تۇرعىنداردى تازا اۋىزسۋمەن قامتۋ باعىتىندا ەلدى مەكەندەردە دە ەڭسەرىلگەن جۇمىس كوپ. ماسەلەن جامبىل وبلىسى شۋ اۋدانى شۋ قالاسى بويىنشا قازىرگى تاڭدا 7،0 مىڭنان استام حالىق تۇراتىن «قوسقۇدىق» القابىنىڭ سۋمەن قامتۋ جۇيەلەرى قۇرىلىس جوباسى ازىرلەنىپ، ساراپتاما قاراۋىنا تاپسىرىلىپ وتىر. جوبانىڭ قۇنى شامامان 300-350،0 ميلليون تەڭگەنى قۇرايدى. جوبا تولىقتاي ناقتى ىسكە اسىرىلعان جاعدايدا قالا تۇرعىندارىنىڭ 80 پايىزى ورتالىقتاندىرىلعان سۋ قۇبىر جۇيەسىنىڭ يگىلىگىن كورەتىن بولادى، دەپ جازادى Qamshy.kz اقپارات اگەنتتىگى. بۇدان بولەك، ءبىرقاتار اۋىلدىق ەلدى مەكەندەردە بيىل جۇزەگە اسىرىلاتىن، قارجىسى ءبولىنىپ قويىلعان 8 جاڭا جوبا بويىنشا مەردىگەرلەر انىقتالىپ، جۇمىستارى باستالۋدا. ولاردىڭ قاتارىندا بايزاق اۋدانىنداعى تالاس، سارىكەمەر، جۋالى اۋدانىنداعى قاراساز، تالاس اۋدانىنداعى قاسقابۇلاق، مايتوبە، سارىسۋ اۋدانىنداعى يگىلىك، ءوندىرىس، شۋ اۋدانىنداعى مويىنقۇم، مويىنقۇم اۋدانىنداعى قىلىشباي اۋىلدارى بار.
وتكەن جىلى رەسپۋبليكالىق بيۋدجەت قاراجاتى ەسەبىنەن جۇمىستارى باستالعان سۋمەن قامتۋ نىساندارى قورداي اۋدانىنىڭ قاسىق، تالاس اۋدانىنىڭ ەسەيحان، سارىسۋ اۋدانىنىڭ ارىستاندى جانە قىزىلديحان، شۋ اۋدانىنىڭ اباي اۋىلدارىندا 2019 جىلدىڭ سوڭىندا پايدالانۋعا بەرىلىپ، اتالعان اۋىلدار تۇرعىندارى تازا اۋىز سۋدى پايدالانۋعا قول جەتكىزەتىن بولادى.
سونىمەن قاتار، وبلىستىق بيۋدجەتتەن مويىنقۇم اۋدانىنىڭ 2017 جىلى باستالعان وتپەلى 2 جوباسىنا (بۋرىلبايتال، ميرنىي، قياقتى ەلدى مەكەندەرى) بيىل 596،4 ميلليون تەڭگە قاراستىرىلدى، نىسان جۇمىستارى جىل سوڭىندا اياقتالىپ، پايدالانۋعا بەرىلەدى. جوبالار بويىنشا پايدالانىلاتىن سۋ كوزى – بالقاش كولى، سۋ قۇبىر جەلىسى ارقىلى اتالعان ەلدى مەكەندەرگە تازالانعان اۋىزسۋ جەتكىزىلەتىن بولادى.
وسى جۇمىستار جۇزەگە اسىرىلعاننان كەيىن، جىل سوڭىنا قاراي اۋداندارداعى 209 اۋىل تۇرعىندارى ءۇشىن ورتالىقتاندىرىلعان سۋ پايدالانۋ مۇمكىندىگى تۋماق. وسى مەرزىم ىشىندە وبلىس بويىنشا تۇرعىنداردىڭ اۋىزسۋمەن قامتىلۋى كورسەتكىشىن 56،0 پايىزعا جەتكىزۋ كوزدەلۋدە.
بۇدان باسقا، سالالىق مينيسترلىككە 2020-2022 جىلدارداعى رەسپۋبليكالىق بيۋدجەتتەن قارجى بولۋگە 5 اۋداننىڭ 14 اۋىلدىق ەلدى مەكەنىنە جاڭا سۋ قۇبىر جۇيەلەرى قۇرىلىسىن سالۋ ءۇشىن 7090،2 ميلليون تەڭگەگە وتىنىمدەر تاپسىرىلدى.
وبلىستا اۋىز سۋمەن قامتىلماعان ەلدى مەكەندەردى 2020-2022 جىلدارى اۋىز سۋمەن قامتۋ جوسپارى ازىرلەنگەن، جەرگىلىكتى بيۋدجەت قاراجاتى ەسەبىنەن جىل سايىن جوبالىق-سمەتالىق قۇجاتتامالار ازىرلەنىپ، ساراپتاما قورىتىندىلارى الىنعان سوڭ، قۇرىلىس-مونتاج جۇمىستارىنا قاجەتتى قارجى قاراستىرۋ ءۇشىن رەسپۋبليكالىق بيۋدجەتكە ۇسىنۋ جوسپارلانۋدا. سونىمەن قاتار، حالىقارالىق قارجى ۇيىمدارى، مەملەكەتتىك-جەكەمەنشىك ارىپتەستىك، كوممۋنالدىق كاسىپورىندار ەسەبىنەن، باسقا دا كوزدەردەن قارجى ىزدەستىرىلمەك.
وڭىرىمىزدەگى ەلدى مەكەندەردى اۋىز سۋمەن قامتۋ ءىسى وبلىس اكىمىنىڭ تۇراقتى باقىلاۋىندا، وسى ماسەلە بويىنشا جيىندار ءجيى وتكىزىلىپ، مۇددەلى تاراپتارعا تيىسىنشە تاپسىرمالار جۇكتەلۋدە.
