كەلەسى جىلى ەلىمىزدە جالپىۇلتتىق حالىق ساناعى وتەتىنى بەلگىلى. وسى جاۋاپتى كەزەڭگە وڭتايلى دايىندىق شارالارى جامبىل وبلىسى اۋماعىندا ءوز دەڭگەيىندە قولعا الىنۋدا. بۇل ورايدا وبلىس اكىمدىگىنىڭ ساۋلەت جانە قالا قۇرىلىسى باسقارماسىمەن وڭىردەگى ەلدى مەكەندەردىڭ «ەلەكتروندىق كارتاسى» ازىرلەنىپ جاتىر، دەپ جازادى Qamshy.kz اقپارات اگەنتتىگى. 

ەلدى مەكەندەردىڭ «ەلەكتروندىق كارتاسىن» دايىنداۋعا 20 ميلليون تەڭگەگە جۋىق قارجى قاراستىرىلعان. قازىرگى تاڭدا بۇل قارجىنى ماقساتتى يگەرۋدە 3 مەردىگەر كومپانيامەن كەلىسسوزدەر جۇرگىزىلۋدە.

–تاراز قالاسى اكىمدىگىنىڭ ساۋلەت جانە قالا قۇرىلىسى ءبولىمى مەن اۋداندارداعى قۇرىلىس، ساۋلەت جانە قالا قۇرىلىسى بولىمدەرىنىڭ تاپسىرىسىنا ساي ەلدى مەكەندەردىڭ «ەلەكتروندىق كارتاسىن» ازىرلەۋ جۇمىستارىن «Sunrise Lab»، «تاراز تاۋ جوبا»، «گيس» جاۋاپكەرشىلىگى شەكتەۋلى سەرىكتەستىكتەرى جۇرگىزبەك. قازىرگى تاڭدا تاراز قالاسى عانا مەردىگەر كومپانيامەن كەلىسسوز جۇرگىزىپ جاتىر. اۋداندىق بولىمدەر ءتيىستى جۇمىستاردى ورىنداۋشى كومپانيالارمەن كەلىسىم-شارتقا وتىرىپ قويدى. ال سارىسۋ، تالاس اۋداندارىندا «گيس» جاۋاپكەرشىلىگى شەكتەۋلى سەرىكتەستىگىمەن جۇرگىزىلگەن جۇمىستار اياقتالدى. قالعان اۋدانداردا ەلەكتروندى كارتانى اياقتاۋ مەرزىمى قاراشا ايىنىڭ سوڭى دەپ كورسەتىلگەن. تەك تاراز قالاسى مەن مەركى، مويىنقۇم اۋداندارىندا ەلەكتروندى كارتا جىل سوڭىنا دەيىن اياقتالادى. ءبىر سوزبەن ايتقاندا 2020 جىلدىڭ العاشقى كۇنىنەن تاراز قالاسىن قوسا العاندا وبلىستاعى بارلىق اۋدانداعى ەلدى مەكەندەردىڭ «ەلەكتروندىق كارتاسى» دايىن بولماق. سايكەسىنشە تاراز قالاسىنىڭ ەلەكتروندىق كارتاسىن ازىرلەۋگە 7 ميلليون تەڭگە قازىنا قارجىسى جۇمسالسا، اۋدانداردىڭ بارلىعىندا بۇل جۇمىستاردى ورىنداۋعا 1 ميلليون 262 مىڭ 500 تەڭگە كولەمىندە قارجى قاراستىرىلدى، – دەيدى وبلىس ساۋلەت جانە قالا قۇرىلىسى باسقارماسى باسشىسىنىڭ مىندەتىن اتقارۋشى داۋلەت دوسانوۆ.

اتاپ ءوتۋ كەرەك اعىمداعى جىلدىڭ 19 ماۋسىمىندا قازاقستان رەسپۋبليكاسى ۇكىمەتىنىڭ «2020 جىلى قازاقستان رەسپۋبليكاسى حالقىنىڭ ۇلتتىق ساناعىن وتكىزۋ» تۋرالى قاۋلى شىقتى.اتالعان قۇجاتقا ساي قازاقستان رەسپۋبليكاسى اۋماعىندا جالپىۇلتتىق حالىق ساناعى كەلەر جىلدىڭ 1-30 قازان ارالىعىندا وتكىزىلەدى. سونداي-اق بۇل قۇجاتتا ەلىمىز تاۋەلسىزدىك العاننان بەرگى ءۇشىنشى رەت وتكىزىلگەلى جاتقان جالپى ۇلتتىق حالىق ساناعى العاش رەت «ە-ستاتيستيكا» ەلەكتروندىق بازاسىمەن جۇرگىزىلەتىندىگى دە ايتىلعان.