وبلىس اكىمىنىڭ ىقپالىمەن ارداگەرلەر ۇيىنە جاناما ەتىپ، ارنايى ارداگەرلەر ءۇشىن سوعىلعان «بەلسەندى ۇزاق ءومىر ءسۇرۋ» ورتالىعىندا وبلىس ارداگەرلەرى اراسىندا توعىزقۇمالاق جارىسى وتكىزىلدى. وزىق ويلىلار ويىنىنان وتكەن جارىسقا «توعىزقۇمالاقتى تەگىن ۇيرەنەمىز» اتاۋىمەن وتكەن اكسيا اياسىندا ءبىر اي بويى ۇلتتىق ءويىننىڭ قىر-سىرىن مەڭگەرگەن 15 اقساقال قاتىستى دەپ جازادى Qamshy.kz اقپارات اگەنتتىگى. 

بۇل جارىستىڭ ەرەكشەلىگى، توعىزقۇمالاق ويىنىن بۇرىننان ويناپ جۇرگەن ارداگەرلەر قاتىستىرىلماي، تەك ۇيىرمەگە ۇيرەنۋ ءۇشىن تۇراقتى كەلىپ قاتىسقان ارداگەرلەر اراسىندا عانا وتكىزىلۋىندە بولدى. جارىستى وبلىستىق ارداگەرلەر كەڭەسىنىڭ ءتوراعاسى ەركىمبەك سولتىبايەۆ قورىتىندىلاپ، جارىس جەڭىمپازدارىن مەدالدارمەن، گراموتالارمەن، اقشالاي سىيلىقپەن جانە توعىزقۇمالاق تاقتاسىمەن، كىتابىمەن ماراپاتتادى.

ماراپاتقا جامبىل وبلىسى بويىنشا «توعىزقۇمالاق قازاق ۇلتتىق ويىن قاۋىمداستىعى» قب ءتوراعا ورىنباسارى بايشىعاشيەۆ ومەن قاتىستى.

جارىس جەڭىمپازدارى بولىپ، ءبىرىنشى التىن مەدالدى ارداگەر دجاپاروۆ تۇرار، ەكىنشى كۇمىس مەدالدى ارداگەر بايشونوۆ مۇحامەتىلدا، ءۇشىنشى قولا مەدالدى احمەت سانسىزباي، ال «ءمارت» سىيلىعىن ارداگەر جامانبايەۆ مالتابار يەلەندى.

ايتا كەتەيىك، جامبىلدىق ارداگەرلەرگە ۇلتتىق ويىندى «اۋليە اتا» ۇلتتىق سپورت تۇرلەرى كلۋبىنىڭ جاتتىقتىرۋشىسى ەربول نۇرحانوۆ ۇيرەتكەن بولاتىن. جالپى، «توعىزقۇمالاقتى تەگىن ۇيرەنەمىز» اكسياسى جامبىل وبلىستىق توعىزقۇمالاق قاۋىمداستىعى قولعا العان بولاتىن. ونداعى ماقسات – ۇلتتىق ويىندى ارداگەرلەر اراسىندا ۇيرەتىپ، ونى دامىتىپ، ناسيحاتتاۋ.

راسىندا، قازاق حالقىنىڭ ۇلتتىق ويىنى – توعىزقۇمالاققا ەلىمىزدە سوڭعى جىلدارى ايرىقشا نازار اۋدارىلىپ كەلە جاتقانى بەلگىلى. تۇركيا ەلىندە سپورتتىڭ وسى تۇرىنەن بەسىنشى الەم چەمپيوناتى وتكەن بولاتىن. سول دودادا الەمنىڭ 19 ەلىنەن ۇمىتكەرلەردىڭ قاتىسۋى توعىزقۇمالاقتىڭ حالىقارالىق دەڭگەيدە تانىلا باستاعانىنىڭ ءبىر دالەلى. ەندىگى قادام – ەڭبەك ارداگەرلەرىنە توعىزقۇمالاق ويىنىنىڭ ەرەجەسىن ءتۇسىندىرىپ، ۇيرەتۋ جۇمىستارى قولعا الىندى.

ارداگەرلەر بۇل يگى باستامانى ۇلكەن قۋانىشپەن قولدادى. سەبەبى زەينەت جاسىنداعى ولار ءۇشىن بوس ۋاقىتتارىن ءتيىمدى پايدالانىپ، سالاۋاتتى ءومىر سالتىن ۇستانۋدى كوزدەيدى.

سونداي-اق، ارداگەرلەر «ءۇشباس» سپورتتىق ويىنىنىڭ دا ەرەجەلەرىمەن تانىسقان بولاتىن. «ءۇشباس» اسىق ويىنى ءتۇرلى يدەيالاردى قامتي وتىرىپ، قازىرگى زامانعا لايىقتى ەتىپ جاسالعان. ول شاحمات تاقتاسىنا ۇقساس جينالمالى ۇستەل ۇستىندە وينالادى.