سپورت – ەل ساياساتىنىڭ ءبىر باعىتى. سوندىقتان ەلىمىزدە بۇقارالىق سپورتتى دامىتۋعا بارىنشا كوڭىل بولىنۋدە. جامبىل وبلىسىندا داڭقتى باپكەرلەر مەن سپورتشىلاردى دا دارىپتەۋ جولعا قويىلعان. وسىنداي ۇلكەن شارانىڭ ءبىرى «تاراز-ارەنا» سپورت كەشەنىندە كسرو-نىڭ سپورت شەبەرى باقىتجان تاشمەنوۆتى ەسكە الۋعا ارنالدى، دەپ جازادى Qamshy.kz اقپارات اگەنتتىگى. 

دوداعا 2002-2003 جىلدارى تۋىلعان قىرعىزستان، وزبەكستان جانە قازاقستان مەملەكەتتەرىنەن 500-گە جۋىق سپورتشى قاتىسىپ، كىل مىقتىنىڭ ىشىنەن شىن مىقتىنى انىقتادى.

ءتۋرنيردىڭ اشىلۋىنا وبلىس اكىمىنىڭ ءبىرىنشى ورىنباسارى بەكبولات ورىنبەكوۆ قاتىسىپ، سپورتشىلارعا ساتتىلىك تەلىدە.

- بۇگىن كونە تاراز شاھارىندا ءار مەملەكەتتەن كەلگەن سپورتشىلاردى قارسى الۋعا قۋانىشتىمىز. ءقازىردىڭ وزىندە ءبىر عانا جامبىل وبلىسىندا 2000-عا جۋىق ادام دزيۋدو سپورتىمەن اينالىسۋدا. ولار مەملەكەتتىك قولداۋدىڭ ارقاسىندا حالىقارالىق دودالاردا ب ا ق سىنىپ، جەڭىمپاز اتانۋعا مۇمكىندىك الۋدا. تولاعايلاردى تاربيەلەپ، كۇللى الەمگە تانىتۋدا جەرلەسىمىز باقىتجان تاشمەنوۆتىڭ سىڭىرگەن ەڭبەگى ەرەن.

سوندىقتان بۇگىن ايتۋلى ازاماتتى ەسكە الۋعا ءوتىپ جاتقان تۋرنيردە بارلىقتارىڭىزعا ساتتىلىك تىلەيمىن، -دەدى بەكبولات سەرىكبەك ۇلى.

اشىلۋ سالتاناتىندا دزيۋدو سپورتىنان ريو وليمپياداسىنىڭ كۇمىس جۇلدەگەرى ەلدوس سمەتوۆ تە ءسوز الىپ، جارىسقا قاتىسۋشىلارعا دەگەن ىزگى تىلەگىن جەتكىزدى.

بۇدان كەيىن ءتۋرنيردىڭ تۇندىگى ءتۇرىلىپ، ءبىرىنشى كۇنى ىرىكتەۋ كەزەڭدەرى ءوتتى. وندا 36 جامبىلدىق بالۋان ب ا ق سىنادى. ال جارىستىڭ ەكىنشى كۇنى مەدالدار جيىنتىعى ساراپقا سالىندى. وسى سىندا 60 كەلىدە قارسىلاستارىن قوعاشا جاپىرعان جامبىلدىق د.قايرات ۇلى تۋرنير جەڭىمپازى اتانسا، 55 كەلىدە بوزكىلەمگە كوتەرىلگەن ب.پەرنەبەك تە التىننان القا تاقتى.

قىزدار اراسىنداعى سىندا 63 كەلىدە كۇرەسكەن ا.ورىنباساروۆا كۇمىسپەن كۇپتەلسە، ا.اداسحان، ز.تۇرعىنباي جانە ا.جۇپايەۆا ءوز سالماق دارەجەلەرىندە قولا جۇلدەمەن قۋانتتى.

جالپى جارىستا وزبەكستان مەملەكەتىنىڭ بالۋاندارى ءبىر ساتى جوعارى تۇرعاندارى انىق اڭعارىلدى. سوندىقتان دا ولار جۇلدەلەردىڭ نەگىزگى جيىنتىعىن ەنشىلەرىندە اكەتتى.

نەگىزى بۇل 24-قىركۇيەكتە الماتى قالاسىندا وتەتىن حالىقارالىق تۋرنير الدىنداعى ىرىكتەۋ بولىپ تابىلادى. ال بۇل دوداعا كەزىندە مەملەكەت ماقتانىشى ەلدوس سمەتوۆتىڭ دە قاتىسقانىن ەسكەرسەك، تاراز تورىندەگى الاماننىڭ بالعىن بالۋاندارعا بەرەرى مول بولعانى انىق.