تەمىر جول بويىنداعى ءتارتىپ بۇزۋشىلىقتى، ۇرلىق-قارلىقتى قاداعالايتىن، باقىلايتىن قىزمەتتىڭ بارىن بىرەۋ بىلسە، بىرەۋ بىلە بەرمەيدى. مۇنداعى قىزمەتكەرلەر شەتىنەن قىراعى، ارنايى تەحنيكامەن جاراقتاندىرىلعان، قارۋ-جاراقپەن دە قامتىلعان. «اسكەريلەندىرىلگەن تەمىر جول كۇزەتى» اق دەپ اتالاتىن مەكەمەنىڭ تاراز قالاسىنداعى فيليالىنا ات باسىن بۇرعانىمىزدا كوز جەتكىزدىك بۇعان.
فيليال ديرەكتورى باۋىرجان تۋلەپبەرگەنوۆتىڭ ايتۋىنشا، ۇجىمدا 800-دەن استام ازامات ەڭبەك ەتەدى. ونىڭ 600 شاقتىسى كۇزەت قىزمەتىندەگى جىگىتتەر. ولاردىڭ ءارقايسىسى جۇمىسقا كىرەردە ءجىتى تەكسەرۋلەردەن وتكەن، فيزيكالىق، پسيحولوگيالىق تۇرعىدان مۇمكىندىكتەرى ابدەن زەردەلەنگەن. «اسىرەسە، كۇزەت قىزمەتىن اتقاراتىن ماماندارىمىزدىڭ بارلىعى-دەرلىك وتان الدىنداعى بورىشتارىن وتەپ كەلگەن، ىسىلعان. ولارعا كۇزەت جۇمىسىن سەنىپ تاپسىرۋعا بولاتىندىعىنا كوز جەتكىزگەنبىز»، - دەيدى باۋىرجان امانتاي ۇلى.
فيليالدىڭ تاراز قالاسىنان بولەك، سارىشاعان، شۋ، لۋگاۆوي جانە قىرعىز ەلىمەن شەكاراداعى مايماق ستانسالارىندا بولىمشەلەرى بار. بۇدان وزگە، شۇعىل جاعدايدا ارەكەت ەتەتىن ارنايى توپ تا جاساقتالعان. «بۇل شۇعىل ارەكەت ەتەتىن توپتا 29 مامان قىزمەت ەتەتىن بولسا، تاراز قالاسىنداعى تەمىر جول بويىن 230 مامانىمىز كۇزەتەدى. ال شۋ ستانساسىندا – 218، لۋگاۆويدا – 44، سارىشاعاندا – 69، مايماق ستانساسىندا 24 ازاماتىمىز مۇلتىكسىز قىزمەت اتقارۋدا»، - دەپ جالعادى ءسوزىن مەكەمە باسشىسى.
ايماقتاعى تاراز، شۋ قالالارىندا ورىن تەپكەن ۆوكزالدار قوزعالىس ءجيى ورىن الاتىن نىساندار قاتارىنا جاتادى. ۇجىمنىڭ ولارداعى احۋالدى، جولاۋشىلار جۇگىن تەكسەرەتىن 100 قىزمەتكەرى بار.
تەمىر جول بويىنداعى اسكەريلەندىرىلگەن كۇزەت قىزمەتىنە قارۋ-جاراق پەن قۇرال-جابدىقتاردان بولەك، 10 اۆتوكولىك بولىنگەن. ولار مامانداردى قاجەتتى نىسانعا دەر كەزىندە جەتكىزۋگە ساقاداي ساي تۇر.
باۋىرجان امانتاي ۇلىنىڭ ايتۋىنشا، اسكەريلەندىرىلگەن كۇزەت قىزمەتى بولعان سوڭ، مامانداردىڭ توتەنشە وقيعالارمەن بەتپە-بەت كەلەتىن كەزدەرى از ەمەس كورىنەدى. ماسەلەن، بيىلعى جىلدىڭ باسىندا ءتاتتى ستانساسىندا مىناداي جاعداي تىركەلىپتى: ۆوكزالدا كەزەكشلىكتە تۇرعان قىزمەتكەر مۇرات تىلەۋقۇلوۆ تەمىر جولدان كەزەكتى رەت ءوتىپ جاتقان جۇك ۆاگوندارىنان ءبىر ادامنىڭ سۇلباسىن بايقاپ قالادى. ول ارىپتەستەرىنە دەر كەزىندە حابارلاپ ۇلگەرگەن. اسكەريلەندىرىلگەن ماماندار ۆاگون سوڭىنان تەكسەرە بارعاندا، ۆاگونداردىڭ ىشىندە شىنىمەن بەيمالىم كۇدىكتىنى قولعا تۇسىرەدى.
«ونىڭ جۇك پويىزىندا نە ماقساتپەن جۇرگەنى انىقتالىپ، ارنايى قۇجات تولتىرىلىپ، جەلىلىك تەمىر جول پوليسياسى بولىمشەسىنە تاپسىردىق. كىشكەنە بالانىڭ قىراعىلىعى ءۇشىن اتا-اناسىنا العىسىمىزدى بىلدىردىك»، - دەيدى كۇزەت قىزمەتىنىڭ باسشىلىعى.
ءدال وسى ىسپەتتى وقيعا شىلدە ايىندا بىرلىك ستانساسىندا دا ورىن العان. «ول كەزدە دە ءوزىمىزدىڭ جىگىتتەر ابجىلدىك تانىتتى. ادەتتەگىدەي تەمىر جولمەن ءوتىپ بارا جاتقان جۇك ۆاگوندارىنىڭ بىرىنەن ءبىر ادامدى بايقاپ ۇلگەرگەن قىزمەتكەرىمىز ز.ءجانابىلوۆ شۇعىل ارەكەت ەتەتىن توپقا حابارلايدى. ءجىتى تەكسەرىس ناتيجەسىندە ۇرلىق نيەتىندەگى ازاماتتى قۇرىقتادىق. وعان قاتىستى جەدەل حاتتاما تولتىرىلىپ، شۋ ستانساسىنداعى قاۋىپسىزدىك قىزمەتىنە تاپسىرىلدى»، دەپ تۇيىندەدى «اسكەريلەندىرىلگەن تەمىر جول كۇزەتى» اق تاراز قالاسىنداعى فيليالىنىڭ ديرەكتورى.
