ەلباسى نۇرسۇلتان نازاربايەۆ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى حالىققا جولداۋىندا: «كاسىپكەرلىكتى دامىتۋعا مەملەكەت-جەكەمەنشىك سەرىكتەستىگى اياسىن كەڭەيتۋ زور مۇمكىندىك بەرەدى. بۇل اسا ماڭىزدى جالپىۇلتتىق مىندەتتەردىڭ ءبىرى – 3-6 جاس ارالىعىنداعى بالالاردى مەكتەپكە دەيىنگى ءبىلىم بەرۋمەن 2020 جىلعا قاراي ءجۇز پايىز قامتۋ ماسەلەسىن مەملەكەت پەن بيزنەس بىرلەسە شەشىپ وتىرعانىن كورسەتەدى. مەملەكەتتىك-جەكەمەنشىك سەرىكتەستىگى ينفراقۇرىلىمدى، سونىڭ ىشىندە الەۋمەتتىك ينفراقۇرىلىمدى دامىتۋدىڭ نەگىزگى تەتىگىنە اينالۋعا ءتيىس» - دەپ اتاپ كورسەتكەن بولاتىن.

قازىرگى كەزدە وسىناۋ باعدارلاما اياسىندا ەلىمىزدىڭ، ونىڭ ىشىندە اۋليەاتا ءوڭىرىنىڭ تۇكپىر-تۇكپىرىندە كوپتەگەن الەۋمەتتىك جانە سپورتتىق نىساندار بوي كوتەرىپ، حالىق يگىلىگى ءۇشىن پايدالانۋعا بەرىلدى. بۇعان سوڭعى جىلدارى وبلىسمىزداعى قارقىندى تۇردە دامىپ كەلە جاتقان اۋدانداردان ءبىرقاتار مىسالدار كەلتىرۋگە بولادى. سونىڭ ايعاعى – شۋ اۋدانىندا مەملەكەتتىك-جەكەمەنشىك ارىپتەستىك اياسىندا بوي كوتەرگەن ءبىلىم بەرۋ جانە سپورت سالاسىنداعى نىساندار. اۋداندا بۇل باعىتتا جۇزەگە اسا باستاعان جوبالاردىڭ اياسى مەن ارناسى ارتا تۇسكەن. مەملەكەتتىك مۇلىكتى سەنىمدى تۇردە باسقارۋعا بەرىلگەن نىسانداردىڭ باسىم بولىگىن مەكتەپكە دەيىنگى ءبىلىم بەرۋ مەكەمەلەرى قۇرايدى. سونداي-اق، 2016 جىلدىڭ قازان ايىندا شۋ اۋدانىندا بوي كوتەرگەن سپورتتىق نىسان – «تارلان» سپورت كەشەنى بار. ايتا كەتۋ كەرەك، بۇل وبلىستاعى مەملەكەتتىك-جەكمەنشىك ارىپتەستىك اياسىندا سالىنعان العاشقى سپورت كەشەنى. اتالمىش نىساننىڭ تۇرعىزىلۋىنا تىكەلەي ۇيىتقى بولعان وسى اۋداننىڭ تۋماسى، كەڭەس وداعىنا ەڭبەگى سىڭگەن جاتتىقتىرۋشى يۋريي سحاي. جوبالىق قۇنى 480 ميلليون تەڭگەنى قۇراعان نىساننىڭ قۇرىلىسى 2015 جىلى باستالىپ، اراعا ءبىر جىل سالىپ تاۋەلسىزدىگىمىزدىڭ 25 جىلدىق مەرەيتويىنا وراي پايدالانۋعا بەرىلدى. عيمارات سپورتتىق-ساۋىقتىرۋ بلوگى جانە جاتاقحانادان تۇرادى. سونىمەن قاتار، مۇندا جاتتىعۋ بولمەسىمەن بىرگە 1 بوكس، 2 اۋىر اتلەتيكا جانە 1 كۇرەس زالدارى قىزمەت كورسەتەدى. بۇدان بولەك، كەشەننىڭ جاتاقحاناسىندا 25 ادامعا ارنالعان جاتىن بولمە مەن جەكە اسحاناسى جانە مونشاسى بار. وعان قوسا، كەشەننىڭ اۋلاسىنان جاساندى جامىلعىلى فۋتبول الاڭشاسى مەن گيمناستيكالىق الاڭدار دا ورىن العان. عيماراتتا اكىمشىلىك، مەديسينالىق پۋنكت، ادىستەمەلىك، كيىم اۋىستىرۋ جانە جۋىنۋ بولمەلەرى دە قاراستىرىلعان. بۇگىندە مۇندا 26 ادام تۇراقتى جۇمىسپەن قامتىلىپتى. ولار سپورتتىڭ دزيۋدو، تاەكۆوندو، بوكس جانە كۇرەس تۇرلەرى بويىنشا اۋدانداعى 350 ءجاسوسپىرىمدى سپورتقا باۋلۋدا. ودان بولەك، مۇندا كەشكى ۋاقىتتاردا 300-گە جۋىق اۋدان تۇرعىندارى اقىلى تۇردە سپورتپەن شۇعىلدانا الادى. 2016 جىلى قازاقستان بوكس فەدەراسياسى سەنىمدىك باسقارۋ بويىنشا «تارلان» سپورت كەشەنىن جامبىل وبلىسىنىڭ بوكس كلۋبىنا وتكىزگەن بولاتىن. ال 2017 جىلدىڭ اقپان ايىندا نىساندى قازاقستان بوكس فەدەراسياسىنان «تارلان باتىرلارى» جاۋاپكەرشىلىگى شەكتەۋلى سەرىكتەستىگىنە مەملەكەتتىك-جەكەمەنشىك ارىپتەستىك اياسىندا وتكىزۋ-قابىلداۋ جۇمىستارى جۇرگىزىلىپ، ناتيجەسىندە، «تارلان» سپورت كەشەنى سەرىكتەستىك مەنشىگىنە تولىقتاي بەرىلگەن. مىنە، سودان بەرگى ءبىر جىل ىشىندە مۇندا بىرنەشە اۋداندىق، وبلىستىق، رەسپۋبليكالىق جارىستار ۇيىمداستىرىلىپ، اۋىلدى جەردەگى جاسوسپىرىمدەردىڭ سپورتقا دەگەن قۇلشىنىستارىن ەسەلەي تۇسۋگە زور ۇلەس قوسۋدا.