جەمقورلىق – ىندەت، جويۋ –مىندەت. بۇگىندە بۇل قاعيدات تاۋەلسىز مەملەكەتىمىزدىڭ باستى ۇرانىنا اينالدى. الايدا سىبايلاس جەمقورلىققا قانشا قارسى توسقاۋىل قويساقتا، ءتۇپ تامىرىنا بالتا تۇسپەۋدە. ءتىپتى جەڭ ۇشىنان جالعاسقان جەمقورلىق ەڭ جاۋاپتى سالالاردىڭ دا تامىرىنا باتىپ وتىر، دەپ جازادى Qamshy.kz اقپارات اگەنتتىگى. راسىندا قازىرگى تاڭدا جەمقورلىق دەگەن ىندەتتىڭ دەندەپ كىرمەگەن جەرى قالمادى. بۇل كەسەل جامبىل وبلىستىق توتەنشە جاعدايلار سالاسىن دا اينالىپ وتپەي، جىل ىشىندە مەركى اۋدانىندا ءبىر مامان قۇرىقتالدى. ادام ومىرىنە جاۋاپتى سالا بۇعان قالاي جول بەرىپ قويدى؟ بۇل ساۋالعا جاۋاپ تابۋ ءۇشىن وبلىستىق توتەنشە جاعدايلار دەپارتامەنتى باستىعى باعدات دانيلوۆتى تىلگە تارتقان ەدىك.

- جەمقورلىق دەگەن قازىرگى تاڭدا ەڭ ۇلكەن كەسەل بولىپ تۇرعانى اقيقات. بۇعان مەملەكەت باسشىسى قاسىم-جومارت توقايەۆتىڭ ءوزى جۇمىلا سوققى جاساۋعا شاقىرۋدا. راس، دەپارتامەنتكە قاراستى مەركى اۋدانىنداعى بولىمىمىزدە پارا الۋ فاكتىسى بويىنشا ءبىر وقيعا تىركەلدى. بۇل بۇكىل قۇرىلىم ءۇشىن تاڭبا بولعانى داۋسىز. جانە بارىمىزگە اۋىر سوقتى. اتالعان دەرەك بويىنشا ۇستالعان مامان جۇمىستان بوساتىلىپ، ونىڭ تىكەلەي باسشىسى قىزمەتىنەن تومەندەتىلدى. سونداي-اق سالا ماماندارىمەن تولىقتاي تۇسىندىرمە جۇمىستارى جۇرگىزىلدى. ودان بولەك، ءقازىر دۇيسەنبى سايىن ساعات 17.00-دە ەلىمىزدىڭ ىشكى ىستەر ءمينيسترى ەرلان تۇرعۇمبايەۆتىڭ قاتىسۋىمەن سەلەكتورلىق رەجيمدە كەڭەس وتەدى. وسى جيىندا اپتا ىشىندە بولعان وقيعالار زەردەلەنىپ، الەۋمەتتىك جەلىلەر مەن باسىلىمدارعا شىققان ماقالار مەن ۆيدەولارعا قاتىستى ءارقايسىمىزدان جەكە-جەكە تۇسىنىكتەمە الىنادى. سونىمەن قاتار جەمقورلىق فاكتىلەرى بويىنشا دا جاۋاپ بەرەمىز. ءبىر سوزبەن ايتقاندا ءقازىر سىبايلاس جەمقورلىق جايتتارى مينيسترلىكتەن باستاپ، وڭىرلىك دەپارتامەنتتەردىڭ ءجىتى باقىلاۋىندا تۇر، - دەيدى باعدات جۇما ۇلى.

ارينە بايىبىنا بارماي بايبالام سالۋدان اۋلاقپىز. الايدا جەمقورلىق قۇرتى قۇتقارۋشىلار سىندى قۇرىلىمنىڭ ءوزىنىڭ سۇيەگىنە ءتۇسىپ، قانىن قويۋلاندىرىپ جاتقانى ويلاندىرادى. ءبىر قىرىنان باعدات جۇما ۇلىنىڭ ءسوزىن ورىنسىز دەي الماسپىز. سەبەبى دەپارتامەنت باسشىسىنىڭ ءوزى تىكەلەي ۇيىتقى بولىپ، بۇگىندە بايزاق اۋدانىندا جەمقورلىققا قارسى ءتۇرلى جيىندار وتكىزگەنىن كوز كوردى. سونداي-اق تاراز قالاسىنداعى جەڭىس ساياباعىندا «جولدا قابىلداۋ» شاراسىن ۇيىمداستىرىپ، تۇرعىنداردى ويلاندىرعان سان ساۋالعا تىكەلەي جاۋاپ بەردى. بۇل دەپارتامەنت باستىعىنىڭ اشىقتىق ءپرينسيپىن ۇستاناتىنىن ايعاقتايدى. سول سەبەپتى مەركى اۋدانىنداعى كەلەڭسىز ءبىر كورىنىس سالادا سوڭعى سىبايلاستىق فاكتىسى بولادى دەپ سەنەمىز.