قازاقستان مۇسىلماندارى ءدىني باسقاراماسى جانە «زەكەت» قورىنىڭ باستاماسىمەن رەسپۋبليكا كولەمىندە «ەل ۇلەسى – پاتەرگە» اتتى قايىرىمدىلىق جوباسى ىسكە اسىرىلىپ كەلەدى. وسى يگى باستاما اياسىندا ەلىمىزدىڭ بىرنەشە وڭىرىندە كومەككە مۇقتاج ازاماتتارعا جومارت جانداردىڭ كومەگىمەن باسپانا الىنىپ، ساۋاپتى ءىس اتقارىلۋدا. وسى ورايدا، جامبىل وبلىسىندا قورداي اۋداندىق «قورداي» مەشىتى مەن «زەكەت» قورىنىڭ جامبىل وبلىستىق وكىلدىگى بىرلەسىپ اتالمىش جوبانى قولعا الدى. ناتيجەسىندە، «قورداي» مەشىتى جاماعاتىنىڭ كومەگىمەن ءبىر وتباسىعا سەمزاۋىتتان كىشىگىرىم باسپانا الىنىپ، ءۇيدىڭ كىلتى سارسەنبى كۇنى سالتاناتتى تۇردە قورداي اۋىلىنىڭ تۇرعىنى ءنازىمحان ماقاشيەۆاعا ۇسىنىلدى دەپ جازادى Qamshy.kz اقپارات اگەنتتىگى. 

سالتاناتتى شاراعا جامبىل وبلىسىنىڭ باس يمامى قانات جۇماعۇلوۆ، «زەكەت» قورىنىڭ جامبىل وبلىسى بويىنشا وكىلى بەكبولات مىڭبايەۆ، اۋداندىق مەشىت وكىلدەرى، ارداگەرلەر كەڭەسىنىڭ مۇشەلەرى جانە ءبىرقاتار اۋىل تۇرعىندارى قاتىستى. ءۇي يەسىنىڭ قۋانىشىمەن بولىسۋگە كەلگەندەر ىزگى تىلەكتەرىن ايتىپ، اقساقالدار باتاسىن بەردى.

– بۇگىن كەرەمەت ءىس-شارا جۇزەگە اسىرىلۋدا. كوپتىڭ كومەگىمەن ءبىر وتباسى باسپانالى بولدى. بارلىعىمىز وسىندا بەرەكە تىلەپ كەلىپ وتىرمىز. وسى يگى ىسكە مۇرىندىق بولعان كىسىلەرگە كوپ العىسىمىزدى ايتامىز. بۇل مۋفتياتىمىزدىڭ ۇيىمداستىرۋىمەن رەسپۋبليكا بويىنشا سىيعا تارتىلعان 118ء-شى ءۇي بولسا، وبلىستاعى بەسىنشى ءۇي. بۇگىن كەلگەن ارداگەر اقساقالدار دا دۇعا تىلەكتەرىن ايتۋدا، – دەدى قانات جۇماعۇلوۆ ءوز سوزىندە.

– وسىنداي جومارت جاندارعا العىسىم شەكسىز. ولارعا بارلىق جاقسىلىقتاردى تىلەيمىن. بۇل باس-تاما يگىلىكتى بولىپ، جالعاسىن تاپسىن، – دەپ قۋانىشىن جاسىرماعان ءۇي يەسى قوناقتاردى دامنەن اۋىز تيۋگە شاقىردى.

ايتا كەتەرلىگى، ءۇش بولمەلى ءۇي جينالعان 2 ملن. 500 مىڭ تەڭگەگە ساتىپ الىندى. ءومىر سۇرۋگە قولايلى جاعداي جاسالعان، 10 سوتىق جەرى مەن قورا جايى دا بار.

«ساداقا بەرۋ – بەرەكە كىلتى» دەمەكشى، اۋداندا ادال تاپقان ءناپاقاسىن قايىرىمدىلىققا جۇمساپ، مۇقتاج جاندارعا جاناشىرلىق تانىتىپ جۇرگەن ازاماتتار سانى ءوسىپ كەلەدى. ولاردىڭ ساۋاپتى ىستەرى ۇلگى تۇتارلىق. ۇيىمداستىرۋشىلاردىڭ ايتۋىنشا، بۇل جوبا مۇنىمەن شەكتەلمەي، جالعاسىن تاپپاق. ەندەشە، اۋدانداعى كومەككە ءزارۋ جانداردىڭ سانى ءسال بولسا دا ازاياتىنىنا ءۇمىت باسىم.