كەڭەستىك جۇيە كۇشىنە ەنىپ، قىزىل يمپەريا قاھار توككەن 1960 جىلى جامبىل وبلىسىندا 2 مەشىت بولعان.الايدا بۇل قىلىشىنان تامىپ تۇرعان كەڭەس وداعى ورناعان العاشقى جىلدارمەن سالىستىرعاندا الدەقايدا تومەن كورسەتكىش ەدى.1935 جىلى وڭىردە جۇمىس جاساعان مەشىت پەن شىركەۋدىڭ جالپى سانى 33 بولاتىن دەپ جازادى Qamshy.kz اقپارات اگەنتتىگى. 

«ءدىن–اپيىن» دەگەن كوزقاراستى ۇستانىپ، ءدىنسىز، قۇدايسىز قوعام قۇرۋعا ۇمتىلۋشىلىقتار بولعانىمەن كەڭەس وداعى تۇسىندا دا ءدىني ۇيىمدار مەن مەكەمەلەر تۇراقتى جۇمىس جاساپ تۇرعان ەكەن. سوعان قاراماستان بيلىك ءدىني ۇيىمدار مەن قوعام اراسىنداعى بايلانىستى باستى نازاردا ۇستاعان سىڭايلى. وبلىستىق مۇراعاتتار قورىنداعى مالىمەتتەردە 1935 جىلى جامبىل قالاسىندا 33 مەشىت پەن شىركەۋ بولسا، 1960 جىلدىڭ سوڭىندا وبلىستا رەسمي تۇردە ەكى مەشىت جۇمىس جاساعانى ايتىلادى. ونىڭ ءبىرى جامبىل قالاسىندا بولسا، ەكىنشىسى مەركى اۋدانىندا ورنالاستى.

رەسمي مالىمەتتەر 1960 جىلدارداعى جاعداي بويىنشا وڭىردە 6000-نان اسا ادامنىڭ يسلام دىنىنە سەنگەندىگىن ايعاقتايدى. ال جامبىل قالاسىنداعى مەشىتكە كۇن سايىن ناماز وقۋ ءۇشىن 60-80 ادام كەلەتىندىگى انىقتالعان. جۇما ناماز كەزىندە بۇل كورسەتكىش 2000-عا دەيىن ۇلعايعان. ورازا، قۇربان ايت نامازى كۇندەرى ولاردىڭ سانى ءتىپتى 4500-گە جەتىپتى.

وبلىستىق مۇراعاتتا ساقتالعان ەندى ءبىر دەرەكتە تاراز قالاسىنداعى مەشىتتىڭ تابىسى 1958 جىلى 199 784 سوم بولعانى جازىلعان. 1959 جىلى مەشىتكە تۇسكەن جىلدىق تابىس 164 035 سومدى قۇراپتى. ال 1960 جىلى «قۇداي ۇيىنە» 136056 سوم تابىس تۇسكەن ەكەن. بۇل قارجى نەگىزىنەن مەشىتتە نەكە قيۋدان، جانازا شىعارۋدان، قاتىم قۇران تۇسىرۋدەن، پىتىردەن جانە ەرىكتى تۇردە قارجى بەرۋدەن جينالىپ وتىرعان. يسلامنىڭ كەيبىر شارتتارىن ورىنداۋ ماقساتىن وبلىس اۋداندارىنداعى تىركەلمەگەن ەلدى مەكەندەردى ارالاپ جۇرەتىن 80 مولدا دا بولعان ەكەن. مەشىتتەن بولەك سول تۇستا وبلىس اۋماعىن مەكەن ەتكەن مۇسىلماندار اراسىنان قاراحان اۋليە، شومانسۇر، ايشا ءبيبى، بابادجا حاتۋن، تەكتۇرماس، سىپاتاي باتىر كەسەنەلەرى مەن مازارلارىنا ءتاۋ ەتە باراتىنداردىڭ بولعاندىعى جازىلادى.

مەشىتتەردەن بولەك جامبىل قالاسىندا ەۆانگەليست-حريستيان باپتيستەرىنىڭ عيبادات ءۇيى جۇمىس ىستەپ تۇرعان كورىنەدى. سونىمەن بىرگە، 15 تىركەلمەگەن بىرلەستىكتەر مەن سەكتالار ۇگىت-ناسيحات جۇمىسىن جۇرگىزگەن. ولار نەگىزىنەن سەنبى، جەكسەنبى كۇندەرى دىنگە سەنۋشىلەردىڭ جەكە ۇيلەرىندە باس قوستى. ولاردىڭ اراسىندا نەشە ءتۇرلى اعىمدى ناسيحاتتاۋشىلار بولدى. ەسەپ بويىنشا ولاردىڭ جالپى سانى 6000-نان استى.

الايدا مۇراعات قورىنداعى ءدىني ۇيىمداردىڭ جۇمىسى جايىندا كەلتىرىلگەن مالىمەتتەردە ءدىني بىرلەستىكتەردىڭ ءاربىر ىس-ارەكەتى، جينالعان ادام سانى، قاراجاتى قاتاڭ باقىلاۋدا بولعانىن اڭعارىلادى.