جامبىل وبلىسىنىڭ جۋالى اۋدانىندا بوي كوتەرىپ جاتقان «قارالما» تاۋ-شاڭعى بازاسى ءوڭىر تۇرعىندارى مەن قوناقتارىنا جىل بويى قىزمەت كورسەتەتىن بىرەگەي كەشەنگە اينالماق دەپ جازادى Qamshy.kz اقپارات اگەنتتىگى. 

وتكەن جىلى وبلىس اكىمى اسقار مىرزاحمەتوۆتىڭ باستاماسىمەن تالاس الاتاۋىنىڭ 3200 مەتر بيىكتىگىندە ورنالاسقان «قارالما» تاۋ-شاڭعى بازاسى» جوباسى قولعا الىنعان ەدى. كەشەن «كوكساي»شاتقالى مەن «اقسۋ-جاباعىلى»

تابيعي قورىعىنىڭ اۋماعىندا بوي كوتەرۋدە. ءارى مۇندا اق ۇلپا قار مامىر ايىنا دەيىن ەرىمەي جاتادى. نىسان ورنالاسقان اۋماق وبلىس ورتالىعىنان دا قاشىق ەمەس.حالىقارالىق ءاۆتودالىز دە ىرگەسىنەن ءوتىپ جاتىر.

–جوبالىق قۇنى 3 ميلليارد 355 ميلليون تەڭگەنى قۇرايتىن «قارالما» تاۋ-شاڭعى بازاسى جوباسىن جۇزەگە اسىرۋ ماقساتىندا 274 گەكتار اۋماقتا قۇرىلىس جۇمىستارى قارقىندى جۇرگىزىلۋدە. مۇندا شاڭعىشىلارعا ارنالعان ۇزىندىعى 2050 مەتر بولاتىن اسپالى جول سالىنعان. «قارالما» كەشەنىنىڭ قۇرامىنا قۇرامىنا 20 كوتتەدج، 100 ورىندىق 1 مەيمانحانا، ءارقايسىسى 70 ورىندىق 2 مەيرامحانا، 30 ورىندىق كافە، باقىلاۋ مۇناراسى، قىزمەت كورسەتۋ ورتالىعى، 100 اۆتوكولىككە ارنالعان اۆتوتۇراق، باسسەين جانە باسقا دا ساۋدا-ويىن-ساۋىق ورىندارى كىرەتىن بولادى. كەشەن ءوز تۇتىنۋشىلارىنا جىل ون ەكى قىزمەت كورسەتەتىن بولادى، –دەيدى جامبىل وبلىسى اكىمدىگىنىڭ تۋريزم باسقارماسىنىڭ باسشىسى قارلىعاش ارالبەكوۆا.

ءبىر سوزبەن ايتقاندا جامبىلدىڭ شىمبۇلاعىنا اينالدىرۋ ءۇشىن قارالما شاتقالى تاپتىرماس ورىن. ونى زاماناۋي ۇلگىدەگى تاۋ شاڭعى بازاسىنا اينالدىرۋ مۇمكىن بولسا مۇندا ءبىر كۇندە 3 مىڭ ساياحاتشىعا قىزمەت كورسەتىلمەك. ءقازىر كەشەندەگى قۇرىلىس جۇمىستارى بەل ورتاسىنا تاياپ قالدى. نەگىزىنەن «قارالما» قۇرىلىسى ەكى كەزەڭدە جۇزەگە اساتىن بولادى. ونىڭ العاشقىسىندا جاپپاي حالىقتىق، ياعني جاستار مەن بالالارعا، وتباسىلىق دەمالىسقا ارنالعان شاڭعى تراسسالارى سالىنادى. ال ەكىنشى كەزەڭدە كاسىبي دەڭگەيدەگى سىرعاناۋ جولدارىنا كەزەك بەرىلەدى. سونداي-اق مۇندا 2 شاقىرىمنان اساتىن زاماناۋي ۇلگىدەگى اسپالى تەمىر ارقان جول ورناتۋعا پايدالىنىلاتىن قۇرال-جابدىقتار اۋستريادان اكەلىنەتىن بولادى. جوبا تولىعىمەن مەملەكەتتىك جەكەمەنشىك ارىپتەستىك نەگىزىندە جۇزەگە اسىرىلادى. سوندىقتان جوبا كاسىپكەرلەر تاراپىنان زور سۇرانىسقا يە. ال بولاشاقتا «قارالما» تاۋ شاڭعى بازاسىنا ينۆەستورلار تارتىلماق. جوسپار بويىنشا نىساننىڭ قۇرىلىسى بيىلعى جىلدىڭ جەلتوقسان ايىنا دەيىن اياقتالىپ، تۇرعىندار «قارالما» تاۋ-شاڭعى بازاسىندا دەمالا الادى.