بايزاق اۋدانى سارىكەمەر اۋىلىنداعى №2 بالالار مەن جاسوسپىرىمدەر سپورت مەكتەبى جانىنان شاعىن فۋتبول الاڭى پايدالانۋعا بەرىلدى. جاڭا الاڭنىڭ اشىلۋىنا وراي، كىشى فۋتبولدان جامبىل وبلىسىنىڭ اۋىل جاسوسپىرىمدەرى جازعى ويىندارىنا ارنالعان فۋتبول ءتۋرنيرى ۇيىمداستىرىلدى.

زامان تالابىنا ساي سالىنعان شاعىن فۋتبول الاڭىنىڭ سالتاناتتى اشىلۋ راسىمىنە اۋدان اكىمىنىڭ ورىنباسارى ءداۋىر داۋلەتوۆ، اۋدان اكىمدىگى دەنە شىنىقتىرۋ جانە سپورت ءبولىمىنىڭ باسشىسى ءادىلحان وماروۆ، №2 بالالار مەن جاسوسپىرىمدەر سپورت مەكتەبىنىڭ ديرەكتورى اسلان ايتبەكوۆ قاتىستى.

ءداۋىر رىسباي ۇلى قۇتتىقتاۋ سوزىندە: “سىزدەردى بۇگىنگى اشىلىپ وتىرعان شاعىن فۋتبول الاڭىنىڭ اشىلۋىمەن جانە كىشى فۋتبولدان جامبىل وبلىسىنىڭ اۋىل جاسوسپىرىمدەرى جازعى ويىندارىنا ارنالعان فۋتبول تۋرنيرىمەن قۇتتىقتايمىن. حالقىمىز ەجەلدەن دەنساۋلىقتىڭ ءقادىرىن جەتە ءتۇسىنىپ، ونى باستى بايلىققا بالاعان. وسى قاعيدانى بەرىك ۇستانعان مەملەكەتىمىز ەل حالقىنىڭ ويى سەرگەك، دەنى ساۋ بولۋى ءۇشىن قولدا بار مۇمكىندىكتىڭ بارلىعىن جاساۋدا” - دەي كەلە، دەنە شىنىقتىرۋ مەن سپورتتىڭ دامۋىنا جاعداي جاساۋ ماقساتىندا، اعىمداعى جىلى “اۋىل - ەل بەسىگى” جوباسى اياسىندا، جالپى قۇنى 21 ميلليون 107 مىڭ تەڭگەنى قۇرايتىن ەكى كىشى فۋتبول الاڭى ەل يگىلىگىنە بەرىلگەنىن اتاپ ءوتتى. اۋدان اۋماعىندا وسىنداي قالىپتاعى قىزىل جۇلدىز، جەتىباي، بايزاق، ديحان، سارىكەمەر اۋىلدارىندا كىشى فۋتبول الاڭشالارى سالىنعانىن، كەلەر جىلى جامبىل وبلىسى سپورت نىساندارىنىڭ قۇرىلىسىن جۇرگىزۋ كارتاسىنا سايكەس، تۇيمەكەنت جانە بۋرىل اۋىلدارىندا دەنە شىنىقتىرۋ - ساۋىقتىرۋ كەشەندەرىن سالۋ جوسپارلانۋدا ەكەنىن جەتكىزدى. سونداي-اق، تۋرنير قاتىسۋشىلارىنا ساتتىلىك تىلەدى.

سونىمەن، قازاقستان رەسپۋبليكاسىنىڭ مەملەكەتتىك گيمنى شىرقالىپ، ۇلتتىق دارەجەدەگى تورەشى اسحات ابدامبايەۆ جارىستىڭ ەرەجەسىمەن تانىستىرعان سوڭ، 2003-2004 جىلى تۋىلعان جاسوسپىرىمدەر اراسىندا شاعىن فۋتبولدان تۋرنير باستالىپ تا كەتتى. شۋ، سارىسۋ، جامبىل، مويىنقۇم، قورداي، مەركى، ت.رىسقۇلوۆ، جۋالى جانە ءبىزدىڭ اۋداننان جاساقتالعان كوماندالار ەكى توپقا ءبولىنىپ، ويىن ورنەگىن قىزدىردى. سارىكەمەر اۋىلىنداعى №2 بالالار-جاسوسپىرىمدەر سپورت مەكتەبىنىڭ جاتتىقتىرۋشىلارى الەكسەي پاي، ەرمەك ديحانوۆ، ەرمەك تاليپوۆ باۋلىعان ءبىزدىڭ اۋداننىڭ كومانداسى قارسىلاستاردى شاڭ قاپتىرىپ، جۇلدەلى ءبىرىنشى ورىننان كورىندى.

جەڭىمپازدار مەن جۇلدەگەرلەر ۇيىمداستىرۋشىلار تاعايىنداعان ديپلوم، كۋبوكتارمەن ماراپاتتالسا، جەڭىمپاز كوماندا قازاقستان رەسپۋبليكاسىنىڭ اۋىل جاسوسپىرىمدەرىنىڭ جازعى ويىندارىنا بەرىلەتىن جولداماعا يە بولدى.