جامبىل وبلىسىندا ساۋلەت، قالا قۇرىلىسى جانە قۇرىلىس سالالارىندا قىزمەت كورسەتۋ ءۇشىن ليزەنسيا بەرۋ ءىسى جۇيەلەنە ءتۇستى. وبلىس اكىمدىگىنىڭ مەملەكەتتىك ساۋلەت-قۇرىلىس باقىلاۋ باسقارماسىمەن وڭىردەگى ليسەنزياتتاردىڭ دەرەكتەر بازاسى قۇرىلدى. ناتيجەسىندە ءتۇرلى كوممەرسيالىق ماقساتتا ليسەنزيانى ءجون-جوسىقسىز بەرۋگە شەكتەۋ قويىلماق، دەپ جازادى Qamshy.kz اقپارات اگەنتتىگى. 

وبلىس اكىمدىگىنىڭ مەملەكەتتىك ساۋلەت-قۇرىلىس باقىلاۋ باسقارماسىمەن 2015-2019 جىلدار ارالىعىندا 568 ليسەنزيا بەرىلگەن. سونىمەن بىرگە يندۋستريا جانە ينفراقۇرىلىمدىق دامۋ مينيسترلىگى قۇرىلىس جانە تۇرعىن ۇي-كوممۋنالدىق شارۋاشىلىق ىستەرى كوميتەتى تاراپىنان بەرىلگەن ليسەنزيالاردىڭ جالپى سانى 479ء-تى قۇرايدى.

–اعىمداعى جىل باسىنان بەرى باسقارماعا ساۋلەت، قالا قۇرىلىسى جانە قۇرىلىس سالالارىندا قىزمەت كورسەتۋ ءۇشىن ليسەنزيا الۋعا نەمەسە قايتا راسىمدەۋگە 150 ءوتىنىش ءتۇستى. ءبىز ونىڭ نەبارى 22 پايىزىن قاناعاتتاندىرىپ، 34 زاڭدى تۇلعاعا ليسەنزيا بەردىك. وتكەن جىلى بۇل ماسەلە بويىنشا بىزگە 222 ءوتىنىش تۇسسە ونىڭ 29 پايىزىن قاناعاتتاندىرىپ، 66 زاڭدى تۇلعانىڭ ءتيىستى قىزمەتتەردى ۇسىنۋعا قابىلەتتى ەكەنىن راستالدى. ءوز كەزەگىندە بۇل ماسەلە وبلىس اكىمىنىڭ تىكەلەي باقىلاۋىنا الىنىپ، ليسەنزياتتاردىڭ دەرەكتەر بازاسى قۇرىلىپ، ولارعا تۇراقتى تۇردە مونيتورينگ جۇرگىزىلۋدە. مونيتورينگ بارىسىندا ءبىر وندىرىستىك بازا مەن ءبىر تەحنيكانى 10 ليسەنزياتتىڭ جالعا الۋ فاكتىسى دە تىركەلدى. سونداي-اق ليسەنزياتتاردىڭ وندىرىستىك بازاسىنىڭ مەكەنجايىن جالعان كورسەتۋ فاكتىلەرى بايقالادى. قۇرىلىستىڭ ساپاسىنا اسەر ەتەتىن وسى فاكتىلەردى كورسەتىپ، ليسەنزيا تۇرىنە قاراي وندىرىستىك بازانىڭ كولەمىن، ماتەريالدىق-تەحنيكالىق جاراقتاندىرىلۋدىڭ ناقتى قۇرامىن بەلگىلەۋ جايىندا قازاقستان رەسپۋبليكاسىنىڭ پرەمەر-مينيسترىنىڭ سالالىق ورىنباسارىنا، يندۋستريا جانە ينفراقۇرىلىمدىق دامۋ مينيسترلىگىنە حات تا جولداندى، –دەيدى وبلىس اكىمدىگىنىڭ مەملەكەتتىك ساۋلەت-قۇرىلىس باقىلاۋ باسقارماسىنىڭ باسشىسى قانات ايتقۇلوۆ.

باسقارما باسشىسى وڭىردەگى ليسەنزياتتاردىڭ دەرەكتەر بازاسى قۇرۋ ناتيجەسىندە زاڭسىز ليسەنزيا بەرۋدىڭ الدىن الۋ، سالاعا ماماندانعان ليسەنزياتتاردىڭ تولىق ءتىزىمىن قالىپتاستىرۋ، ساپاسىز قۇرىلىسقا جول بەرمەۋ شارالارىنا قول جەتكىزىلەتىندىگىن ايتادى. مۇنان وزگە دەرەكتەر بازاسى ارقىلى تاپسىرىس بەرۋشى ساۋلەت، قالا قۇرىلىسى جانە قۇرىلىس سالالارىندا قىزمەت كورسەتەتىن كاسىپورىننىڭ جوعارى بىلىكتى ينجەنەر-تەحنيكتەرىنىڭ جانە اكىمشىلىك-وندىرىستىك بازالارىنىڭ بولۋى، ماتەريالدىق-تەحنيكالىق جابدىقتالۋى سىندى مالىمەتتەرمەن دە جاقىنىراق تانىسا الادى.