرى ەكەندىگىن، تۇرعىنداردىڭ ءال-اۋقاتىن جاقسارتۋ ماقساتىندا ارنايى ءىس-قيمىل جوسپارى جاساقتالىپ، قوردالانىپ قالعان وزەكتى ماسەلەلەردى ۋاقىتىلى شەشۋ ءۇشىن وسى جوسپارعا ساي ءبىرقاتار جۇمىستار اتقارىلىپ جاتقانىن مالىمدەدى.
ۇكىمەتتىڭ قولداۋىنىڭ ارقاسىندا قابىلدانعان ورتا مەرزىمدى پەرسپەكتيۆاعا ارنالعان جاڭاوزەن قالاسىن دامىتۋدىڭ 2025 جىلعا دەيىنگى جاڭا كەشەندى جوسپارىمەن تانىستىردى. «جوسپارعا سايكەس، «وزەنمۇنايگاز» كومپانياسىمەن قارجىلاندىرىلاتىن مازۋتتالعان توپىراقتى بيولوگيالىق تازارتۋ جوباسى بويىنشا جۇمىستار باستالدى. جوبانى جۇزەگە اسىرۋ ءۇشىن «تازاسۋ» ج ش س قۇرىلىپ، جاڭاوزەن قالاسىنىڭ 54 تۇرعىنى جۇمىسقا قابىلداناتىن بولادى. اقتاۋ قالاسىندا جۇمىس ىستەۋگە نيەت بىلدىرگەن جاڭاوزەن قالاسىنىڭ ەڭبەك جاستارى ءۇشىن جاتاقحانا قامتاماسىز ەتىلىپ، جالعا الۋ تولەمى «وزەنمۇنايگاز» قاراجاتى ەسەبىنەن جۇرگىزىلمەك. بۇگىندە ءوز بيزنەسىن اشۋعا نيەت بىلدىرۋشىلەر ءۇشىن وبلىستا «نۇر كاپيتال» ايماقتىق باعدارلاماسى جۇزەگە اسىرىلۋدا. باعدارلاما بويىنشا 30 ملن.تەڭگەگە دەيىنگى مولشەردە 1 پروسەنتپەن نەسيە قاراجاتىن بەرۋ قاراستىرىلعان. بۇگىنگى كۇنى باعدارلامامەن 27 جەرگىلىكتى كاسىپكەر قارجىلاندىرىلدى. بۇل جوبالاردى ىسكە اسىرۋ قوسىمشا 182 جۇمىس ورنىن قۇرۋعا مۇمكىندىك بەرەدى. جالپى، قالانىڭ تىنىس-تىرشىلىگىن قامتاماسىز ەتەتىن ينفراقۇرىلىمنىڭ نەگىزگى ماسەلەلەرى بۇگىنگى تاڭدا شەشىلگەن. الايدا، حالىق سانىنىڭ بەلسەندى ءوسۋىن ەسكەرە وتىرىپ، راحات جانە تەڭگە اۋىلدارىنداعى اۆتوجولداردى، ينجەنەرلىك جەلىلەردى، سونداي-اق كوشە جارىقتارىن قوسىمشا سالۋ جوسپاردا تۇر. اعىمداعى جىلى مەرەي، بوستاندىق، مۇنايلى شاعىن اۋداندارىندا جانە تەڭگە اۋىلىندا 18،3 كم قالاىشىلىك اۆتوجولدار سالىنادى. بۇل جۇمىستار ماۋسىم ايىندا باستالىپ، اعىمداعى جىلدىڭ جەلتوقسان ايىندا اياقتالاتىن بولادى. ەكىنشى جارتىجىلدىقتا «وزەنمۇنايگاز» قاراجاتى ەسەبىنەن مەديسينالىق ورتالىقتىڭ قۇرىلىسى باستالىپ، 2020 جىلى نىسان جاڭا جوعارى ساپالى جابدىقپەن پايدالانۋعا بەرىلەدى»، دەپ اتاپ ءوتتى قالا اكىمى.
بۇدان باسقا، «ەڭبەك» باعدارلاماسى شەڭبەرىندە ساپالى جانە جايلى ءومىر ءسۇرۋ ءۇشىن قولايلى جاعداي جاساۋ ارقىلى ازاماتتاردى ەڭبەكپەن تاپشى سولتۇستىك وڭىرلەرگە كوشىرۋ بويىنشا شارالار ىسكە اسىرىلۋدا. بۇل ءۇشىن مەملەكەتتىك قولداۋ شارالارى قاراستىرىلعان. «وزەنمۇنايگاز» كومپانياسىنىڭ قاتىسۋىمەن وتباسىنىڭ ءاربىر مۇشەسىنە 100 مىڭ تەڭگە كولەمىندە قوسىمشا ءبىر جولعى ماتەريالدىق كومەك تولەنەدى. ناتيجەسىندە، باعدارلامادا قاراستىرىلعان 88 مىڭ تەڭگە ەسەبىن قوسا العاندا وتباسىنىڭ ءاربىر مۇشەسى كوشۋگە 188 مىڭ تەڭگە الادى. بۇدان ءارى جۇيەلى شارالاردى جۇزەگە اسىرۋ شەڭبەرىندە جاڭاوزەن قالاسىندا جاڭا جوبالار مەن جۇمىس ىستەپ تۇرعان كاسىپورىنداردا جۇمىسپەن قامتۋ جانە جۇمىسقا ورنالاستىرۋ، شاعىن جانە ورتا بيزنەستى دامىتۋ، قالانىڭ ەڭبەككە جارامدى حالقىن كاسىبي قايتا وقىتۋ قامتاماسىز ەتىلەتىن بولادى.
