ءۇندىستان ۇلتتىق كادەت كورپۋسىنىڭ دەلەگاسياسى ارنايىس ساپارىمەن تاراز قالاسىنا كەلدى. الىستان ات ارىتىپ كەلگەن مەيماندارمەن م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ رەكتورى ماحمەتعالي سارىبەكوۆ كەزدەستى.

ەكى ەل اراسىندا 2015-جىلى قابىلدانعان مەموراندۋم اياسىندا كەلگەن ءبىر وفيسەر مەن ون ەكى كادەت، م.ح.دۋلاتي اتىنداعى تاراز مەملەكەتتىك ۋنيۆەرسيتەتى قابىلداعان ءۇشىنشى دەلەگاسيا بولىپ سانالادى.

– مەموراندۋم اياسىندا كوپ جۇمىس اتقارىلىپ تۇرعانىنا جانە ناقتى ناتيجەلەردىڭ بار ەكەنىنە قۋانىشتىمىن. ءتورت جىل بويى ەكى وقۋ ورىندارىنا پايدالى ءتۇرلى قىزىقتى ءىس-شارالار وتكىزىلىپ كەلەدى. ءبىزدىڭ كۋرسانتتار ءۇندىستان ۇلتتىق كادەت كورپۋسىنىڭ جۇمىسىمەن تانىسسا، ءۇندى كادەتتەرى ءبىزدىڭ ۋنيۆەرسيتەتىمىزدىڭ جۇمىسىمەن تانىسۋعا مۇمكىندىك الدى، - دەدى ماحمەتعالي نۇرعالي ۇلى.

سونداي-اق، ۋنيۆەرسيتەت باسشىسى وتكەن جىلدىڭ باسىندا ءۇندىستاننىڭ دجاممۋ جانە كاشمير قالاسىندا دۋلاتي بابامىزدىڭ جەرلەنگەن جەرىنە بارىپ كەلگەنىن ايتىپ، بۇل ساپاردى ەكى ۋنيۆەرسيتەتتى بايلانىستىراتىن دوستىق كوپىرى رەتىندە باعالادى.

ءۇندىستاننىڭ قازاقستانداعى ەلشىلىگىنىڭ اسكەري اتتاشەسى، پولكوۆنيك ميلان ۆيناياك نالاۆادە دە ەكى ەلدىڭ دوستىعىن نىعايتۋدا م.ح.دۋلاتيدىڭ ءرولىن اتاپ ءوتتى:

– م.ح.دۋلاتي قوعام قايراتكەرى جانە عالىم عانا ەمەس، ءۇندىستان يمپەراتورى تاعايىنداۋىمەن كاشمير اكىمى دە بولعان. سوندىقتان ءبىزدىڭ تاريحي بايلانىسىمىز ۇزاققا سوزىلعان. ءۇندىستان ەلشىلىگى بۇل ۋنيۆەرسيتەتتى ەلىمىزدىڭ قازاقستانداعى كىشىگىرىم بولشەگى دەپ سانايدى. وسى ءۇشىن ۋنيۆەرسيتەت رەكتورى مەن اسكەري كافەدرانىڭ باسشىلىعىنا العىسىمىز شەكسىز،– دەدى ميلان ۆيناياك.

دەلەگاسيا باسشىسى، اۆياسيا پودپولكوۆنيگى دجاياندان كانداسامي قوناقجايلىلىق ءۇشىن راحمەتىن ايتىپ، وسىنداي قارىم-قاتىناستىڭ ماڭىزدىلىعىن اتاپ ءوتتى. «بۇل اكادەميالىق بايلانىس باعدارلاماسىنىڭ ماڭىزدىلىعى وتە زور. وسىنداي كەزدەسۋلەر ارقاسىندا قازاقستان مەن ءۇندىستاننىڭ بولاشاق باسشىلارى تانىسىپ، ارالاسىپ، دوستاسىپ، كەلەشەكتە ەكى ەلدىڭ جاقسى قارىم-قاتىناستا بولۋىنا ءوز ۇلەسىن قوساتىنىنا سەنىمدىمىن»، - دەدى ول.

كەزدەسۋدەن كەيىن ءۇندىستان دەلەگاسياسى ءۇشىن ۋنيۆەرسيتەت كەشەندەرى مەن مۇراجايدا ەكسكۋرسيا ۇيىمداستىرىلدى. تۇستەن كەيىن قوناقتار اسكەري كافەدرا كورپۋسىندا ءبىزدىڭ ستۋدەنتتەردىڭ اسكەري-تەحنيكالىق دايىندىق دەڭگەيىن تاماشالادى. كەلەسى كۇندەرى شەتەلدىك قوناقتار قالانىڭ كورنەكتى جەرلەرىن ارالاپ، ارحەولوگيالىق قازبا جۇمىستارى ورىندارىمەن تانىسىپ، «اقىرتاس» قالاشىعىن تاماشالايدى.