تاراز قالاسىندا وسىمەن ەكىنشى جىل قاتارىنان «ASPARA FASHION WEEK» ءسان اپتالىعى ۇيىمداستىرىلۋدا. بۇل شاراعا قازاقستاننىڭ ءسان الەمىنىڭ ساڭلاقتارى مەن بىرگە ءسان يندۋسترياسىنىڭ بەلگىلى تۇلعالارىنىڭ جۇمىستارى كوپشىلىك نازارىنا ۇسىنىلدى، دەپ جازادى Qamshy.kz اقپارات اگەنتتىگى. 

تاراز قالاسىنان شىققان بەلگىلى سانگەر «اسىل-ديزاين» ءسان ءۇيى مەن «اسپارا» مودەلدىك ونەر جانە بيزنەس كوللەدجىنىڭ نەگىزىن قالاۋشى ايدارحان قالييەۆ ۇيىمداستىرعان بۇل شارادا ەۋروپا مەن ازيا ەلدەرىنەن شىققان 20-عا جۋىق ديزاينەردىڭ تۋىندىلارى ۇسىنىلدى. ءسان اپتالىعى سانگەر ايدارحان قالييەۆتىڭ «اسپارا» برەندىنىڭ قالىپتاسقانىنا 20 جىلدىعى قارساڭىندا وتكىزىلىپ وتىر. بۇل جولعى ءسان اپتالىعىنا ەۋروپالىق مامانداردىڭ جوعارى دايىندىقپەن كەلگەنى كورىنىپ تۇردى. ءارى ولار قازاقتىڭ ۇلتتىق مادەنيەتىمەن بىتە قايناسقان قازاقستاندىق سانگەرلەردىڭ جۇمىسىنا قىزىعۋشىلىق تانىتىپ، ولاردى ءوز ەلدەرىندە وتەتىن شارالاردىڭ بەلسەندى قوناعى بولۋعا شاقىرىپ تا جاتتى. شارانى تاماشالاۋشىلار دا وتاندىق ءسان يندۋسترياسى وكىلدەرىنىڭ تىڭ تۋىندىلارىنىڭ كوڭىلدەرىنەن شىققانىن تىلگە تيەك ەتتى.

ال وتكەن جىلى تۇڭعىش رەت الەمدىك ءسان يندۋسترياسىنا اتى بەلگىلى سانگەرلەردىڭ باسىن قوسقان بۇل شاراعا 19 مەملەكەتتىڭ بىلىكتى ديزاينەرلەرى قاتىسقان بولاتىن. ولاردىڭ اراسىندا يتاليا مەن ءۇندىستانن، گوللانديا مەن جۇڭگو، فرانسيا سىندى بۇل سالاداعى وزىندىك قولتاڭباسى بار مەملەكەتتەردىڭ وكىلدەرى بولۋى شارانىڭ قانشالىقتى سالماقتى ەكەنىن ايعاقتاي تۇسكەن. وبلىس اكىمدىگىنىڭ تۋريزم باسقارماسى سول شارانىڭ اياسىندا وڭىرگە 3 مىڭعا تاياۋ تۋريست كەلگەنىن مالىمدەدى. شارا قاتىسۋشىلارىنىڭ اراسىندا «گەرمانيا ءسان اپتالىعىنىڭ» پرەزيدەنتى كاتارزينا ستيەۆانوۆ، «سەربيا ءسان اپتالىعىنىڭ» پرەزيدەنتى سۆەتلانا حورۆات، امەريكاندىق «FNL Network» تەلەارناسىنىڭ ديرەكتورى روككو لەو جاگليوتي، «ميلان ءسان اپتالىعىنىڭ» پرەزيدەنتى مارياننا ميشەلي، «بولگاريا ارۋى» بايقاۋىنىڭ جەڭىمپازى ۆەرونيكا ستيەۆانوۆا سىندى تۇلعالاردىڭ بولۋى بۇل شاراعا سانگە قىزىعۋشى كوپشىلىكتىڭ نازارىن اۋدارتتى.

ايتا كەتۋ كەرەك جەرگىلىكتى سازگەر ايدارحان قالييەۆتىڭ الەمگە تانىمال تۋىندىلارىنىڭ كوبىندە «اڭ ءستيلىنىڭ» ۇلگىسى بايقالادى. بۇل تۇڭعىش پرەزيدەنت-ەلباسى نۇرسۇلتان نازاربايەۆتىڭ «ۇلى دالانىڭ جەتى قىرى» ماقالاسىندا ايتىلعانداي بۇل ءستيلدىڭ بۇگىندە ونەر تۋىندىلارىندا كوپتەپ قولدانىلىپ جۇرگەندىگىن ايقىندايدى.