«Nur Otan» پارتياسى بايزاق اۋداندىق فيليالىنىڭ ۇيىمداستىرۋىمەن كوشپەلى قوعامدىق قابىلداۋ ءوتتى. جيىندا جامبىل وبلىستىق پوليسيا دەپارتامەنتى باستىعىنىڭ ورىنباسارى تەمىربەك ورازىمبەتوۆ، «Nur Otan» پارتياسى جامبىل وبلىستىق فيليالى قوعامدىق قابىلداۋ بولمەسىنىڭ مەڭگەرۋشىسى ءۇمىت يبرايموۆا، اۋداندىق پوليسيا ءبولىمىنىڭ باستىعى، پوليسيا پولكوۆنيگى اسىلحان زاۋربەكوۆ جانە پارتيانىڭ اۋداندىق فيليالى ءتوراعاسىنىڭ ءبىرىنشى ورىنباسارى شولپان بايتاقوۆا ازاماتتاردى جەكە قابىلداپ، مۇڭ-مۇقتاجدارىن تىڭدادى.

قابىلداۋعا ءبىرىنشى بولىپ كەلگەن سارىباراق اۋىلىنىڭ تۇرعىنى گۇلجامال قۋانىشيەۆا ەكى جىل بۇرىن جەرگىلىكتى پوليسيا بولىمىنە ۇرلانعان مالىنا قاتىستى ارىزدانعانىن، الايدا وسى ماسەلە بويىنشا تەرگەۋ امالدارى جۇرگىزىلىپ جاتقانى جايلى حابارسىز ەكەندىگىن، كومەك بەرۋىن ءوتىندى. تەمىربەك اسىلبەك ۇلى ارىزبەن جەكە تانىسىپ، ازاماتشانىڭ زاڭ جۇزىندە قۇقىقتارىن ءتۇسىندىرىپ، الداعى ۋاقىتتا ماسەلە بويىنشا ۋاجدەر تەكسەرىلىپ، باقىلاۋدا ۇستايتىنىن جەتكىزدى.

ودان سوڭ ديحان اۋىلدىق وكرۋگىنە قاراستى ايمانتوبە اۋىلىنىڭ تۇرعىنى قۇلانقادىر جۇمابايەۆ اۋىلعا قاراستى مال جايىلىمىنا ارنالعان جەردى زاڭسىز پايدالانىلىپ جاتقاندىعىن، ءتورت جىلدان بەرى مەملەكەتتىك ورگانداردىڭ تابالدىرىعىن توزدىرىپ، ادىلدىك تابا الماي جۇرگەنىن جەتكىزدى. اسىلحان ءازىمحان ۇلى ارىز يەسىن مۇقيات تىڭداپ، جاۋاپتى تۇلعالارعا جەرگە قاتىستى قۇجاتتاردى تەكسەرۋدى، GPS ولشەۋ تەحنولوگياسىن پايدالانۋ ارقىلى جەر زاڭ بويىنشا كىمگە تيەسىلى ەكەندىگىن جانە زەردەلەۋ جۇمىستارىن جۇرگىزۋدى تاپسىردى. بۇل ماسەلەگە قاتىستى اۋدان اكىمدىگى جەر قاتىناستارى ءبولىمىنىڭ باستىعى نۇرلان ورازىمبەتوۆ تۇسىنىكتەمە بەردى.

سەڭكىباي اۋىلىنان كەلگەن ساۋىتبەك سارسەنوۆ اعىمداعى جىلدىڭ ماۋسىم ايىندا ەكى باس بيەسىنىڭ قولدى بولعاندىعىن، قىلمىسكەرلەر ءتيىستى جازاسىن الۋ قاجەتتىگىن العا تارتتى. پوليسيا پولكوۆنيگى اسىلحان زاۋربەكوۆ جابىرلەنۋشىنىڭ شاعىمى نازارعا العاندىعىن، قازىرگى ۋاقىتتا زەردەلەۋ جۇمىستارى جۇرگىزىلىپ جاتقاندىعىن بايان ەتتى. ءوز كەزەگىندە تەمىربەك اسىلبەك ۇلى اۋىلدا تىركەلگەن مال ۇرلىعىنا قاتىستى دەرەكتەردى تەكسەرۋدى تاپسىرىپ، شاعىم بويىنشا جۇرگىزىلىپ جاتقان جۇمىستاردى ءوز باقىلاۋىندا ۇستايتىندىعىن ايتتى.

№3 بايزاق كوللەدجىنىڭ جۇمىسشىسى اباي ميرمانوۆ اتالعان وقۋ ورداسىندا ءتارتىپتى قاداعالايتىن پوليسيا ينسپەكتورىنىڭ جۇمىسىنا باقىلاۋدى كۇشەيتۋىن سۇراندى. بۇل ماسەلە بويىنشا ءتيىستى زەردەلەۋ جۇمىسى جۇرگىزىلەتىندىگى ايتىلدى.

ازاماتتاردى مازالاعان ماسەلەلەردى مۇقيات تىڭداعان تەمىربەك ورازىمبەتوۆ ولاردىڭ وتىنىشتەرى اياقسىز قالمايتىندىعىن جانە الداعى ۋاقىتتا مىندەتتى تۇردە شەشىمىن تاباتىندىعىن مالىمدەدى.