جامبىل وبلىسىندا قازاقستان رەسپۋبليكاسىنىڭ شەكاراشىلارى كۇنىنە وراي «مەرەيلى اسكەري وتباسى-2019» بايقاۋى ءوتتى دەپ جازادى Qamshy.kz اقپارات اگەنتتىگى. 

2093 اسكەري ءبولىمى باسقارماسىنىڭ ۇيىمداستىرۋىمەن وتكەن بۇل بايقاۋعا بالا تاربيەلەپ وتىرعان، ۇلتتىق جانە وتباسىلىق داستۇرلەردى ساقتاعان، بالالاردىڭ ادامگەرشىلىك، ينتەللەكتۋالدىق، فيزيكالىق دامۋىنا قولايلى جاعداي جاساعان، ەڭبەك داعدىلارىنا ۇيرەتىپ جۇرگەن، بەلسەندى ءومىر ۇستانىمىن بايقاتقان 5 اسكەري قىزمەتشىلەردىڭ وتباسى قاتىستى.

بايقاۋعا قاتىسۋشى وتباسىلار «وتباسىنى قادىرلەۋ – باقىتتى بولۋ»، «بەرىك وتباسى – باقىتتى بالالىق شاق»، «مەنىڭ وتباسىم – مەنىڭ باقىتىم»، «باقىتتى ءومىر سۇرگەن ءۇي»، «اتا-انالاردىڭ ءومىرى – بالالاردا» نوميناسيالارى بويىنشا ب ا ق سىناستى.

وتباسىنىڭ بىرەگەيلىگىن، گەنەولوگيالىق شەجىرەسىن، قىزىقتى وتباسىلىق فاكتىلەردى، تاريحىن، تانىسۋ ساتىنەن باستاپ جانە وسى ۋاقىتقا دەيىنگى وقيعالاردى باياندايتىن ءوزىنىڭ وتباسىن تانىستىرۋعا ارنالعان «مەنىڭ وتباسىم جانە وتباسىمنىڭ تاريحى» بولىمىندە وتباسىنىڭ ۇرانى مەن ەلتاڭباسىنا ءار وتباسى وزىنشە دايىندالىپ كەلگەنى كورىندى.

سۇراق-جاۋاپ كەزەڭىندە توپتار ماقالدىڭ جالعاسىن قينالماي تاۋىپ، سۇراقتارعا مۇدىرمەي جاۋاپ بەرە ءبىلدى.

بايقاۋدىڭ سوڭعى شارتى – ءۇي تاپسىرماسى كەزەڭىندە «وتباسى اۋەستىگى» تاقىرىبىندا قاتىسۋشىلار حورەوگرافيا، ۆوكال، مۋزىكالىق اسپاپتاردا ويناۋ، تەاترلاندىرىلعان ونەر، دەكوراتيۆتىك قولدانبالى جانە بەينەلۋ ونەرىنەن وزدەرىنىڭ جەتىستىكتەرىن كورسەتتى. اسكەري وتباسىلاردىڭ اراسىندا ونەرلى، تالانتتى، دارىندى اكەلەر، ولاردى قولداپ جۇرگەن انالار، سولارعا قاراپ ءوسىل كەلە جاتقان وسكەلەڭ ۇرپاقتارى بار ەكەنى كورىندى. قاتىسۋشى جانۇيالاردىڭ ءبىرى مۇقاعالي ماقاتايەۆتىڭ «اققۋلار ۇيىقتاعاندا» پوەماسىنان تەاترلاندىرىلعان كورىنىس كورسەتسە، كەلەسىسى گيتارامەن ءان سالىپ، كاراتەدەن تاربيەلەپ جۇرگەن شاكىرتتەرىمەن بىرگە سپورتتىق قويىلىم قويدى. ال ەندى ءبىرى شەت تىلدەردە ءان ايتىپ، وزگە ۇلتتاردىڭ بيلەرىن بيلەدى.

سۇلەيمبەكوۆ ابزال مىرزا ۇلى جانۇياسى جارى، ءۇش بالاسىمەن بىرگە ەرەكشە مۋزىكامەن، جارق ەتىپ شىعا كەلگەندە زال تولى كورەرمەن، قوشەمەتپەن قول سوعىپ وتىردى.بىردەن سۋىرىلىپ العا شىقتى.ساحناعا جاراسىمدىلىقپەن بىرىنەن كەيىن، ءبىرى شىعىپ جاتقان وتباسىلارعا قىزىعا قارايسىڭ.

بايقاۋ قورىتىندىسى بويىنشا قازىلار القاسى قاتىسۋشىلارعا ورىندار ۇلەستىرىپ، زاتتاي سىيلىقتار، گۇل شوقتارى، تاتتىلەر، بالالارعا ءتۇرلى ويىنشىقتار بەرىلدى.