قارتتارعا قايىرىمدىلىق كومەك بەرۋشىلەردىڭ سانى جىلدان-جىلعا كوبەيىپ، الەۋمەتتىك كومەك الۋشىلار سانى دا ارتا تۇسۋدە. وسىنىڭ ءوزى قوعامىمىزدا قارتتارعا دەگەن قامقورلىقتىڭ، ولارعا دەگەن جاناشىرلىقتىڭ ارتا تۇسكەنىن ايعاقتايدى.

قارتتاردى قادىرلەۋ ايلىعى اياسىندا، وبلىس بويىنشا ءتۇرلى شارالار وتكىزىلۋدە. يگى شارانى العاشقىلار قاتارىندا “Nur Otan” پارتياسى بايزاق اۋداندىق فيليالىندا اۋداندىق ىسكەر ايەلدەر قاۋىمداستىعىنىڭ ۇيىمداستىرۋمەن پارتيالىق “ارداگەرلەردى ارداقتايىق” جوباسى اياسىندا، ۇرپاقتار ساباقتاستىعى مەن ديالوگ الاڭىن قامتاماسىز ەتۋ ماقساتىندا اۋدانىمىزداعى ەڭبەك ارداگەرلەرىمەن كەزدەسۋ وتكىزىلدى.

اتالمىش كەزدەسۋدە اعا بۋىن وكىلدەرىنە ءتيىستى قۇرمەتتەرىن كورسەتكەن ۇيىمداستىرۋشىلار اۋداننىڭ دامۋى مەن قۇرىلۋىنا وراسان زور ەڭبەك سىڭىرگەن قارتتارعا العىستارىن ءبىلدىردى. ءبىر مەزەت بولسا دا كۇندەلىكتى كۇيبەڭ تىرلىكتەن ارىلىپ، بىر-بىرىمەن شۇيىركەلەسە كەتكەن قارتتار مارە-سارە بولىستى. اق داستارحان باسىندا كەلەلى اڭگىمەلەر قوزعالىپ، ىزگى تىلەكتەر ايتىلدى.

بۇگىندە اتا جولىن جالعاپ كەلە جاتقان اقساقال اتالارىمىز بەن اق جاۋلىقتى اجەلەرىمىز ەكەنى انىق. “قاريا” دەگەن ءسوز ەلدىڭ باسى بولۋ، اقىلىن ايتار دانا بولۋ، ەل تورىندە قۇرمەتكە بولەنۋ، اس بەرگەندە نەمەرەلەرىنىڭ ۇلەسىن بولەر قامقورشىسى. شاڭىراقتىڭ شاتتىعىن ساقتاپ، بىرلىگىن بەكەم ەتۋگە اقىلىن ايتار ەلى مەن جەرىنىڭ كەڭەسشىسى.

“Nur Otan” پارتياسى اۋداندىق فيليالى ءتوراعاسىنىڭ ورىنباسارى شولپان بايتاقوۆا، اۋداندىق ىسكەر ايەلدەر قاۋىمداستىعىنىڭ ءتورايىمى، جەكە كاسىپكەر سانيا التايەۆا وزدەرىنىڭ جاستىق ءداۋىرىن كەلەشەك ءۇشىن قيىن ءومىردىڭ سىنىنا سالعان، بۇگىنگى وسى باقىتتى زاماندى سىيلاعان قاريالارعا ريزاشىلىقتارىن ءبىلدىردى. “ۇلكەندى سىيلاۋ، ولارعا قۇرمەت كورسەتۋ – اتا-بابادان كەلە جاتقان سالتىمىز. سىزدەردىڭ ومىرلىك تاجىريبەلەرىڭىز بەن اقىل-كەڭەستەرىڭىز، ءتالىم-تاعىلىمدارىڭىزدىڭ ءبىز ءۇشىن ورنى بولەك. سەبەبى، ءارقايسىڭىزدىڭ اۋداننىڭ وسىپ-وركەندەۋىنە قوسقان ۇلەستەرىڭىز بەن ەڭبەكتەرىڭىز ەرەن. تالاي جاستى تاربيەلەپ، ءىزباسارلار وسىردىڭىزدەر. بۇگىن، ەڭبەكتەرىڭىزدىڭ زەينەتىن كورىپ وتىرعان شاقتا دا سىزدەر ۇرپاقتارىڭىزعا يگىلىك پەن ىزگىلىكتىڭ، پايىم-پاراساتتىڭ ۇلگىسىن تانىتۋدان جالىققان ەمەسسىزدەر” - دەي كەلە، ارداگەرلەردى، تىل ەڭبەككەرلەرىن، اياۋلى اجەلەردى، جالپى، زەينەتكەرلەردى مەرەكەلەرىمەن قۇتتىقتاپ، ۇزاق عۇمىر تىلەدى.

مەرەكەنىڭ مۇنشالىقتى ءماندى وتكەنىنە قارتتار دا ريزا بولدى. قازىنا قارتتاردىڭ اتىنان ءسوز العان اۋداندىق ارداگەرلەر كەڭەسىنىڭ ءتوراعاسى كەمەلبەك بەسپايەۆ شارا ۇيىمداستىرۋشىلارىنا العىس ايتىپ، اق باتاسىن بەردى.