ەلباسى نۇرسۇلتان نازاربايەۆتىڭ وتكەن جىلى جاريالاعان «ۇلى دالانىڭ جەتى قىرى» ماقالاسىندا «ارحيۆ 2025» مەملەكەتتىك باعدارلاماسىن قابىلداۋ ارقىلى مۇراعات قورىنداعى ماتەريالداردى سيفرلى فورماتقا كوشىرۋ جايى ايتىلعان-دs. وسى ورايدا جامبىل وبلىسىنداعى ارحيۆتىك مالىمەتتەردىڭ 13،8 پايىزى ەلەكتروندى فورماتقا اۋىستى، دەپ جازادى Qamshy.kz اقپارات اگەنتتىگى. 

بۇگىندە جامبىل وبلىسىنداعى ارحيۆتەرىنىڭ ساقتاۋىندا 925 198 ساقتاۋ بىرلىگى بار. ارحيۆتەرگە جىل سايىن مەكەمەلەردەن شامامەن 10-12 مىڭ قۇجات ساقتاۋعا قابىلدانادى. 2013 جىلدان باستاپ قازىرگى تاڭعا دەيىن 126 438 ساقتاۋ بىرلىكتەگى 12 085 039 پاراق قۇجات سكانەردەن وتكىزىلدى. بۇل ارحيۆ قورلارىنداعى جالپى مالىمەتتىڭ 13،8 پايىزىن قۇرايدى. وبلىستا ارحيۆتىك قۇجاتتاردى سيفرلاندىرۋعا كوشىرۋ ماقساتىندا جىل سايىن 16-18 مىڭداي قۇجات سكانەردەن وتكىزىلەدى.

سيفرلى فورماتقا الدىمەن تۇراقتى ساقتاۋ جاتاتىن ارحيۆتىك انىقتامالار ءۇشىن كوپ سۇراناتىن قۇجاتتار، شارۋاشىلىق كىتاپتار، تاريحي ماڭىزعا يە قۇجاتتار كوشىرىلەدى.

– وبلىستىق ارحيۆكە ەسكى قۇجاتتاردى وتكىزۋگە ارنالعان ارنايى پلانەتارلىق سكانەر الىندى. ازىرگە تەك وبلىستىق ارحيۆكە عانا الىنعان بۇل قۇرىلعىنىڭ ءبىر داناسى 14 ميلليون 900 مىڭ تەڭگە تۇرادى. وسى قۇرىلعىنى الۋ ەسەبىنەن قۇجاتتاردى سكانەرلەۋ كورسەتكىشى 25 پايىزعا ءوستى. بۇعان دەيىن ەسكى قۇجاتتاردى ەلەكتروندى فورماتقا كوشىرۋ جۇمىستارى ءسال باياۋلاپ قالعان ەدى. ويتكەنى جىلدامدىعى تومەن سكانەرلەر كۇنىنە شامامەن 450-500 پاراق، ايىنا 10 000 پاراق قۇجات وتكىزۋگە قانا قاۋقارلى بولاتىن. ال بۇل ىسكە جىلدامدىعى جوعارى سكانەردى تارتۋعا ەسكى قۇجاتتاردىڭ جىرتىلۋى، مىجىلۋى ءقاۋپى كەدەرگى كەلتىرىپ وتىردى، –دەيدى وبلىس اكىمدىگى مادەنيەت، قۇجاتتاما جانە ارحيۆتەر باسقارماسىنىڭ باسشىسى دۇيسەنالى بىقىبايەۆ.

سونداي-اق، ارحيۆتەردىڭ ماتەريالدىق-تەحنيكالىق بازاسىن نىعايتۋ ءۇشىن سارىسۋ اۋدانىنىڭ مەملەكەتتىك ارحيۆىنە 12 ميلليون تەڭگەگە 16 دانا جىلجىمالى سورەلەر ساتىپ الىندى. سونىڭ ەسەبىنەن ارحيۆتەگى قويمانىڭ تولۋ دارەجەسى 40 پايىزعا كەمىدى. ءقازىر مۇنداي قۇرىلعىنى بايزاق، قورداي، تالاس، شۋ اۋداندىق ارحيۆتەرى قاجەتسىنەدى.

ءوز كەزەگىندە ارحيۆ مالىمەتتەرىن سيفرلى فورماتقا كوشىرۋ بۇل سالادا قاراپايىم حالىق ءۇشىن كورسەتىلەتىن قىزمەتتى وڭتايلاندىرۋ ءۇشىن جاسالىپ وتىر.