مەملەكەت باسشىسى قاسىم-جومارت توقايەۆتىڭ قازاقستان حالقىنا جولداۋىندا مەيلىنشە شيكىزاتتىڭ نەگىزگى تۇرلەرىنەن باس تارتىپ، ەكونوميكانى ءارتاراپتاندىرۋ جايى ايتىلعانى بەلگىلى. بۇل ورايدا جامبىل وبلىسىندا ءبىرقاتار الەۋەتتى جوبالارى قولعا الىنعان. ءارى بۇل جوبالار وڭىرلەردىڭ ەكونوميكالىق الەۋەتىن ارتتىرىپ، جەرگىلىكتى تۇرعىنداردىڭ جۇمىسپەن قامتىپ كەلەدى. بولاشاقتا وسىناۋ بىرەگەي جوبا سارىسۋ اۋدانىندا جۇزەگە اسىرىلماق، دەپ جازادى Qamshy.kz اقپارات اگەنتتىگى. 

اتالعان جوبا اياسىندا بۇعان دەيىن ەكسپورتقا تاۋەلدى بولىپ كەلگەن كالسييلەندىرىلگەن سودا سارىسۋ اۋدانىنداعى توعىزكەنت اۋىلىندا سالىناتىن زاۋىتتا وندىرىلە باستايدى. زاۋىتتى تۇركيالىق «يىلدىرىم حولدينگ» كومپانياسىنىڭ ەلىمىزدەگى وكىلدىگى سانالاتىن «QAZAQ SODA LLP» كاسىپورنى جۇرگىزەدى. جاقىندا جامبىل وبلىسى اكىمى اسقار مىرزاحمەتوۆ پەن كاسىپورىن جەتەكشىسى يسمايل جەيلاندى قابىلداپ، زاۋىت قۇرىلىسىن جۇرگىزۋ، ونىڭ وندىرىستىك الەۋەتى جايىندا وي قوزعادى كومپانيا ءقازىر زاۋىت قۇرىلىسىن جۇرگىزۋ ءۇشىن 18 شاقىرىمدىق ەلەكتر جەلىسىن قاجەتسىنەدى. ينۆەستيسيالىق ساياساتقا ساي ينۆەستورلارعا ينفراقۇرىلىم تارتۋعا بيۋدجەتتەن قارجى قاراستىرىلادى. سوندىقتان دا وبلىس اكىمى «QAZAQ SODA LLP» كاسىپورنى جەتەكشىسىنە ەلەكتر ەنەرگياسى جەلىسىن تارتۋ، تەمىر جول قۇرىلىسىنا جۇرگىزۋ جۇمىستارىنا ءتيىستى قۇجاتتار تولىقتىرىلعان جاعدايدا عانا قازىنا قارجىسى بولىنەتىنىن جەتكىزدى. ال كومپانيا ازىرگە بۇل جۇمىستاردى ءوز ەسەبىنەن جۇرگىزبەك. اكىمدىك ينۆەستورعا ينفراقۇرىلىمعا جۇمساعان شىعىندى كەلەسى جىلى بيۋدجەتتى ەكىنشى رەت ناقتىلاۋ كەزىندە قايتارىلاتىنىن جەتكىزدى. جالپى جوبالىق قۇنى 220 ميلليون اقش دوللارى بولاتىن ءوندىرىس ورنى 2 جىلدان سوڭ تولىق قۋاتتىلىعىمەن ىسكە قوسىلماق. ءقازىر كومپانيا وكىلدەرى زاۋىت قۇرىلىسى جۇرەتىن ايماقتاعى شيكىزات قورىنا بارلاۋ جاسادى. الدىن-الا بولجام بويىنشا زاۋىت وندىرىستىك قۋاتىنىڭ العاشقى كەزەڭىندە 400 مىڭ توننا ءونىم وندىرەدى. زاۋىتتىڭ ىسكە قوسىلۋىمەن مۇندا 300 جاڭا جۇمىس ورنى اشىلدى. كومپانيا باسشىلىعى ۇجىمنىڭ 95 پايىزىن جەرگىلىكتى تۇرعىنداردان الۋعا نيەتتى. سوندىقتان قاجەتتى كادرلاردى دايارلاۋ ماسەلەسىنە قاتىستى تاراپتار دا ءوزارا كەلىسىمگە كەلدى.

ايتا كەتۋ كەرەك بۇل شەشىم وتكەن جىلى ەلباسى نۇرسۇلتان نازاربايەۆتىڭ تۇركياعا رەسمي ساپارى كەزىندە ناقتىلانعان بولاتىن. سول كەزدە ەكى ەل اراسىنداعى كاسىپكەرلىكتى دامىتۋ ماقساتىندا 1 ميلليارد 700 ميلليون اقش دوللارىنان اساتىن 22 ەكىجاقتى كوممەرسييالىق قۇجاتقا قول قويىلعان ەدى.