2022 جىلدىڭ قىركۇيەگىنەن باستاپ جامبىل وبلىسىندا كارتوپ ءفريى وندىرىلە باستايدى. وڭىردە قولعا الىنعان بىرەگەي الىپ جوبا اياسىندا «تاراز حيميالىق پاركى» ەركىن ەكونوميكالىق ايماعىندا كەلەر جىلدىڭ باسىندا ءدال وسى ءونىم ءتۇرىن وندىرەتىن زاۋىتتىڭ قۇرىلىسى باستالادى، دەپ جازادى Qamshy.kz اقپارات اگەنتتىگى. 

بۇل جوبانى گوللانديالىق Farm Frites كومپانياسى قولعا الۋعا نيەت تانىتىپ وتىر. جىلدام دايىندالاتىن تاماق ونەركاسىبىندە جوعارى سۇرانىسقا يە كارتوپ ءفريىن وندىرەتىن بۇل كومپانيا ءدال وسى سالاداعى الەمدەگى ەڭ ۇزدىك 5 كومپانيانىڭ ءبىرى سانالادى. وسىدان جارتى عاسىر بۇرىن گوللانديا جەرىندە العاشقى ءونىمىن شىعارعان كاسىپورىن ءقازىر تاماق ونەركاسىبىندەگى جاھاندىق جەلىنى قۇرايتىن الپاۋىتتارى «McDonalds» مەن «KFس»ء-دى نەگىزگى شيكىزاتپەن قامتاماسىز ەتۋشى بولىپ تابىلادى.

–ءبىزدىڭ كومپانيا تاۋەلسىز مەملەكەتتەر دوستاستىعى ەلدەرىنىڭ كەڭىستىگىنە 9 جىل بۇرىن كىردى. بىرەر جىل بۇرىن رەسەي جەرىندە جۇمىس جاساپ كوردىك. ال 2015 جىلى بىزگە قازاقستان رەسپۋبليكاسىنىڭ اۋىل شارۋاشىلىعى مينيسترىمەن كەزدەسۋدىڭ ءساتى ءتۇستى. ەكى جاقتى كەلىسىمگە ساي ءبىز كارتوپ ءفريى ءۇشىن قاجەتتى كارتوپ سۇرىپىن قازاقستاننىڭ سولتۇستىك، وڭتۇستىك ايماقتارىنا ەگىپ، سىناما الدىق. ونىڭ ىشىندە سىنامالى القاپ جامبىل وبلىسىنا دا ەگىلدى. ناتيجەسى جامان ەمەس. ءتىپتى جوعارى ونىمدىلىك كورسەتتى. كەيىننەن ينۆەستور رەتىندە بىزگە «تاراز حيميالىق پاركى» ەركىن ەكونوميكالىق ايماعىندا جۇمىس جاساۋ ۇسىنىلدى. ءبىز بۇل ۇسىنىسقا قۋانا كەلىسىم بەردىك. جەرگىلىكتى بيلىك تە ءبىزدىڭ جوبامىزعا قىزىعۋشىلىق تانىتىپ، ونى جۇزەگە اسىرۋدا قولداۋ ءبىلدىرىپ وتىر. قازىرگى جوسپار بويىنشا بىزگە زاۋىتتى تولىق جۇمىس قۋاتىمەن ىسكە قوسۋ ءۇشىن 10 مىڭ گەكتار كارتوپ القابى قاجەت. شيكىزاتتىڭ وسى كولەمىمەن ءبىزدىڭ كومپانيا جىلىنا 70 مىڭ توننا دايىن ءونىم شىعارا الادى، –دەيدى Farm Frites كومپانياسىنىڭ جوبالىق ديرەكتورى يوس دەن بۋر.

وبلىس اۋماعىندا بۇل بىرەگەي جوبانى جۇزەگە اسىرۋدىڭ بارلىق مۇمكىندىك بار. ءارى جەرگىلىكتى بيلىك Farm Frites كومپانياسىنىڭ ينۆەستيسيالىق تيىمدىلىگىنەن بۇرىن اۋىل شارۋاشىلىعىن دامىتۋداعى مۇمكىندىگىن جوعارى باعالايدى. ويتكەنى بيىلدىڭ وزىندە وبلىستا 10 مىڭ گەكتار القاپقا كارتوپ ەگىلگەن. ال ءوڭىر شارۋالارى سۇرانىسقا ساي كارتوپ القابىن ۇلعايتۋعا نيەتتى. سونداي-اق وبلىستىق اكىمدىك بۇل زاۋىتقا قاجەتتى مامانداردى ولاردىڭ سۇرانىسىنا ساي مەملەكەتتىك ءبلىم بەرۋ تاپسىرىسى ارقىلى دايىنداۋ مۇمكىندىگىن دە قاراستىرىپ جاتىر.

ال Farm Frites كومپانياسىنىڭ جوبالىق ديرەكتورى يوس دەن بۋر جوبا ءساتتى ىسكە اسىرىلعان جاعداي زاۋىتتىڭ تەك كارتوپ ءفريىن عانا وندىرمەي، جوعارى سۇرىپتى كارتوپ تۇقىم شارۋاشىلىعىنىڭ تاجىريبەلىك الاڭىنا اينالاتىنىن جەتكىزدى.