سىبىردەگى ورمان ءورتىن ءسوندىرۋدىڭ قاجەتى جوق. كراسنويار ولكەسىنىڭ گۋبەرناتورى الەكساندر ۋسستىڭ بۇل مالىمدەمەسى ەكولوگتاردىڭ ىزاسىن كەلتىردى دەپ حابارلايدى Qamshy.kz اقپارات اگەنتتىگى "حابار 24" سىلتەمە جاساپ.

وعان جاۋاپ رەتىندە قورشاعان ورتانى قورعاۋشىلار ارنايى باسپا ءسوز ءماسليحاتىن وتكىزدى. ولاردىڭ ايتۋىنشا، ءورت وشاعىن دەر كەزىندە انىقتاپ، ءتيىستى شارا قولدانعاندا وراسان شىعىن اكەلگەن تابيعي اپاتتىڭ الدىن الۋعا بولار ەدى. ەندى ءورتتىڭ سالدارى اۋىر بولاتىنىن ايتىپ، ەكولوگتار دابىل قاعۋدا.

"3،5 ميلليون گەكتار اۋماعىنداعى بيوتىرشىلىك جويىلدى. بۇل نەنى بىلدىرەدى؟ سول ورماندى مەكەندەيتىن اڭ-قۇس قىرىلىپ قالدى. جوكە اعاشتارى، بالقاراعاي سىندى فلورا مەن فاۋنانى جوعالتتىق. مۇنداي ەكولوگيالىق شىعىننىڭ مولشەرى ءورتتى سوندىرۋگە كەتەتىن اقشادان اسىپ تۇسەدى. ءتىپتى، وتتى ءزامزام سۋمەن وشىرگەن كۇننىڭ وزىندە، وسىنشالىق شىعىننىڭ الدىن الۋعا بولار ەدى"، - دەدى جالپىرەسەيلىك تابيعات ينستيتۋتىنىڭ ديرەكتورى اندرەي پەشكوۆ.

ەستەرىڭىزگە سالساق، الاپات ءورت كراسنوياردان بولەك، يركۋتسك جانە بۋرياتيانىڭ ءبىر بولىگىن شارپىعان. بۇگىندە ورماندى القاپتىڭ 3 جارىم ميلليون گەكتارى كۇلگە اينالدى. ال، ونىڭ ءتۇتىنى تومسك، ءنوۆوسىبىر، كەمەر، التاي، حاكاسيا مەن قازاقستاننىڭ كەي ايماعىنا تاراپ ۇلگەرگەن. وڭىردەگى دەنساۋلىق ساقتاۋ مينيسترلىگىنىڭ حابارلاۋىنشا، ادامداردىڭ تىنىس الۋى قيىنداپ، دارىگەرگە ءجيى قارالۋدا. ستاتيستيكالىق كورسەتكىشكە سايكەس، ەمحاناعا قارالۋ جيىلىگى 15%-كە ارتقان.