مەملەكەتىمىزدىڭ ۇستانعان باسىم باعىتتارىنىڭ ءبىرى – ساپالا كادر ساياساتى ەكەنى بەلگىلى. كادردان ءقادىر قاشپاس ءۇشىن ۇكىمەت ءتۇرلى مەملەكەتتىك باعدارلامالاردى جانداندىرىپ، بۇل باعىتتاعى باقىلاۋ جۇمىستارىن جىلدا كۇشەيتۋدە. اسىرەسە ادام ومىرىمەن تىكەلەي بايلانىستى سالالاردا كادردىڭ ءبىلىمى مەن بىلىكتىلىگى ماڭىزدى دەپ جازادى Qamshy.kz اقپارات اگەنتتىگى. جاسىراتىنى جوق، بۇگىندە كادر تاپشىلىعى بارلىق سالادا سەزىلۋدە. ال توتەنشە جاعدايلار قىزمەتىنىڭ ماماندارى كوكشەتاۋ قالاسىندا عانا وقىتىلاتىنىنان ەل حاباردار. جامبىل وبلىسىندا ءبىر جىلدارى ءبىرلى-جارىم كوللەدجدەر قۇتقارۋشى مامانداردى وقىتۋدى باستاپ ەدى، الايدا جەمىسىن كورمەدىك. ءقازىر بۇل ماسەلە توتەنشە جاعدايلار سالاسىندا قالاي شەشىمىن تابۋدا؟

- ازىرگە دەپارتامەنتتە كادر ماسەلە بويىنشا قيىندىق جوق. ءبىز ماماندار ساپىن جاڭا كادرلارمەن قالاي تولىقتىرىپ جاتىرمىز دەيتىن بولساڭىزدار، ىرىكتەۋدى ەرتەدەن باستايمىز. ياعني مەكتەپتى بىتىرگەلى جاتقان تۇلەكتەرمەن ۇبت سىناعىنا دەيىن اڭگىمەلەسۋ جۇرگىزەمىز. ۇمىتكەرگە قويىلاتىن بويى، دەنساۋلىعى سىندى تالاپتاردىڭ ءبارىن تەكسەرىپ، ودان كەيىن وزىمىزدەن ارنايى سىناقتان وتكىزەمىز. جانە ولاردىڭ اتا-انالارىنىڭ دا كەلىسىمىن الىپ، كوكشەتاۋ تەحنيكالىق ينستيتۋتىنا جولدايمىز. وسى تۇلەكتەر اتالعان وقۋ ورنىندا تەگىن ءتورت جىل وقىپ، ديپلومىن قولىنا العاننان كەيىن بىزگە قايتا ورالادى. سول كەزدە مەن قانشا مامان جولداعان بولساق، سونشا مامانعا دەپارتامەنتتەن ورىن دايىنداپ وتىرامىن. مەملەكەت جاس مامانداردى ءتورت جىل تەگىن وقىتىپ، شاكىرت اقىمەن قامتاماسىز ەتكەننەن كەيىن ولار بەس جىل سالادا قىزمەت ەتۋگە مىندەتتى. ەگەر باس قا جولدى تاڭدايتىن بولسا، ءتورت جىلعا كەتكەن قارجىنى مەملەكەتكە قايتارۋى ءتيىس. مىنە كوكشەتاۋ تەحنيكالىق ينستيتۋتىندا ءبىلىم الۋدىڭ ەرەكشەلىگى وسىندا. وسى تالاپ پەن سەنىم ۇدەسىنەن شاققان ماماندار ءبىزدىڭ قاتارىمىزعا قوسىلادى. جانە ولار جۇمىستى قايدان تابامىن دەپ قينالمايدى. جولدامامەن بارعان جاس ماماندارعا بىزدە ءاردايىم ورىن دايىن. سونداي-اق ولاردىڭ جەكە ىستەرى قۇپيا كۇيى ساقتالادى، - دەيدى جامبىل وبلىستىق توتەنشە جاعدايلار دەپارتامەنتىنىڭ باستىعى باعدات دانيلوۆ.

قالاي الىپ قاراساڭ دا قيىن دا جاۋاپكەرشىلىگى جوعارى سالادا بىلىكتى ماماندار جۇمىس جاساعانى ابزال. ونى دەپارتامەنت باسشىسى دا ايتىپ وتىر. ەندەشە قۇتقارۋشىلارىمىزدىڭ قاتارى قىراعى قىزمەتكەرلەرمەن تولىعا بەرسىن دەپ تىلەيىك.