قازاقتىڭ زاڭعار جازۋشىسى مۇحتار اۋەزوۆتىڭ «تۇركىستان سولاي تۋعان» دەپ اتالاتىن تۋىندىسى جامبىل وبلىسى اۋماعىنداعى تىڭ جانە تىڭايعان جەرلەردى يگەرۋ جۇمىستارى كەزىندە قۇرىلعان «تۇركىستان» كەڭشارى تۋرالى جازىلعان دەپ جازادى Qamshy.kz اقپارات اگەنتتىگى. 

جالپى جامبىل وبلىسى اۋماعىنداعى تىڭ جانە تىڭايعان جەرلەردى يگەرۋ جۇمىستارىن 1954 جىلدىڭ 19- قازانىندا قازاق سسر مينيسترلەر سوۆەتى «جامبىل وبلىسىندا جاڭا استىق سوۆحوزدارىن ۇيىمداستىرۋ تۋرالى» قاۋلىسى قابىلدانعاننان كەيىن قارقىن الدى. بۇل جۇمىستاردىڭ رەسمي باستاۋى بولعان قۇجاتتا وبلىس اۋماعىندا 249 مىڭ گەكتار ونىڭ ىشىندە استىق ەگۋگە جارامدى 126 مىڭ گەكتار القاپتى جاڭادان جاڭادان ۇيىمداستىرىلاتىن تىڭ كەڭشارلارعا بەرۋ ۇسىنىلدى. سونداي جامبىل وبلىستىق سوۆەتى اتقارۋ كوميتەتى وبلىس اۋماعىنان 12، قازاق سسر سوۆحوزدار مينيسترلىگى 9 تىڭ كەڭشارىن ۇيىمداستىرۋ تۋرالى باستاما كوتەرگەن. ءوز كەزەگىندە كەڭەس وداعى قۇرامىنداعى ەلدەردىڭ قوعامدىق-ساياسي ومىرىندەگى وسى ءبىر وزگەرىستەر كەڭەس-قازاق ادەبيەتشىلەرىنىڭ شىعارماشىلىعىنا دا اسەر ەتكەن. ماسەلەن قازاقتىڭ زاڭعار جازۋشىسى مۇحتار اۋەزوۆتىڭ قالامىنان شىققان «تۇركىستان سولاي تۋعان» وچەركىنە قازىرگى سارىسۋ اۋدانىنىڭ بايقادام اۋىلىنىڭ اۋماعىندا قۇرىلعان «تۇركىستان» كەڭشارىنىڭ اياققا تۇرۋ تاريحى ارقاۋ بولعان. اتالعان تىڭ كەڭشارى ورتالىق ازياداعى تۇركىستان اسكەري وكرۋگىنىڭ شەفتىك قامقورلىققا الىنۋىمەن قۇرىلعان. سوندىقتان دا بۇل كەڭشارعا «تۇركىستان» اتاۋى بەرىلگەن.

نەگىزىنەن تىڭ جانە تىڭايعان جەرلەردە جاڭا كەڭشارلاردى ۇيىمداستىرۋعا اسكەريلەردى تارتۋ ارنايى قاۋلىمەن رەتتەلدى. كەڭەس وداعىنىڭ مينيسترلەر كەڭەسىنىڭ 1954 جىلدىڭ 14 قازانىندا «زاپاسقا شىعاتىن اسكەري قىزمەتكەرلەردى اۋىل شارۋاشىلىقتارىندا پايدالانۋ جايلى» قاۋلىسى شىقتى. سول قاۋلىعا ساي 85-90 مىڭ اسكەري قىزمەتشى جاڭادان ۇجىمداسىپ جاتقان كەڭشارلارعا جولدامامەن جىبەرىلىپ جاتتى.مسەلەن ورتالىق ازيادا ورىن تەپكەن تۇركىستان اسكەري وكرۋگى سارىسۋ اۋدانىنداعى «تۇركىستان» كەڭشارىن ءوز قامقورلىعىنا العان. بۇل كەڭشار العاشىندا «بايقادام» دەپ اتالعان. زاپاسقا شىققان سولداتتارمەن بىرگە تەحنيكا، اسكەري شاتىرلار، كوشپەلى مونشا، اسحانا، ۇلكەن سۋ، جانار-جاعار ماي قۇياتىن ىدىستار، قۇرىلىس ماتەريالدارىن جەتكىزدى. ولار «تۇركىستان» كەڭشارىندا 1955 جىلدىڭ جازىندا ءبىر كوشەنىڭ بويىندا 2 پاتەرلىك 6 ءۇي، 4 پاتەرلىك 12 اعاش ءۇي تۇرعىزدى. سول سەبەپتى دە جاڭا قۇرىلىپ جاتقان كەڭشار وسى اسكەري وكرۋگتىڭ اتىمەن «تۇركىستان» دەپ اتالدى.