جامبىل وبلىسىنىڭ تانىمال سۋرەتشىسى، ءمۇسىنشىسى جانە قولونەر شەبەرى قازىم امانقوسوۆ سولتۇستىك كيپر ارالىنىڭ نيكوسيا قالاسىندا وتكەن حالىقارالىق سۋرەتشىلەر سيمپوزيۋمىنا قاتىستى. ىلە-شالا جامبىلدىق سۋرەتشى تۇركيالىق تاراپتىڭ ۇسىنىسىمەن نيكوسيا قالاسىندا 1 اي بويى جەكە كورمەسىن وتكىزدى دەپ جازادى Qamshy.kz اقپارات اگەنتتىگى. 

15 كۇنگە سوزىلعان سيمپوزيۋم جۇمىسىندا قازىم امانقوسوۆ نەگىزىنەن كەسكىندەمە ونەرى بويىنشا كارتينالار سالعان. تۇركيا ازاماتى گۋنسال سۋاتتىڭ جەكە باستاماسىمەن ءوتىپ جاتقان كورمەنىڭ نەگىزگى ماقساتى كەلەر جىلى كيپردە اشىلاتىن زاماناۋي ونەر مۇراجايىنا تۇركى ەلدەرىنىڭ مادەنيەتىن تانىتاتىن ەكسپوناتتار مەن كارتينالاردى جيناقتاۋ بولىپ تابىلادى.

ايتا كەتۋ كەرەك جامبىل مادەنيەتىنىڭ قولونەر، كوركەم سۋرەت باعىتىندا وزىندىك قولتاڭباسى بار قازىم امانقوسوۆ شىعارماشىلىعى بۇعان دەيىن حالىقارالىق دەڭگەيدە تانىلىپ كەلەدى. كوپتەگەن حالىقارالىق جانە رەسپۋبليكالىق كورمە-بايقاۋلارعا قاتىسىپ جۇرگەن سۋرەتشىنىڭ كەي شىعارمالارى فرانسيا، اقش، گەرمانيا، يۋنەسكو، يسپانيا ەلدەرىنىڭ جەكە كوللەكسيالارىندا ساقتالعان.

ەلباسىنىڭ «ۇلى دالانىڭ جەتى قىرى» اتتى ماقالاسىندا قازاقستاننىڭ ەجەلگى تۇرعىندارىنىڭ وزىق مادەنيەتى بولعانىن ايتىلادى.

«ولاردىڭ مۇراسىنىڭ جارقىن كورىنىسى، كوركەم بولمىسى مەن رۋحاني بايلىعىنىڭ ايشىقتى بەلگىسى – «اڭ ءستيلى» ونەرى. جانۋارلار بەينەسىن تۇرمىستا پايدالانۋ ادام مەن تابيعاتتىڭ ءوزارا بايلانىسىنىڭ سيمۆولىنا بالانىپ، كوشپەندىلەردىڭ رۋحاني باعدارىن ايقىنداپ وتىرعان.ولار جىرتقىشتاردىڭ، نەگىزىنەن مىسىق تۇقىمداس اڭداردىڭ سۋرەتىن كوبىرەك قولدانعان. ەگەمەن قازاقستاننىڭ سيمۆولدارىنىڭ ءبىرى – جەرگىلىكتى جانۋارلار الەمىندە سيرەك كەزدەسەتىن تۇرپاتى تەكتى قار بارىسى ەكەنى كەزدەيسوق ەمەس»، دەپ جازادى ەلباسى.

سايكەسىنشە سۋرەتشى قازىم امانقوسوۆ شىعارماشىلىعىنان دا زاماناۋي تەحنولوگيا مەن ەجەلگى قولونەر ستيلدەرىنىڭ ۇيلەسىم تاپقانى اڭعارىلادى. اسىرەسە ونىڭ اتاعىن شىعارعان «ورتەكە» تۋىندىسىندا قولونەر مەن قازاقتىڭ كۇيىنىڭ ىرعاعى بايقالادى. سوندىقتان دا جەرلەس سۋرەتشىنىڭ شىعارماشىلىعىنىڭ قاينار بۇلاعى قازاق جەرىندەگى ەجەلگى قولونەر تۋىندىلارىنان ءوربىپ، الەمدىك تاجىريبەمەن بىتە قايناسقانىن ايتۋعا بولادى. وسىناۋ ونەردى كۇللى الەمگە ناسيحاتتاپ، حالىق رۋحانياتىنىڭ دامۋىنا ءوز ۇلەسىن قوسىپ جۇرگەن ونەرپاز جاقىندا عانا «قازاقستاننىڭ 100 جاڭا ەسىمى» جوباسىنا ۇسىنىلعان ەدى.