جامبىل وبلىسىندا قارقىندى جۇرگىزىلگەن تىڭ جانە تىڭايعان جەرلەردى يگەرۋ ەكونوميكانىڭ وزگە سالالارىنىڭ دامۋىنا ىقپال جاسادى. اسىرەسە القاپتاردان جينالعان داقىلدى سان تاراپقا جونەلتۋ ماقساتىندا تەمىرجولمەن جۇك تاسىمالىنىڭ ءرولى نىعايىپ، شويىن جولمەن جۇك تاسىمالىنىڭ كولەمى 30 پايىزعا ءوستى دەپ جازادى Qamshy.kz اقپارات اگەنتتىگى. 

وبلىستىق ارحيۆ قورىنداعى مالىمەتتەردە جامبىل وبلىسى اۋماعىنداعى تىڭ جانە تىڭايعان جەرلەردى يگەرۋ جۇمىستارى 1954 جىلدىڭ 19- قازانىندا قازاق سسر مينيسترلەر سوۆەتى «جامبىل وبلىسىندا جاڭا استىق سوۆحوزدارىن ۇيىمداستىرۋ تۋرالى» قاۋلىسى قابىلدانعاننان كەيىن باستالعانىن ايعاقتايدى. سول تۇستا وبلىستاعى جاڭادان قۇرىلعان كەڭشارلار ەسەبىنەن جالپى كەڭشار سانى 6 ەسەگە دەيىن ۇلعايدى. جاڭادان يگەرىلگەن ەگىستىك القاپتارى مول ءونىم الىنىپ، ديقاندار 1 ميلليون 163 مىڭ توننا استىق جينادى.

سول كەزەڭدەردە تىڭ كەڭشارلارى مەملەكەتكە 382 مىڭ توننا استىق، 20 مىڭ توننا ءسۇت، 25 مىڭ توننا ەت، 4600 توننا ءجۇن جانە باسقا دا اۋىل شارۋاشىلىعى ونىمدەرىن تاپسىردى. تەك «دالاقاينار» كەڭشارىنىڭ ءوزى 13581 توننا، ال «تۇركىستان» كەڭشارى 11476 توننا، «پودگورنىي» كەڭشارى 29672 توننا، «اسپارا» 13776 توننا استىق وتكىزدى. ءوز كەزەگىندە مەملەكەت الدىنا وسى مول استىقتى تاسىمالداۋ ماسەلەسى قويىلدى. سايكەسىنشە اتالعان استىقتى كەڭەس وداعىنىڭ سان قيىرىنا جىبەرۋ تەمىرجولمەن جۇك تاسىمالداۋ سالاسىنا تىڭنان تۇرەن سالدى. سوندىقتان دا جەرگىلىكتى بيلىك 1955 جىلى تەمىرجول جەلىلەرىندە قالىپتاسقان ءتۇيىندى ماسەلەلەردى شەشۋگە بار كۇش جىگەرىن جۇمسادى. سوڭعى 5 جىلمەن سالىستىرعان مويىنتى-شۋ تەمىر جول جەلىسىنىڭ پايدالانۋعا بەرىلۋى ەسەبىنەن تەمىرجولدىڭ جامبىل جانە سارىشاعان بولىمشەسىندە پويىزداردىڭ ءجۇرۋى قىرىق پايىزعا ارتتى. جۇك تاسىمالداۋ 30 پايىزعا جانە جۇك تيەۋ 35 پايىزعا كوبەيدى.

سوندىقتان دا، وبلىس باسشىلارى كەڭەس وداعىنىڭ جول قاتىناستارى مينيسترلىگىنە حات جولداپ، بىرلىك-تۇلكىباس ستانسيالارىنىڭ ارالارىندا ەكىنشى تەمىرجول جەلىسىن سالۋدى سۇرادى. سونىمەن بىرگە، جامبىل تەمىرجول بولىمشەسىندە 11 مىڭ ادام جۇمىس ىستەيتىندىگىنە قاراماستان، ولاردى تۇرعىن ۇيمەن قامتاماسىز ەتۋ ناشارلىعى دا ايتىلدى. سونداي-اق ستانسيالارعا مەكتەپتەر مەن اۋرۋحانالار، باسقا دا تۇرمىستىق الەۋمەتتىك عيماراتتار سالۋ سۇرالدى.