م.ح. دۋلاتي اتىنداعى تاراز مەملەكەتتىك ۋنيۆەرسيتەتىنىڭ م.ف.ۇركىمبايەۆ اتىنداعى جاستار سارايىندا قوعامدا سىبايلاس جەمقورلىققا قارسى مادەنيەتتى قالىپتاستىرۋ ماقساتىندا ۋنيۆەرسيتەت ستۋدەنتتەرىنە ارنالعان «ادالدىق ساعاتى» وتكىزىلدى. كەزدەسۋگە ق ر سىبايلاس جەمقورلىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنت باسشىسىنىڭ ءبىرىنشى ورىنباسارى راۆيل تولەبايەۆ،«Sanaly urpaq» ءفرونت-وفيسىنىڭ ۇيلەستىرۋشىسى اسقار قادىرقۇلوۆ، كلۋب مۇشەلەرى مەن ۋنيۆەرسيتەت ستۋدەنتتەرى قاتىستى.

– ءبىز سىبايلاس جەمقورلىققا قارسى اگەنتتىك بولعاندىقتان ءبىزدى كوبىسى مىندەتتى تۇردە قىلمىستىق قۋدالاۋ پروسەسستەرىنە كوپ كوڭىل اۋدارادى دەپ ويلايدى. ولاي ەمەس. ءبىز جۇمىس باعىتىن وزگەرتتىك. كوبىنە قوعامدا پاراساتتىلىق پرينسيپتەرىن دارىپتەۋگە باعىتتالعان ءىس-شارالاردى وتكىزۋدەمىز. وسىنداي ءىس-شارالاردىڭ ءبىر كورىنىسى – رەسپۋبليكالىق دەڭگەيدە وتەتىن «ادالدىق ساعاتى». ءبىزدىڭ ماقساتىمىز - سىزدەردىڭ ويلارىڭىزعا كىشكەنتاي بولسا دا وي سالۋ. سونىمەن قاتار، وسىنداي كەزدەسۋلەر ارقىلى سىزدەردىڭ دە ويلارىڭىزدى ءبىلۋ، – دەدى راۆيل قۋانىشباي ۇلى.

دەپارتامەنت باسشىسىنىڭ ءبىرىنشى ورىنباسارى قوعامىمىزدا ادالدىق پەن پاراساتتىلىق پرينسيپتەرىن ۇستاناتىن ازاماتتار قاتارىن كوبەيتۋ دەپارتامەنت الدىندا تۇرعان ەڭ ۇلكەن ماقسات ەكەنىن ايتتى.

سونىمەن قاتار، راۆيل تولەبايەۆ باسقا دا ءىس-شارالاردىڭ وتكىزىلىپ جاتقانى تۋرالى مالىمدەدى. مىسالى، جامبىل وبلىسىنىڭ ءبىلىم باسقارماسىمەن بىرگە «پاراساتتى وتباسى» جارىسىنىڭ وتكىزىلەتىنى تۋرالى حابارلاپ، جارىستا «ونەرلى وتباسى»، «وندىرىستەگى وتباسى» سياقتى ون نوميناسيلاردىڭ دا تاعايىندالاتىنى تۋرالى ايتتى. كەيىن وسى وتباسىلار تەلەديدار مەن بۇقارالىق اقپارات قۇرالدارى ارقىلى كورسەتىلىپ، دارىپتەلەتىن بولادى. جارىس جەڭىمپازدارىنا دايىندالعان قوماقتى سىيلىق تا بار.

وعان قوسا، ۋنيۆەرسيتەت پەن كوللەدج ستۋدەنتتەرى اراسىندا پاراساتتىلىق تاقىرىبىندا پىكىرتالاس سايىسى وتكىزىلەتىن بولادى. ءبىلىم باسقارماسى باستاۋىمەن وتكىزىلەتىن سايىس جەڭىمپازدارى پاراساتتىلىق ەلشىلەرى اتانىپ، ءتۇرلى مەكەمەلەردە وزدەرىنىڭ ۇستانىمدارىن دارىپتەيتىن بولادى. جاقىندا مەكتەپ جاسىنداعى وقۋشىلار اراسىندا پاراساتتىلىق تاقىرىبىندا ەسسە جازۋ كونكۋرسى وتكىزىلدى. ونىڭ قورىتىندىسىمەن جيىرما توعىز وقۋشى ۇزدىك بولىپ اتاندى. ولاردى دا رەسپۋبليكالىق دەڭگەيدە پاراساتتىلىق ەلشىسى رەتىندە قوعامدىق جۇمىسقا تارتۋ جوسپارلانۋدا.

بىلتىر دەپارتامەنت رەسپۋبليكالىق دەڭگەيدە جوعارى وقۋ ورىندارىندا «سانالى ۇرپاق» كلۋبىن اشقان بولاتىن. كلۋب جەتەكشىسى ۋنيۆەرسيتەت بەلسەندىلەرىن تاڭداپ، كلۋب قاراماعىندا شوعىرلاندىرىپ، ادام بويىنداعى جاقسى مىنەز-قۇلىق قالىپتاستىرۋ ءۇشىن، جاقسى قاسيەتتەردى شىعارۋ ءۇشىن جاعداي جاساماقشى. بۇل ۇيىم دەپارتامەن قىزمەتكەرلەرى مەن ستۋدەنتتەر اراسىندا تىعىز بايلانىس قۇرۋعا مۇمكىندىك بەرىپ، بەيرەسمي قارىم-قاتىناسقا جول اشادى. كەزدەسۋ بارىسىندا راۆيل تولەبايەۆ ستۋدەنتتەردى «سانالى ۇرپاق» كلۋبى جۇمىسىنا اتسالىسۋعا شاقىردى. «ادالدىق ساعاتى» دەپارتامەن وكىلىنىڭ كلۋب مۇشەلەرى مەن جەتەكشىسىمەن جابىق وتىرىسىندا جالعاسىن تاپتى.