مۇراعات دەرەكتەرىندە جامبىل وبلىسىنىڭ وقۋ اعارتۋ سالاسى ءۇشىن 1962-1963 وقۋ جىلىنىڭ بارىنشا جاڭالىققا تول بولعانىن بايقاۋعا بولادى. ويتكەنى ءدال وسى ۋاقىتتا سول كەزدەگى جامبىل قالاسىنداعى العاشقى وقۋ ورنى ەسىگىن ايقارا اشتى دەپ جازادى Qamshy.kz اقپارات اگەنتتىگى. 

1962 جىلدىڭ كۇزىندە جامبىل قالاسىنداعى قازاق مەملەكەتتىك اۋىل شارۋاشىلىق ينستيتۋتىنىڭ گيدرومەليوراتيۆتىك فاكۋلتەتىنىڭ نەگىزىندە جامبىل گيدرومەليوراتيۆتىك-قۇرىلىس ينستيتۋتى اشىلدى. ءوز كەزەگىندە وبلىستاعى بۇل العاشقى جوعارى وقۋ ورنى ونەركاسىپتىك جانە ازاماتتىق قۇرىلىس، گيدرومەليوراسيا، گيدروتەحنيكالىق قۇرىلىمدار جانە سۋ ەلەكتر ستانسالارى قۇرىلىسى، سۋمەن قامتاماسىز ەتۋ جانە كاناليزاسيا ماماندىقتارى بويىنشا كۇندىزگى جانە سىرتتاي وقىتۋ تۇرلەرى بويىنشا ماماندار دايىندادى. ينستيتۋتتىڭ العاشقى رەكتورى تەحنيكا عىلىمدارىنىڭ دوكتورى، قازاق سسر عىلىم اكادەمياسىنىڭ كوررەسپوندەنت مۇشەسى، قازاق سسر-نا ەڭبەگى سىڭگەن گيدروتەحنيك راحمەت جولايەۆ بولدى.

گيدروتەحنيكا عىلىمى سالاسىندا بەلگىلى عالىم راحمەت جانعازى ۇلى ءوزى ىرگەتاسىن قالاعان جوعارى وقۋ ورنىن 1973 جىلعا دەيىن جەمىستى باسقاردى. ال 1973 جىلدان باستاپ وقۋ ورنىنىڭ تىزگىنىن سول كەزدەگى قازاقستانداعى ينستيتۋتتار مەن ۋنيۆەرسيتەتتەرى اراسىنداعى ەڭ جاس رەكتورى بولعان مارس ۇركىمبايەۆ قولعا الدى. مارس فازىل ۇلىنىڭ باسشىلىققا كەلۋىمەن وقۋ ورنىندا جاڭا ماماندىقتار پايدا بولىپ، پروفەسسور-وقىتۋشىلار قۇرامىنىڭ عىلىمي الەۋەتى ارتتى. سونداي-اق ينستيتۋتتىڭ كۇندەلىكتى قوعامدىق ومىرىندە سپورتقا باسا ءمان بەرىلىپ، جاڭا سپورتتىق سەكسيالار اشىلدى. ستۋدەنتتەر مەن وقىتۋشىلاردى جاتاقحانامەن قامتۋ ءىسى دە وڭ شەشىمىن تاپتى.

العاش اشىلعان كۇننەن باستاپ جامبىل گيدرومەليوراتيۆتىك-قۇرىلىس ينستيتۋتى تۇتاس كەڭەس وداعىنداعى سۋ شارۋاشىلىعى سالاسى ءۇشىن مامان دايارلاۋ ىسىمەن اينالىستى. سول كەزەڭدە گيدرتەحنيكتەردى دايارلايتىن مۇنداي قۇرىلىم كەڭەس وداعى اۋماعىندا ەكى-اق قالادا بولدى

ارادا 30 جىلعا جۋىق ۋاقىت وتكەن سوڭ ينستيتۋت 1958 جىلدان وبلىس ورتالىعىندا قازاق حيميا تەحنولوگيا ينستيتۋتىنىڭ فيليالى رەتىندە جۇمىس جاساپ، 1963 جىلى جامبىل جەڭىل جانە تاماق ونەركاسىبى تەحنولوگياسى ينستيتۋتىنا اينالعان وقۋ ورنىمەن باس قۇراپ، قازىرگى م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ نەگىزىن سالدى. بۇگىندە اتالعان وقۋ ورنىندا ءبىلىم العان ستۋدەنتتەردىڭ كەيبىرى ۇلكەن مەملەكەتتىك قىزمەتتەردە ءمىنسىز جۇمىس جاساۋدا.