ەلباسىنىڭ «ۇلى دالانىڭ جەتى قىرى» اتتى ماقالاسىندا ايتىلعان «تاريحتىڭ كينو ونەرى مەن تەليەۆيزياداعى كورىنىسى» ارنايى جوباسىنا ۇلەس قوسۋ ماقساتىندا جامبىلدىق جاستار اعىمداعى جىلى 125 جىلدىعى تويلاناتىن قازاقتىڭ ءبىرتۋار ۇلى تۇرار رىسقۇلۆ جايىندا قىسقامەتراجدى فيلم ءتۇسىرۋدى قولعا الماق دەپ جازادى Qamshy.kz اقپارات اگەنتتىگى. 

ەلباسى «ۇلى دالانىڭ جەتى قىرى» ماقالاسىندا ۇرپاق تاربيەسىندە ولاردىڭ ساناسىنا اسەر ەتۋدەگى كينونىڭ ايرىقشا ءرولى ءسوز بولادى. سوندىقتان جاۋاپتى مەكەمەلەرگە قازاق تاريحىندا ءىز قالدىرعان وقيعالارمەن ولاردان تانىلعان تۇلعالار جايىندا فيلمدەر شىعارۋ تاپسىرىلعان-دى. راسىندا قازاق حالقىنىڭ تاريحىندا ءومىرى تۇتاس ءبىر كينوكارتيناعا ارقاۋ بولاتىن تۇلعالار جەتەرلىك.

–بۇل ارنايى جوبا اياسىندا قازاقستاندىق جازۋشىلاردىڭ شىعارماشىلىعى تاريحي فيلمدەر ءتۇسىرۋ جانە شىعارماشىل جاستاردى كينو الەمىنە تارتۋ، ۇزدىك سەنارييلەردى جازۋعا ىنتالاندىرۋ باعىتتارىندا جۇمىس اتقارىپ كەلەمىز. «ۇلى دالانىڭ جەتى قىرى» ماقالاسىنان تۋىنداعان مىندەتىن جۇزەگە اسىرۋدا اعىمداعى جىلى العا قويىلعان اۋقىمدى ءىس-شارالار جەتەرلىك. ماسەلەن بيىل جامبىل وبلىسى اكىمدىگىنىڭ مادەنيەت، ارحيۆتەر جانە قۇجاتتاما باسقارماسىنىڭ ۇيىمداستىرۋىمەن جاستار اراسىندا «ۇزدىك سەنارييلەر»، «جالىندى جاستىق شاق» بەينەروليكتەر بايقاۋى ۇيىمداستىرىلادى. سونداي-اق، مەركى اۋدانى اكىمدىگىنىڭ مۇرىندىق بولۋىمەن مەركى، اسپارا قالاشىعى، مەركى – 1،2،3،4،10 قورعاندارى مەن ساندىق، قاراقىستاق شاتقالى، بالبال تاستاردىڭ جايىندا تاريحي دەرەكتى فيلمدەر ءتۇسىرۋدى جوسپارعا ەنگىزدىك. سونىمەن قاتار اعىمداعى جىلى جۋالى اۋانى اكىمدىگىنىڭ دەمەۋشىلىك ەتۋىمەن شەرحان مۇرتازا اتامىزدىڭ «قىزىل جەبە» رومانى جەلىسىندە تۇرار رىسقۇلوۆ تۋرالى قىسقامەتراجدى ءفيلمىن ءتۇسىرۋدى قولعا الۋعا نيەت ەتىپ وتىرمىز، –دەيدى وبلىستىق «رۋحاني جاڭعىرۋ» جوبالىق ءوفيسىنىڭ جەتەكشىسى سەرىكبول بەرىكقوجا.

ايتا كەتۋ كەرەك اعىمداعى جىلى 125 جىلدىعى اتالىپ وتىلەتىن تۇرار رىسقۇلوۆتىڭ ساياسي قايراتكەر رەتىندە ءومىر جولى كوزى قاراقتى وقىرمانعا جاقسى تانىس. ويتكەنى ونىڭ عۇمىرنامالىق رومانى سانالاتىن شەرحان مۇرتازانىڭ «قىزىل جەبەسى» كەزىندە وقىرماندار تاراپىنان وڭ باعاسىن العان تۋىندى. اۋەلى پاتشا اكىمشىلىگىنەن كەيىننەن جەرگىلىكتى باي بولىستاردىڭ قىسىمىنا شىداماي بىردە قازىرگى الماتى قالاسىنىڭ ماڭىن، بىردە تۇركىستان وبلىسىنىڭ تۇلكىباس اۋدانىن مەكەن ەتىپ باس ساۋعالاعان وتباسىنان شىققان تۇرار كەڭەس وداعىن ورناتۋ ىسىنە بەلسەنە قاتىسادى. كوزىن اشقاننان تۇرمە تاربيەسىن كورگەن ول بۇل ىسكە جوعارى ساياسي ساۋاتتىلىقپەن جانە ىجداھاتتىلىقپەن كىرىستى. سونىڭ ارقاسىندا از ۋاقىتتا اۋليەاتا ۋەزدىك كەڭەسىنىڭ اتقارۋ كوميتەتى ءتوراعاسىنىڭ ورىنباسارىنان تۇركىستان اۆتونوميالى رەسپۋبليكاسىنىڭ دەنساۋلىق ساقتاۋ حالىق كوميسسارى، تۇركىستان ورتالىق اتقارۋ كوميتەتىنىڭ ءتوراعاسى قىزمەتتەرىنە دەيىن كوتەرىلدى. ال ءومىرىنىڭ سوڭعى ساتىنە دەيىن رەسەي فەدەراسياسى حالىق كوميسسارلارى كەڭەسى ءتوراعاسىنىڭ ورىنباسارى قىزمەتىن اتقارعان تۇلعا.