مەملەكەت باسشىسى قاسىم-جومارت توقايەۆ حالىققا ارناعان تۇڭعىش جولداۋىندا توتەنشە جاعدايلار قىزمەتكەرلەرىنىڭ ەرەن ەڭبەگىن ەرەكشە اتاپ وتكەنى بەلگىلى. جانە سالانى قولداۋ ءۇشىن مامانداردىڭ ايلىق جالاقىسىن ءوسىرىپ، ادال ەڭبەكتەرىنىڭ ءادىل باعاسىن بەرۋدى تاپسىردى. بۇل باعىتتا جامبىل وبلىسىندا ءبىرقاتار جۇمىستار جۇيەسىن تاۋىپ ۇلگەردى، دەپ جازادى Qamshy.kz اقپارات اگەنتتىگى.  وبلىستىق توتەنشە جاعدايلار دەپارتامەنتىنىڭ باستىعى باعدات دانيلوۆتىڭ ايتۋىنشا، قازىرگى تاڭدا بۇل جۇمىستارمەن جاۋاپتى تۇلعالار ءجىتى اينالىسۋدا ەكەن.

- پرەزيدەنت جولداۋدا ازاماتتىق قورعاۋ سالاسىنا ايرىقشا كوڭىل بولگەنىن ەل ەستىدە. بۇل ءبىزدى جىگەرلەندىرگەنى انىق. ءقازىر دەپارتامەنتتىڭ ەسەپشى ماماندارى نۇر-سۇلتان قالاسىندا بيۋدجەتتى ناقتىلاۋ ماسەلەسىمەن ءجۇر. بۇيىرتسا 2020 جىلدىڭ 1-قاڭتارىنان باستاپ توتەنشە جاعدايلار قىزمەتى ماماندارىنىڭ ايلىق جالاقىسى وسەدى دەپ كۇتىلۋدە. بۇل جولداۋدان كەيىن قولعا الىنىپ وتىرعان ەڭ باستى جايت. بۇدان بولەك تە سالا ماماندارىنىڭ جۇمىسىن جۇيەلەپ، وڭتايلاندىرۋ باعىتىندا كەلەر جىلعا بىرنەشە جوبالارىمىزدى ازىرلەپ وتىرمىز. ونىڭ ءبارى كەزەڭ-كەزەڭىمەن جۇزەگە اساتىن بولادى، -دەيدى باعدات جۇما ۇلى.

ءيا، بۇل ءسوز جوق باس بارماقپەن باعالاۋعا تۇرارلىق دۇنيە. جولداۋ جۇكتەگەن مىندەتتىڭ ءمىنسىز ورىندالۋ بارىسىن ايعاقتاپ تۇر. جالپى تەك توتەنشە جاعدايلار قىزمەتىنىڭ ماماندارىنىڭ عانا ەمەس، كەلەر جىلدان قورىقشىلار مەن ورمانشىلاردىڭ دا ايلىق جالاقاسى وسەدى دەپ كۇتىلۋدە. وسى تاڭعا دەيىن تەحنيكالىق قىزمەت ماماندارىنىڭ بەدەلىمەن تەڭەستىرىلىپ كەلگەن تابيعات جاناشىرلارى ەندى ءوز الدىنا ماماندىق رەتىندە قارالماق. ارينە قاي سالانىڭ ماماندارىنىڭ ايلىق جالاقىسى قانشالىقتى وسەتىنىن ءقازىر بولجاۋ قيىن. سەبەبى بۇل ماسەلە ۇكىمەتتە پىسىقتالىپ، ەسەپ-قيسابى جاسالۋدا. دەسە دە، سەڭ قوزعالعانى بەلگىلى.

- جاسىراتىنى جوق، قازىرگى ءبىزدىڭ ايلىق جالاقىمىز تەحنيكالىق مامانداردىڭ الاتىنان دا از بولىپ تۇر. الايدا ءبىزدىڭ جۇمىستىڭ اۋىرلىعىن اركىم بىلەدى. ماسەلەن مويىنقۇم اۋدانىندا ءبىر قورىقشىعا 22 مىڭ گەكتار جەردەن بەلگىلەنىپ بەرىلگەن. ەندى وزدەرىڭىز ويلاپ قاراڭىزدار ءبىر ادام وسىناۋ اۋماقتى ارالاپ، كۇندەلىكتى قورعاۋى ءتيىس. وعان تاعى اپتا سايىن ورىن الىپ جاتقان ءورت وقيعالارىن قوسىڭىز.

سوندىقتان مەملەكەت باسشىسىنىڭ «قورىقشىلاردى قامقورلىققا الىپ، ايلىق جالاقىسىن كوتەرۋ قاجەت» دەگەن ۇسىنىسىن قوس قولداپ قولدايمىن. ودان بولەك تاعى ءبىر ايتا كەتەرلىگى، ەدەن جۋۋشى، قاراۋىلدارعا ەمدەۋ-ساۋىقتىرۋ تولەمى تولەنىپ جاتسا، بىزگە مۇنداي تولەم مۇلدە قارالماعان.

ۇكىمەت وسى جاعىن دا رەتتەپ بەرسە، نۇر ۇستىنە نۇر بولار ەدى، -دەيدى مويىنقۇم ورمانداردى جانە جانۋارلار دۇنيەسىن قورعاۋ مەملەكەتتىك مەكەمەسىنىڭ ورمان كۇتۋشىسى ەستاي تىلەۋجانوۆ.

ءيا تىلەك ورىندى. بۇيىرتسا قورىقشىلاردىڭ قالاۋى ورىندالاتىن كۇن الىس ەمەس.