قۇرىلىس – ەكونوميكاداعى نەگىزگى سەكتورلاردىڭ ءبىرى. بەلگىلەنگەن مەرزىمدە، بەكىتىلگەن تالاپقا ساي تابىستى اياقتالعان قۇرىلىس قاي تۇرعىدان بولسىن حالىقتىڭ كوڭىلىنەن شىعىپ، ولاردىڭ مەملەكەتتەگى ساياسي جۇيەگە دەگەن سەنىمىن نىعايتا تۇسەدى. كەرىسىنشە باسىنان داۋى ارىلماي، ۇزاق ۋاقىت سوزىلعان قۇرىلىس نىساندارى سەنىمسىزدىك تۋىنداتا باستايدى. وسى ورايدا جامبىل وبلىسىندا زاڭسىز، نەگىزگى قۇجاتتارسىز، ساپاسىز قۇرىلىستىڭ جولىن كەسۋ باعىتىندا ناتيجەلى جۇمىستار قولعا الىندى. بۇل جۇمىستار وبلىس اكىمدىگىنىڭ مەملەكەتتىك ساۋلەت-قۇرىلىس باقىلاۋ باسقارماسىمەن ازىرلەنگەن ءىس-شارالار جوسپارىنا ساي جۇرگىزىلىپ كەلەدى، دەپ جازادى Qamshy.kz اقپارات اگەنتتىگى. 

اتالعان ءىس-شارالار جوسپارى 3 نەگىزگى ماسەلەنى قامتيدى. ياعني باسقارما ماماندارى ەڭ اۋەلى قۇرىلىس جۇرەتىن جەرگە قۇقىقتى يەلەنبەي قۇرىلىس جۇرگىزۋ فاكتىسىن انىقتاپ، ولارعا قارسى شارا قولدانۋدى قۇپ كورىپ وتىر. ەسەپتى كەزەڭدە تاراز قالاسى مەن بايزاق اۋدانىندا مۇنداي 3 ءىس تىركەلىپ، نىسان يەلەرىنە قۇرىلىستى جۇرگىزۋ قاعيداتتارىنا كوز جۇما قاراعانى ءۇشىن 166 650 تەڭگە ايىپپۇل سالىندى. سونىمەن بىرگە نەگىزگى قۇجاتتارسىز قۇرىلىس جۇرگىزۋشىلەردىڭ ءىسى دە باستى نازاردا. قۇرىلىستى باستاردا ونىڭ جوبالىق-سمەتالىق قۇنى، ساراپتاماسى، كەلىسىمدەرى، حابارلامالارى سىندى قۇجاتتارىن قۇنتتاماعانداردى جاۋاپكەرشىلىككە تارتىلۋ كوزدەلگەن. ەسەپتى كەزەڭدە الگىندەي ارەكەت بويىنشا 86 ءىس قارالىپ، قۇرىلىستى جۇرگىزۋشىلەرگە 8 ميلليون 745 مىڭ 341 تەڭگە كولەمىندە ايىپپۇل سالىندى. مەملەكەتتىك ساۋلەت-قۇرىلىس باقىلاۋ باسقارماسىمەن ازىرلەنگەن ءىس-شارالار جوسپارى ساپاسىز قۇرىلىستى بولدىرماۋ، الدىن الۋ، شارالار قولدانۋدى قۇپ كورەدى. مۇنداي جاعدايدا قۇرىلىستىڭ ساپاسىز جۇرگىزىلگەنىن اڭداعان تاپسىرىس بەرۋشىلەر مەن اۋدان، تاراز قالاسىنىڭ اكىمدىكتەرى ءتيىستى ماتەريالداردى مەملەكەتتىك ساۋلەت قۇرىلىس باقىلاۋ باسقارماسىنا ۇسىنادى. ەسەپتى كەزەڭدى وسىنداي ماتەريال بويىنشا باسقارما ماماندارى 58 زاڭ بۇزۋشىلىقتى انىقتادى. سايكەسىنشە ءتيىستى زاڭناماعا ءاتۇستى قاراعان قۇرىلىس كومپانيالارى مەن تاپسىرىس بەرۋشىلەردەن 7 ميلليون 562 مىڭ 875 تەڭگە ايىپپۇل ءوندىرىلدى.

جالپى جىل باسىنان بەرى قۇرىلىستى جۇرگىزۋ قاعيداتتارىن ەسكەرمەگەندەرگە 16 ميلليون 474 مىڭ 866 تەڭگە ايىپپۇل سالىنعان. وتكەن جىلى بۇل كورسەتكىش 12 ميلليون 177 مىڭ 717 تەڭگەنى قۇراعان.