ءتىلسىز جاۋدىڭ قاي تۇستان تاپ بەرەتىنىن دە تاپ باسىپ ايتۋ مۇمكىن ەمەس. مۇنداي ساتتە بۇقارا بار سەنىمدى قۇتقارۋشىلارعا ارتىپ، اتالمىش سالا ماماندارىنان كومەك كۇتەتىنى داۋسىز. ال بۇل بەيبىت كۇننىڭ باتىرلارىنىڭ كوزسىز ەرلىگىن سوزبەن ايتىپ جەتكىزۋ مۇمكىن ەمەس. مۇنى مەملەكەت باسشىسى قاسىم-جومارت توقايەۆ تا حالىققا ارناعان جولداۋىندا باسا ايتقانى بەلگىلى. بۇگىندە جامبىل وبلىستىق توتەنشە جاعدايلار دەپارتامەنتىنىڭ دە حالىق ءۇشىن ەتكەن ەڭبەگى مەن ەرلىگى ۇشان-تەڭىز دەپ جازادى Qamshy.kz اقپارات اگەنتتىگى. دەپارتامەنت باسشىسى باعدات دانيلوۆتىڭ سوزىنە سۇيەنسەك، سالا بويىنشا ەسەپتى كەزەڭدە بارلىق باعىتتار بويىنشا وڭ ديناميكا ساقتالىپتى. تەك ءورت وقيعاسى بويىنشا بىلتىرعى جىلعا قاراعاندا 30-35 فاكتى ارتىق ورىن العان. - ەستەرىڭىزدە بولسا جىل باسىندا №9 ىقشاماۋدانىندا گاز جارىلىسى تىركەلدى. سونداي-اق №5 ىقشاماۋدانىنداعى كوپقاباتتى ءۇيدىڭ شاتىرى ورتكە وراندى. بۇل ەكى وقيعادا قاۋىپسىزدىك شارالارى ساقتالماعانىنان ورىن الىپ وتىر. ماسەلەن №5 ىقشاماۋدانىنداعى جاعدايدا مىسالعا الساق، اتالمىش ءۇي جاڭعىرۋدان وتكەن كەزدە قۇرىلىسشىلار ونىڭ شاتىرىنداعى بۇرىنعى قارا قاعازدى سىپىرىپ الىپ تاسماعان. سونىڭ سالدارىنان ءورت تەز ءورشىپ، ونى ءسوندىرۋ قيىندىققا سوقتى. ودان بولەك، شومىلۋ ماۋسىمىنىڭ دا وزىندىك قيىندىقتارى بولدى. اسىرەسە جاسوسپىرىمدەردىڭ سۋعا باتۋ فاكتىلەرى جانىمىزعا باتتى. وبلىس اكىمى اسقار مىرزاحمەتوۆتىڭ قاۋلىسى بويىنشا وڭىردەگى ەڭ ءقاۋىپتى دەگەن 15 سۋ ايدىنىندا ساقتىق شارالارىن كۇشەيتسەك تە، ادامداردىڭ قازا تابۋ وقيعالارىنىڭ الدىن الا المادىق. ءتىپتى جاز مەزگىلىندە باسسەيندەرگە دەيىن ءبىلىم بەرۋ سىندى سالالاردىڭ ماماندارىن باقىلاۋعا جۇمىلدىرساق تا، قايعىلى وقيعالار تىركەلدى. ارينە ءبىز قانشا جەردەن باقىلاۋدى كۇشەيتىپ، جان سالىپ جۇمىس جاساپ جاتساق تا، ادام ءولىمى ورىن العاننان كەيىن سىننىڭ استىندا قالىپ جاتامىز. ول ورىنسىز دەي المايمىن. سەبەبى ادام ءومىرىن اجالدان اراشالاۋ ءبىزدىڭ مىندەتىمىز. ءبىراق قارا حالىقتا ءبىز دە ەت پەن سۇيەكتەن جاراتىلعانىمىزدى، قىزمەتىمىزدىڭ قانشالىقتى قيىن دا، جاۋاپكەرشىلىك جۇگى اۋىر ەكەنىن تۇسىنسە ەكەن دەيمىن، - دەيدى باعدات جۇما ۇلى.

قالاي دەگەندە دە توتەنشە جاعدايلار دەپارتامەنتىنىڭ ەڭبەكتەرى ءسوزسىز ەرەن. ەرلىكتەرى ءوز الدىنا ءبىر توبە. بۇنى بۇگىندە قالىڭ بۇقارا كوزبەن كورىپ، تىرلىكتەرىنە مىڭ العىس ايتۋدا. العىس ارقالاعاندار الىسقا باراتىندىعى تاعى ايقىن.