قىمباتشىلىق قوس بۇيىردەن قىسقان شاقتا قاراپايىم حالىق ءۇشىن قىسقى ازىق-تۇلىكتى قامداۋ وزەكتى ماسەلە. قىر استىنداعى قىستى قامسىز وتكەرۋ ءۇشىن قاراپايىم حالىق بازارعا اعىلاتىنى بەلگىلى. ونداعى باعانىڭ دا وڭتايلى ساتتە پايدالانىپ بىرنەشە ەسەگە ءوسىپ شىعا كەلەدى. وسى ورايدا وبلىس ورتالىعى تاراز قالاسىنداعى حالىق تۇتىناتىن نەگىزگى ازىق-تۇلىكتىڭ باعاسىن تۇراقتاندىرۋ ماقساتىندا ءار سەنبى سايىن كوممۋنالدىق بازاردا اۋىل شارۋاشىلىعى ونىمدەرىنىڭ جارمەڭكەسى ۇيىمداستىرىلا باستالدى، دەپ جازادى Qamshy.kz اقپارات اگەنتتىگى. 

بۇل جارمەڭكە ەندى ءار سەنبى سايىن 1 جەلتوقسانعا دەيىن تۇراقتى تۇردە ۇيىمداستىرىلاتىن بولادى. جارمەڭكەنىڭ العاشقى كۇنىندە كوممۋنالدىق بازار سورەسىنە بايزاق، قورداي، تالاس اۋداندارى مەن تاراز قالاسىنىڭ اۋىل شارۋاشىلىعى تاۋار وندىرۋشىلەرىنىڭ جانە تۇراقتاندىرۋ قورىنىڭ تاۋارلارى شىعارىلدى. جالپى قۇنى 11،7 ميلليون تەڭگە بولاتىن 53،8 توننا اۋىل شارۋاشىلىعى ونىمدەرىنە دەگەن حالىقتىڭ سۇرانىسى وتە جوعارى. سوندىقتان دا بولسا كەلسە شارۋالار الا كەلگەن 4،7 توننا ەت پەن 1،3 توننا ءسۇن ونىمدەرى، 1،3 توننا بالىق پەن 1 توننا شۇجىق ونىمدەرى تولىعىمەن دەرلىك ءوتىپ كەتتى. سونداي-اق 2 مىڭ دانا جۇمىرتقا، 0،3 توننا بال، 0،4 توننا كونديتەرلىك ونىمدەر مەن 1 توننا ماكارون ونىمدەرى، 0،1 توننا تۇز جانە 41،6 توننا جەمىس-جيدەك پەن كوكونىس ونىمدەرىنە دەگەن سۇرانىستىڭ دا وتە جوعارى بولعانىن اتاپ ءوتۋ كەرەك. حالىققا نارىق باعاسىنان الدەقايدا ارزان باعادا تاۋارىن وتكىزەتىن جارمەڭكە الدىن الا بەكىتىلگەن كەستەگە ساي اۋداندار بولىنىسىندە وتەدى. كەلەسى اپتادا تارازدىقتار مەن جاقىن ماڭداعى وعان جاقىن ەلدى مەكەن تۇرعىندارى جامبىل، سارىسۋ، ت.رىسقۇلوۆ، شۋ اۋداندارى مەن تاراز قالاسىنىڭ اۋىل شارۋاشىلىعى تاۋار وندىرۋشىلەرىنىڭ جانە تۇراقتاندىرۋ قورىنىڭ تاۋارلارىن ساۋدالايتىن بولادى. ءوز كەزەگىندە تۇتىنۋشىنىڭ قالتاسىن قاقپايتىن باعادا تالعامىنا ساي تاۋار ۇسىنىلاتىن جارمەڭكەنىڭ تيىمدىلىگىن جامبىلدىقتار العاشقى كۇننەن بايقاپ تا ۇلگەردى.

جارمەڭكە قاراپايىم حالىق ءۇشىن قىستىڭ قامىن قولجەتىمدى باعادا قامداۋدىڭ ءبىر جولى بولسا، كۇزگى-جيىن تەرىم ناۋقانىن اياقتاعان شارۋالار ءۇشىن ءوز ونىمدەرىن ساۋدالاۋدىڭ مۇمكىندىگى ەكەنىن دە ايتا كەتكەن ءجون. وعان قوسا ءوز تاۋارىن دەلدالدىققا ۇرىنباي بەكىتىلگەن باعادا ساتۋ دا شارۋالار ءۇشىن پايداعا كەنەلۋدىڭ ءبىر جولى ەكەنى ايتپاسا دا تۇسىنىكتى. ءارى شارۋالارعا ءوز ونىمدەرىن ساتۋعا لايىقتى الاڭ ۇسىنىلۋى دا وڭىردە كاسىپكەرلىككە كەڭ ءورىس اشۋدىڭ قامى ەكەنى ءمالىم.