سوڭعى جىلدارى جامبىل وبلىسىندا قۇرىلىس جۇمىستارى قارقىن الدى. وڭىردەگى الەۋمەتتىك نىساندارمەن بىرگە شاھاردىڭ كوركىن اشاتىن كەلىستى عيماراتتاردىڭ دا قۇرىلىسى جۇرگىزىلىپ جاتىر. تۇرعىن ۇيلەر كەشەنىنەن تۇراتىن جاڭا شاعىن اۋداندار دا بوي كوتەرۋدە. قۇرىلىستىڭ كولەمىنە قاراماستان قۇزىرلى مەملەكەتتىك مەكەمەلەر ءتيىستى زاڭنامالار مەن نورماتيۆتىك تالاپتاردىڭ بۇزىلماۋىن قاتاڭ باقىلاۋدا ۇستايدى، دەپ جازادى Qamshy.kz اقپارات اگەنتتىگى. 

قۇرىلىس جۇرگىزۋدىڭ زاڭدىلىقتارىن ەسكەرمەگەندەرگە وبلىس اكىمدىگى مەملەكەتتىك ساۋلەت-قۇرىلىس باسقارماسىمەن تەكسەرۋ جۇمىستارى جۇرگىزىلىپ، ءتيىستى شارالار قولدانىلادى.

–جىل باسىنان بەرى قۇرىلىس سالاسىنداعى بەكىتىلگەن زاڭنامالار مەن نورماتيۆتەردىڭ تالاپتارىن زاڭعا ساي ورىنداماعانى ءۇشىن 171 جاۋاپتى تۇلعا اكىمشىلىك جاۋاپكەرشىلىككە تارتىلدى. ولارعا 19 ميلليون 14 مىڭ 516 تەڭگە كولەمىندە ايىپپۇل سالىنادى. قۇرىلىس زاڭدىلىقتارىنا نەگىزىنەن تاپسىرىس بەرۋشىلەر كوپ كوز جۇما قارايدى. ماسەلەن جىل باسىنان بەرى تاپسىرىستى ورىنداۋشىعا ءوزى قويعان تالاپتىڭ ۇدەسىنەن شىعۋدى مىندەتتەمەگەن 117 تاپسىرىس بەرۋشى مەكەمە جاۋاپكەرشىلىك تارتىلىپ، ولار بۇل ارەكەتتەرى ءۇشىن 11 ميلليون 231 مىڭ 204 تەڭگە كولەمىندە ايىپپۇل تولەۋگە ءماجبۇر بولدى، –دەيدى وبلىس اكىمدىگى مەملەكەتتىك ساۋلەت-قۇرىلىس باسقارماسىنىڭ باسشىسى قانات ايتقۇلوۆ.

سونداي-اق بيىل باسقارما ماماندارى تاراز قالاسىمەن بايزاق اۋدانىنداعى سارىكەمەر اۋىلىندا زاڭسىز قۇرىلىس جۇمىستارىنىڭ جۇرگىزىلگەنىن انىقتادى. ناتيجەسىندە نىسان يەلەرىنە 37 875 تەڭگە –75 750 تەڭگە ارالىعىندا ايىپپۇل سالىندى.

جالپى باسقارما ماماندارى وڭىردە جۇرگىزىلىپ جاتقان قۇرىلىس ساپاسىن زەردەلەۋ ونىڭ ءتيىستى زاڭدىلىقتار اياسىندا اتقارىلۋىن زەردەلەۋ ماقساتىندا جوسپارلى تەكسەرۋلەرگە شىعىپ تۇرادى. وتكەن جىلى ماماندار قۇرىلىس نىساندارىنا 150 جوسپارلى، 106 جوسپاردان تىس تەكسەرۋ جۇرگىزسە جىل باسىنان بەرى 87 جوسپارلى، 76 جوسپاردان تىس تەكسەرۋ بولعان. مۇنان بولەك وبلىس اۋماعىندا زاڭسىز، نەگىزسىز، قۇجات قۇرىلىس جۇمىستارىنىڭ الدىن الۋ، مۇمكىندىگىنشە بولدىرماۋ ماقساتىندا ارنايى ءىس-شارالار جوسپارى دا بەكىتىلگەن. وبلىس اكىمىنىڭ سالالىق ورىنباسارىنىڭ قولىمەن بەكىتىلگەن بۇل جوسپاردا ءتيىستى زاڭ تالاپتارىنا كوز جۇما قاراعاندارعا قارسى كۇرەستە تاراز قالاسى مەن اۋدان اكىمدەرىنىڭ جاۋاپكەرشىلىكتەرىنە قاراۋ جايى ءسوز بولادى.