جۋىردا «قازاقستان تەمىر جولى – جۇك تاسىمالى» اق جامبىل بولىمشەسىنىڭ ديرەكتورى بەرىك اقشالوۆتىڭ توراعالىعىمەن ۇلكەن جيىن ءوتىپ، وندا ەكى اپتاعا جۋىق ۋاقىت بولىمشەنىڭ قۇرىلىمدىق مەكەمەلەرىندە جۇرگىزىلگەن كۇزگى كوميسسيالىق بايقاۋدىڭ قورىتىندىسى شىعارىلدى. جيىندا بولىمشەگە قاراستى ءبىرقاتار قۇرىلىمداردىڭ باسشىلارى بايانداما جاسادى.

جامبىل جۇك تاسىمالداۋ بولىمشەسىندە دە قىسقى كەزەڭگە دايىندىق جۇمىستارى قىزا تۇسكەن. فيليالدىڭ قىسقى كەزەڭگە دايىندىعىن كوميسسيالىق تەكسەرۋ جۇمىستارى اياسىندا ينفراقۇرىلىمنىڭ، قوزعالمالى قۇرامنىڭ جانە وندىرىستىك-تەحنيكالىق نىساندار مەن قىزمەتتىك وتكەلدەردىڭ، پەررونداردىڭ جاعدايى مەن جۇمىسشىلاردىڭ ارنايى كيىمدەرمەن قامتىلۋى قارالعان. وعان قوسا، تەحنيكالىق جابدىقتاردىڭ جانە ولاردىڭ بولشەكتەرىندەگى اقاۋلاردى انىقتاۋ، قوزعالىس جانە ەڭبەك قاۋىپسىزدىگىنىڭ جاعدايىن پىسىقتاۋ جۇمىستارى دا جۇرگىزىلىپ، انىقتالعان اقاۋلار مونينتورينگىن جۇرگىزۋ، جۇمىسشىلاردىڭ كاسىبي بىلىكتىلىگىنىڭ دايىندىعى دەڭگەيىن سارالاۋ، جۇمىسشىلاردىڭ تەحنيكالىق وقۋلارىن جۇرگىزۋ جانە ۇيىمداستىرۋ سىندى شارالارمەن بولىمشەنىڭ قىسقا دايىندىعى ءبىر پىسىقتالدى.

فيليال بويىنشا العاشقى «قىستاۋشى» قىزمەتكەرلەر تولىق وقىتۋدان ءوتىپتى. قىزمەتكەرلەردىڭ بارلىعى ارنايى كيىمدەرمەن، اياق كيىمدەرمەن جانە جەكە قورعانىس قۇرالدارىمەن تولىق قامتاماسىز ەتىلگەن. سونداي-اق، الدىن الۋ جۇمىستارىنا ارنالعان ءتۇرلى كەرەك-جاراقتاردىڭ قاجەتتى قورى جاساقتالىپ، ستانسيالارداعى مەحانيكالىق جانە ەلەكتروندى تارازىلاردىڭ جاي-كۇيى تەكسەرىلىپ، قورىتىندىسى الىنىپتى.

جالپى، باياندامالاردان بەلگىلى بولعانى – كۇزگى كوميسسيالىق بايقاۋدىڭ ناتيجەسى جامبىل جۇك تاسىمالى بولىمشەسىنىڭ جانە ونىڭ بارلىق سالالىق قۇرىلىمدارىنىڭ قىسقا دايىندىعى تۇراقتى ەكەنىن كورسەتتى. بۇل رەتتە وپ-115، بوراندى، شىعاناق جانە ءۇشبۇلاق ستانسيالارىنىڭ كورسەتكىشتەرىن ەرەكشە اتاپ وتكەن ءجون.

جالپى، جيىن سوڭىندا ايتىلعان بارلىق ماسەلەلەر بويىنشا قاۋلى شىعارىلىپ، كەمشىلىكتەردىڭ ءبارى الداعى ۋاقىتتا نازاردان تىس قالماس ءۇشىن باسشىلارعا جەكە-جەكە تاپسىرمالار جۇكتەلدى. ماسەلەن، جامبىل جۇك تاسىمالى بولىمشەسىنىڭ باس ينجەنەرى ا.كيمگە جۇمىسشىلاردىڭ تەحنيكالىق ءبىلىمىن قاداعالاپ، ونى جەتىلدىرۋ ءىسى قاتاڭ جۇكتەلسە، جامبىل ماگيسترالدى جەلىلەرى بولىمشەسىنىڭ ديرەكتورى ا.كۋكۋزوۆكە ەسكەرتپەلەردىڭ مەرزىمىندە ورىندالۋى مەن قۇرىلىمدىق باسشىلاردىڭ پويىزدار قوزعالىسى قاۋىپسىزدىگى مەن ەڭبەكتىڭ قورعالۋىن قاداعالاۋ بويىنشا اتقارار جۇمىستارىن جۇيەلەۋ تاپسىرىلدى.

ال حاتتامالىق شەشىمنىڭ جالپى ورىندالۋىن باقىلاۋدى بولىمشە ديرەكتورى ب.اقشالوۆ ءوز مىندەتىنە الدى.

جالپى، جوسپارلى تەكسەرۋ بارىسىندا قوزعالىس قاۋىپسىزدىگىن باسقارۋ جۇيەسىنىڭ قىزمەتىنە جانە ونىڭ ۇيىمداستىرىلۋ دەڭگەيىنە، تەحنيكالىق قۇرالداردى ۇستاپ تۇرۋ باعىتىنداعى قولعا الىنعان شارالاردىڭ تيىمدىلىگىنە باعا بەرىلىپ، كەتكەن كەمشىلىكتەردى جويىپ، اپاتسىز جاعدايدا جۇمىس ىستەۋدى قامتاماسىز ەتۋدىڭ جوسپار-سىزباسى جاسالدى. ءبىر سوزبەن ايتقاندا فيليالدىڭ بارلىق قۇرىلىمدىق بولىمشەلەرى قىسقى كەزەڭگە دايىن.