تارازدىق تەمىرجولشىلار قىس ماۋسىمىنا ساقاداي-ساي. بۇل تۋرالى «جامبىل جۇك تاسىمالى» بولىمشەسىندە فيليال ديرەكتورىنىڭ ءبىرىنشى ورىنباسارى ۇمىتبەك رىسبەكوۆتىڭ توراعالىعىمەن وتكەن جيىندا ايتىلدى. باسقوسۋعا سالا ماماندارىمەن قاتار، وبلىستىق ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسىنىڭ باس مامانى ر. بايدالييەۆ، «بايدالييەۆ»، «كۋربانوۆ»، «يسكاكوۆ»، «حاليدا» سىندى جەكە كاسىپكەرلىك يەلەرى مەن «جىبەك جولى» شارۋا قوجالىعى، «وتىن م» ج ش س وكىلدەرى قاتىستى.

جالپى، «قىستىڭ قامىن جاز ويلاعان» جامبىلدىق تەمىرجولشىلار قىسقا دايىندىقتى باستاپ كەتكەندەرىنە دە ءبىراز بولعان-دى. سەبەبى بۇل قىس ماۋسىمىنا دايىندىق ماسەلەسى قارالعان العاشقى جيىن ەمەس. جامبىل وبلىستىق ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسىنىڭ بەرگەن مالىمەتتەرىنە سۇيەنسەك، 2019-2020 جىلىتۋ ماۋسىمىنا وڭىردەگى كوممۋنالدىق-شارۋاشىلىق جانە بيۋدجەتتىك مەكەمەلەرگە بولىنۋگە جوسپارلانعان كومىر كولەمى 66،4 مىڭ توننا بولسا، بۇگىنگى كۇنگە دەيىن ونىڭ 37 مىڭ تونناسى، ياعني، 55،7 پايىزى اۋليەاتا جەرىنە جەتكىزىلىپ قويعان.

ال جالپى جامبىل وبلىسى تۇرعىندارىنا جوسپارلانعان 254،2 مىڭ توننا كومىردىڭ 72،5 مىڭ تونناسى دايىن.

جيىن بارىسىندا ۇمىتبەك ەسمۇرزا ۇلى، بيىل جاز مەزگىلى وتە ىستىق بولعانىن ەسكە سالىپ، ەندى سايكەسىنشە، قىس ماۋسىمىنىڭ دا قاتال بولۋى مۇمكىن ەكەنىن ايتتى.

«سينوپتيكتەردىڭ مالىمەتىنشە، كەلە جاتقان قىس مەزگىلى ادەتتەگىدەن سۋىق بولادى دەپ كۇتىلۋدە. ويتكەنى، جاز مەزگىلىندە تەمپەراتۋرانىڭ جىلداعىدان جوعارى بولعانىن ءبارىمىز بايقادىق. ءبىراق ءبىز قىس ماۋسىمىنا ساقاداي-سايمىز دەسەك تە بولادى. جىلىتۋ ماۋسىمىن جىلداعىداي قالىپتى وتكىزەمىز دەگەن ويدامىز. ءبىرشاما ۋاقىت بۇرىن ەلىمىزدىڭ سولتۇستىك وڭىرىندەگى بولىمشەلەردە ۆاگون تاپشىلىعىنا بايلانىستى ءبىراز كەلەڭسىزدىكتەر ورىن الدى. بىزدە ونداي پروبلەما جوق، ۆاگوندارعا بايلانىستى ماسەلە تۋىنداعان ەمەس. ونىڭ بارلىعى دا ءبىزدىڭ ءجىتى باقىلاۋىمىزدا.

ايتا كەتەرلىگى، بيىل تاريف 10 پايىزعا ءوستى. ەندى ول جۇك تاسىمالىنىڭ ناقتى قاي قىزمەتىنە بايلانىستى ەكەنىن، جالپى باسقا دا وزگەرىستەردى وسى سالانىڭ مامانى جان-جاقتى ءتۇسىندىرىپ بەرەدى»، – دەدى فيليال ديرەكتورىنىڭ ءبىرىنشى ورىنباسارى.

كەلەسى كەزەكتە ءسوز العان جەتەكشى ينجەنەر كۇليزا وماروۆانىڭ ايتۋىنشا، 2018 جىلدىڭ 1 ساۋىرىنەن بەرى تاس كومىردىڭ باعاسى ستاۆكاسىنا 518 تەڭگە بولىپ كەلسە، ەندى ونىڭ قۇنى 571 تەڭگە بولماق. تاسىمالعا قاتىستى جۇك ۆاگوندارىن، كونتەينەرلەرىن پايدالانۋ، جيناۋعا بايلانىستى قوسىمشا قىزمەتتەردىڭ قۇنى ستاۆكاسىنا 10 پايىزعا وسكەن.

جيىن سوڭىندا ۇمىتبەك رىسبەكوۆ جينالعاندار تاراپىنان قويىلعان سۇراقتارعا جاۋاپ بەرىپ، قانداي دا ءبىر ماسەلە تۋىنداسا، دەر كەزىندە شەشۋگە دايىن ەكەندىكتەرىن ايتىپ، كەزەكتى قىس ماۋسىمىن قيىندىقسىز وتكىزۋگە اتسالىسۋعا شاقىردى.