مەملەكەت باسشىسى ق.توقايەۆتىڭ قازاقستان حالقىنا العاشقى جولداۋىندا ءمان بەرگەن ماڭىزدى ماسەلەلەردىڭ قاتارىندا ينفراقۇرىلىمدى دامىتۋ جايى دا بار. وسى ورايدا پرەزيدەنت «الداعى ءۇش جىل ىشىندە تۇرعىنداردى تازا اۋىز سۋمەن جانە سۋ جەتكىزۋمەن قامتاماسىز ەتۋگە شامامەن 250 ميلليارد تەڭگە بولىنەدى.

اتقارۋشى بيلىك ورگاندارى «نۇرلى جول» باعدارلاماسىن تولىق جانە ساپالى ىسكە اسىرۋعا باسا ءمان بەرۋى كەرەك.

بۇل – ستراتەگيالىق جوبا. سونىڭ ارقاسىندا بۇكىل كولىك ينفراقۇرىلىمى جاڭعىرتىلادى.

وسى ماقساتقا وراي، مەملەكەت 2022 جىلعا دەيىن 1،2 تريلليون تەڭگەدەن استام ينۆەستيسيا سالادى.

ۇكىمەت بۇعان دەيىن دە كوپ قاراجات بولگەن بولاتىن، ءبىراق ونىڭ كوبى قۇمعا سىڭگەن سۋداي جوق بولىپ كەتتى. اشىعىن ايتساق، شەنەۋنىكتەردىڭ قالتاسىنا كەتتى، ال تازا سۋ، جول جانە باسقا دا ينفراقۇرىلىمنىڭ جاعدايى ءالى دە سول كۇيىندە.

بۇل جولى ۇكىمەت پەن پارلامەنت ەسەپ كوميتەتىمەن بىرلەسىپ، بيۋدجەت قاراجاتىن تولىعىمەن ءتيىمدى پايدالانۋدى قامتاماسىز ەتۋى ءتيىس» دەپ اتاپ ءوتتى.

بۇگىندە جامبىل وبلىسىنىڭ ورتالىعى – تاراز قالاسى ۇلكەن قۇرىلىس الاڭىنا اينالعان. مۇندا ايماق باسشىسى اسقار مىرزاحمەتوۆتىڭ باستاماسىمەن تاسجولدار توسەلىپ، كوپقاباتتى تۇرعىن ۇيلەر مەن وزگە دە الەۋمەتتىك نىساندار كوپتەپ سالىنۋدا.

مىسالى، قالانىڭ «تايۆان» القابىندا جول سالۋ جۇمىستارى قارقىندى جۇرگىزىلۋدە. «تايۆان» القابىندا بارلىعى 18 كوشە بولسا، ونىڭ ۇزىندىعى 27،7 شاقىرىم. قۇرىلىس جۇمىستارىنا بۇرىلىستارىمەن قوسا ەسەپتەگەندە 481 564،0 مىڭ قارجى قاراستىرىلعان. قازىرگى تاڭدا 18 كوشەنىڭ 14 كوشەسى تولىعىمەن اياقتالۋعا جاقىن. ايتا كەتەرلىگى، تاراز قالاسىندا جالپى ۇزىندىعى – 78،022 شاقىرىم جول جوندەلۋدە. ول دەگەنىمىز 138 كوشە جانە بۇرىلىستار مەن تۇيىقتار بار. 85 ۋچاسكەدە اسفالتتاۋ جۇمىستارى جۇرگىزىلۋدە. 20-كوشە جانە 3-بۇرىلىسقا اسفالت جابىندىسى توسەلىپ، اياقتالۋ ۇستىندە. 46-كوشە مەن 14-بۇرىلىسقا، سونداي-اق 2-تۇيىققا اسفالت جابىندىسىن توسەۋگە دايىندىق پىسىقتالۋدا.

ال «قاراسۋ» شاعىن اۋدانىندا الەۋمەتتىك وسال توپ وكىلدەرىنە ارنالىپ كوپقاباتتى تۇرعىن ۇيلەر سالىنۋدا. سونىمەن قاتار «اقبۇلاق» شاعىن اۋدانىنداعى №9، №17 ۇيلەردە كۇردەلى جوندەۋ جۇمىستارى جۇرگىزىلۋدە. اتالعان تۇرعىن ۇيلەر 1966 جىلى سالىنعان، 5 قاباتتى، 70 پاتەرلى. ءوز كەزەگىندە تۇرعىن ۇيلەردىڭ شاتىرلارى، ينجەنەرلىك جەلىلەرى (جىلۋ جۇيەسى، ىستىق جانە مۇزداي سۋ، كارىز جۇيەسى، ەليەۆاتور تورابى، ەلەكتر جۇيەسى)، كىرەبەرىستەرى كۇردەلى جوندەۋدەن ءوتتى. جوندەۋ جۇمىستارىنىڭ جالپى قۇنى 292 945 تەڭگەنى قۇرايدى.

اعىمداعى جىلى تاراز قالاسىندا بارلىعى 989،6 ملن. تەڭگەگە 25 ۇيگە جوندەۋ جۇمىستارى جۇرگىزىلۋدە. 540 ملن.تەڭگە قالا بيۋدجەتى ەسەبىنەن بولسا، قالعان قاراجات الدىڭعى جوندەۋ جۇمىستارى جۇرگىزىلگەن ۇيلەردەن قايتارىم قارجى ەسەبىنەن.

بۇگىنگى تاڭدا قالا بويىنشا بارلىعى 1298 كوپپاتەرلى تۇرعىن ۇيلەر بار. ونىڭ ىشىندە بۇگىنگى كۇنگە 300-گە جۋىق ءۇي كۇردەلى جوندەۋ جۇمىستارىن قاجەت ەتەدى.

كەلەر جىلعا 3،4 ملرد.تەڭگەگە 80 ءۇيدىڭ جوندەۋ جۇمىستارىنا رەسپۋبليكالىق قازىنادان قاراجات بولۋگە بيۋدجەتتىك ءوتىنىم قۇرىلىس كوميتەتىنە تاپسىرىلدى.