اۋىل مەن قالا مەكتەبى اراسىنداعى الشاقتىقتى جويۋ. قازاقستان رەسپۋبليكاسى پرەزيدەنتى قاسىم جومارت توقايەۆتىڭ قازاقستان حالقىنا ارناعان تۇڭعىش جولداۋىندا ءدال وسى ماسەلە ايرىقشا ءمان بەرىلەدى. ءارى ماسەلەنى شەشۋدە اۋىل مەكتەبىنە بىلىكتى پەداگوگتەردى تارتۋ تاجىريبەسىن قالىپتاستىرۋ جايىندا ايتىلدى. بۇل ورايدا مويىنقۇم اۋدانىندا دا جىل ساناپ مەكتەپتىڭ ماتەريالدىق تەحنيكالىق بازاسى نىعايىپ، ۇستازداردىڭ بىلىكتىلىگى ەسەلەنۋى ناتيجەسىندە ءبىلىم ساپاسى دا ارتا تۇسكەن، دەپ جازادى Qamshy.kz اقپارات اگەنتتىگى. 

اۋدانداعى مەكتەپتەردەگى ءبىلىم ساپاسى جايىندا ايتقاندا ەڭ اۋەلى ولاردىڭ ماتەريالدىق-تەحنيكالىق بازاسىن نىعايا تۇسكەنىنە ايرىقشا نازار اۋدارعان ءجون. ماسەلەن نەگىزىنەن تيپتىك جوبامەن سالىنعان مويىنقۇم اۋدانىنداعى ءبىلىم بەرۋ ورىندارىنا تۇراقتى تۇردە كۇردەلى جانە اعىمداعى جوندەۋ جۇمىستارى جۇرگىزىلىپ تۇرادى.

–وتكەن جىلى ك.قاسىموۆ، ى.التىنساري اتىنداعى ورتا مەكتەپ عيماراتتارى كۇردەلى جوندەۋدەن وتسە، بيىل ءا.مولداعۇلوۆا، اعىباي باتىر، م.جۇمابايەۆ اتىنداعى مەكتەپتەردىڭ قازاندىقتارى سىرتقا شىعارىلدى. ءا.تولەپبەرگەنوۆ، ت.رىسقۇلوۆ، اباي اتىنداعى ورتا مەكتەپتەردىڭ تەرەزەلەرى پلاستيككە اۋىستىرىلدى. م.جۇمابايەۆ اتىنداعى مەكتەپ-ليسەيىنىڭ 2 كورپۋسى كۇردەلى جوندەۋدەن ءوتتى. اباي، ب.مومىش ۇلى، ق.رىسقۇلبەكوۆ، №1 ورتا مەكتەپتەرى عيماراتتارىنىڭ ينجەنەرلىك قۇرىلىمدارى اعىمداعى جوندەۋدەن وتكەنىن دە ايتۋعا بولادى، –دەيدى اۋدان اكىمى مادەن مۇسايەۆ.

اۋدان مەكتەپتەرىنىڭ ماتەريالدىق الەۋەتىمەن بىرگە ونداعى ءبىلىم سالاسى دا جىل ساناپ كوتەرىلىپ كەلەدى.

–بيىل مەكتەپ ءبىتىرۋشى تۇلەكتەردىڭ ۇلتتىق ءبىرىڭعاي تەستىلەۋدەگى ورتاشا باللى 91،5 پايىزدى كورسەتتى. بۇل وتكەن جىلمەن سالىستىرعاندا 4،3 پايىز جوعارى ەكەنىن اتاپ وتكەن ءجون،–دەيدى مادەن توقتارباي ۇلى.

ءبىلىم ساپاسى قاشاندا ءوڭىردىڭ الەۋمەتتىك –ەكونوميكالىق دامۋىنداعى نەگىزگى كورسەتكىشتىڭ ءبىرى بولىپ قالا بەرەدى. ءارى ءبىلىم ساپاسى ارتتىرماي وڭىردەگى وزگە سالالاردا تابىسقا قول جەتكىزۋ مۇمكىن ەمەستىگى دە بەلگىلى جايت. مەكتەپ قابىرعاسىنان باستالعان سانالى تاربيە، ساپالى ءبىلىم بەرۋ ءىسى كۇنى ەرتەڭ تۇتاس قوعامنىڭ دامۋىنىڭ العىشارتى ەكەنىن ەسكەرسەك بۇل ماسەلەگە ءاتۇستى قاراۋعا بولمايدى. اسىرەسە اۋىل مەكتەپتەرىنىڭ ماتەريالدىق-تەحنيكالىق بازاسىن جەتىلدىرۋ، ولاردى بىلىكتى ماماندارمەن قامتۋ ءىسى باستى نازاردا. پرەزيدەنت پارمەن بەرگەن بۇل باعىتتا سوندا عانا ناتيجەگە جەتىپ، اۋىل مەن قالا مەكتەپتەرى اراسىنداعى ايىرماشىلىقتى جويۋعا قول جەتكىزىلمەك.