جامبىل وبلىسى اۋماعىندا اۆتوموبيل جولدارى مەن اۋدان ورتالىعىنىڭ باس كوشەلەرىندە ورنالاسقان قۇرىلىس نىساندارى مەن ساۋدا ورىندارىن تالاپقا ساي ەتۋ بويىنشا ءبىرقاتار جۇمىستار قولعا الىندى. ولاردىڭ كەيبىرىنە بۇزۋ تۇرىندە شارا قولدانىلىسا ەندى كەيبىرىنىڭ قاسبەتى رەتكە كەلتىرىلگەن. قالعاندارىنىڭ ورنالاسۋ زاڭدىلىقتارى وبلىس اكىمدىگىنىڭ مەملەكەتتىك ساۋلەت-قۇرىلىس باقىلاۋ باسقارماسىنىڭ ماماندارىمەن انىقتالاتىن بولادى، دەپ جازادى Qamshy.kz اقپارات اگەنتتىگى.
وبلىس اكىمدىگىنىڭ ساۋلەت جانە قالا قۇرىلىسى باسقارماسى باسشىنىڭ مىندەتىن اتقارۋشى داۋلەت دوسانۆتىڭ ايتۋىنشا وڭىردەگى اۆتوموبيل جولدارىنىڭ بويىندا، اۋدان ورتالىقتارىنىڭ باس كوشەلەرىندە ورنالاسقان قۇرىلىس نىساندارى مەن ساۋدا ورىندارىنا زاڭ تالاپتارىنا ساي شارا قولدانىلىپ جاتىر ەكەن.
–وبلىس اۋماعىندا مۇنداي 109 نىساننىڭ بار ەكەندىگى انىقتالدى. ونىڭ 58ء-ى ءتيىستى قۇجاتتارىن راسىمدەپ العان. ال قالعانى 51 نىساننىڭ ەشقانداي قۇجاتتارى راسىمدەلمەگەن. وسىنداعى 29 نىسانعا ءارتۇرلى دەڭگەيدە شارا قولدانىلدى. اتاپ ايتقاندا 18 نىسانعا قاتىستى ورنىنان الۋ، بۇزۋ تۋرالى شەشىم شىعارىلدى. تاعى 7 نىسانعا شارا قولدانۋدى وبلىس اكىمدىگىنىڭ مەملەكەتتىك ساۋلەت-قۇرىلىس باقىلاۋ باسقارماسى شەشەتىن بولادى. ال جول بويىندا، اۋدان ورتالىعىنداعى نەگىزگى كوشەلەردە قۇرىلىس جۇرگىزگەن، ساۋدا ورىندارىن قويعان 2 تۇلعاعا ايىپپۇل سالىندى. قالعان 2 نىساننىڭ سىرتقى قاسبەتى رەتكە كەلتىرىلدى، – دەيدى.
نەگىزىنەن كاسىپكەرلىك جانە وزگەدە ماقساتتاعى نىسانداردىڭ اۆتوموبيل جولدارى مەن اۋدان ورتالىعىنداعى نەگىزگى كوشەلەردىڭ بويىندا سالىنۋىنىڭ ءوز زاڭدىلىعى بار. ءارى بۇل زاڭدىلىق ەلدى مەكەندەردىڭ باس جوسپارى مەن وڭايلاتىلعان سىزباعا يەك ارتادى. ءقازىر وبلىس اۋماعىندا 377 ەلدى مەكەن بولسا ونىڭ 330-ى وڭايلاتىلعان سىزبامەن قامتاماسىز ەتىلگەن. ال 362 ەلدى مەكەن باس جوسپار جانە وڭايلاتىلعان سىزبالارمەن قامتاماسىز ەتىلەدى. ايتا كەتۋ كەرەك بۇل قۇجاتتار ەلدى مەكەندەردەگى حالىق سانىنا قاراي جاسالدى. بۇگىندە وبلىس اۋماعىنداعى 28 ەلدى مەكەندەگى تۇرعىندار سانى 5 مىڭنان اسادى. سونداي-اق وڭىردەگى تۇرعىندارىنىڭ سانى 50-گە جەتپەيتىن دە ەلدى مەكەندەر بار. ءوز كەزەگىندە بۇل فاكتورلاردىڭ بارلىعى ولاردىڭ باس جوسپارىن دايارلاۋدا اسەر ەتەدى. باس جوسپارلاردا تەك ەلدى مەكەننىڭ ساۋلەتتىك كەلبەتى عانا كورىنىس تاپپايدى. مۇندا ولكە تۇرعىندارىنىڭ ءومىر سۇرۋىنە قولايلى ورتا جاساۋدىڭ مۇمكىندىكتەرى دە زەردەلەنەدى.
پىكىر قالدىرۋ