تىڭ جانە تىڭايعان جەرلەردى يگەرۋ جىلدارى جامبىل وبلىسىنداعى كەڭشارلار سانى 6 ەسەگە ۇلعايعان. جامبىلدىق ديقاندار ءار گەكتارىنان 19،1 سەنتنەر ءدان جينادى. سول جىلدارى قامباعا قۇيىلعان استىقتىڭ جالپى كولەمى 1 ميلليون 163 مىڭ توننا بولدى دەپ جازادى Qamshy.kz اقپارات اگەنتتىگى. 

وبلىستىق مۇراعاتتاعى مالىمەتتەرگە قاراعاندا جامبىل وبلىسى اۋماعىنداعى تىڭ جانە تىڭايعان جەرلەردى يگەرۋ جۇمىستارى 1954 جىلدىڭ 19- قازانىندا قازاق سسر مينيسترلەر سوۆەتى «جامبىل وبلىسىندا جاڭا استىق سوۆحوزدارىن ۇيىمداستىرۋ تۋرالى» قاۋلىسى قابىلدانعاننان كەيىن باستالدى. اتالعان قۇجاتتا وبلىس اۋماعىندا 249 مىڭ گەكتار ونىڭ ىشىندە استىق ەگۋگە جارامدى 126 مىڭ گەكتار القاپتى جاڭادان جاڭادان ۇيىمداستىرىلاتىن تىڭ كەڭشارلارعا بەرۋ ۇسىنىلدى.

بۇعان دەيىن جامبىل وبلىستىق سوۆەتى اتقارۋ كوميتەتى وبلىس اۋماعىنان 12، قازاق سسر سوۆحوزدار مينيسترلىگى 9 تىڭ سوۆحوزىن ۇيىمداستىرۋدى ۇسىندى. جاڭادان بوي كوتەرگەن سوۆحوزدارعا بۇكىلوداقتىق تىڭ يگەرۋ ەكپىندى ناۋقانىنا وراي رەسەيدەن، ۋكراينادان، ارمەنيادان، كاۆكازدان، وزبەكستاننان، تاعى دا باسقا ەلدەردەن تىڭ يگەرۋشىلەر كەلە باستادى.

جامبىل وبلىسىندا تىڭ جانە تىڭايعان جەرلەردى يگەرۋ ماقساتىندا «تۇركىستان»، «پودگورنىي»، «اسپارا»، «شوقپار»، «دالاقاينار»، «قاراتاۋ»، «قوراعاتى»، «قورداي»، «كراسنوگور» سوۆحوزدارى قۇرىلدى. ءبىر عانا تۇركىستان سوۆحوزى 1955 جىلى 23 مىڭ سەنتنەر استىق وندىرسە، 1978 جىلى بۇل كورسەتكىش 162 مىڭ سەنتنەر بولدى. 1978 جىلى بۇل سوۆحوزداردىڭ قاراۋىندا 622 مىڭ گەكتار جەر بولدى. ونىڭ 100 مىڭ گەكتارىنا استىق داقىلى سەبىلدى. ولاردىڭ تراكتور-ماشينا شەبەرحانالارىندا 1300 تراكتور، كومباين جانە اۆتوماشينا شوعىرلاندى..

جالپى وبلىستا 1953 جىلى وبلىستا 13 كەڭشار بولسا، 1977 جىلى ولاردىڭ سانى 91-گە جەتتى. وبلىس ديحاندارى 1 ميلليون 163 مىڭ توننا استىق جينادى. ءار گەكتاردان 19،1 سەنتنەردەن التىن ءدان باستىردى. تىڭ شارۋاشىلىقتارى اراسىندا لۋگوۆوي اۋدانىنداعى «پودگورنىي» كەڭشارىنىڭ قول جەتكىزگەن جەتىستىگى ماقتانارلىق بولدى. «پودگورنىي» كەڭشارىن 1960 جىلدان باستاپ نيكولاي يۆانوۆيچ گوليكتىڭ باسقارعان تۇستا ونىڭ تابىسى ۇلعايا ءتۇستى. ۇلى وتان سوعىسى ارداگەرى شارۋاشىلىقتى كوتەرۋمەن بىرگە ءوزى دە اتاق- داڭققا بولەندى. قازاق جەرىندە ول ومىراۋىنا ەكى لەنين، ەڭبەك قىزىل تۋ، «قۇرمەت بەلگىسى» وردەندەرىن قادادى. ال 1971 جىلى وعان سوسياليستىك ەڭبەك ەرى اتاعى بەرىلدى. 16 جىل شارۋاشىلىقتى باسقارعان نيكولاي يۆانوۆيچ پودگورنىيلىقتاردىڭ عانا ەمەس، بۇكىل جامبىل وبلىسىنىڭ قۇرمەتتىسىنە اينالدى. وسىلايشا تىڭ جانە تىڭايعان جەرلەردى يگەرۋدىڭ تاريحى جامبىل جەرىندە دە جازىلدى.