تاراز قالاسىنداعى تۇرعىن ءۇي كەزەگىندە تۇرعان ءبىرقاتار از قامتىلعان جانە كوپ بالالى وتباسىلار ءۇشىن جىل سوڭىندا باسپانا ماسەلەسى تۇبەگەيلى شەشىلمەك. ءقازىر وبلىس ورتالىعىنداعى №5 «قاراسۋ» ىقشاماۋدانىندا الەۋمەتتىك جاتاقحانا قۇرىلىسى قارقىندى جۇرگىزىلىپ جاتىر، دەپ جازادى Qamshy.kz اقپارات اگەنتتىگى. 

الەۋمەتتىك 4 جاتاقحانانىڭ بولمەسى وبلىس ورتالىعىندا تۇرعىن ءۇي كەزەگىندە تۇرعان از قامتىلعان جانە كوپ بالالالى وتباسىلارعا بەرىلمەك. نىسان پايدالانۋعا بەرىلگەندە مۇندا اتالعان ساناتقا جاتاتىن 180 تارازدىق وتباسى پانالايتىن بولادى. جالپى كولەمى 8100 شارشى مەتردى قۇرايتىن جاتاقحانالار تۇتاس ەكى بولمەلى پاتەرلەردەن تۇرادى. مۇنداعى ءار پاتەردەگى كولەمى 52-54 شارشى مەتر شاماسىندا. اتى جاتاقحانا دەمەسەڭىز مۇنداعى ءاربىر پاتەردىڭ جەكە اس ءۇيى،اجەتحاناسى جانە جۋىناتىن بولمەسى بولادى.

–ءبىزدىڭ سەرىكتەستىك قۇرىلىس جۇمىستارىن تامىز ايىندا باستادى. قازىرگى تاڭدا بۇل نىسانعا 500-گە جۋىق جۇمىسشىسى جۇمىلدى. جاتاقحانانى جەلتوقساندى پايدالانۋعا بەرۋ جوسپارلانعان. سوندىقتان قۇرىلىس جۇمىستارىنا قوسىمشا كۇش تارتىلادى. نىساندى تاپسىرىس بەرۋشىگە مەجەلى مەرزىندە تاپسىرۋعا الەۋەتىمىز تولىعىمەن جەتەدى. ءقازىردىڭ وزىندە ءبىز قۇرىلىس جۇمىستارى بويىنشا بەكىتىلگەن كەستەدەن ءبىر اپتا مەرزىمگە وزىپ كەلە جاتىرمىز. قازىرگى ۋاقىتتا نەگىزگى جۇمىستار تولىعىمەن اياقتالدى. ەندىگى كەزەكتە نىساندى مونتاجداۋ جانە ىشكى ارلەۋ جۇمىستارى قاتار جۇرگىزىلىپ جاتىر، – دەيدى «بينوم» جاۋاپكەرشىلىگى شەكتەۋلى سەرىكتەستىگى باس ديرەكتورىنىڭ ورىنباسارى ءمادي يزەنبايەۆ.

جالپى قۇرىلىسى قاتار جۇرگىزىلىپ جاتقان ءاربىر جاتاقحانادا 45 پاتەردەن بولادى.مۇنداعى ءاربىر جاتاقحانانىڭ جوبالىق-سمەتالىق قۇنى 280 ميلليون 175 مىڭ تەڭگەنى قۇرايدى. مەردىگەر كومپانيا وكىلدەرى قۇرىلىس جۇمىستارىنا نەگىزىنەن سەرىكتەستىكتىڭ ءوز زاۋىتىنان شىعارىلاتىن ونىمدەردىڭ قولدانىلىپ جاتقانىن ايتادى. سونداي-اق مۇندا قۇرىلىس ماتەريالدارىن ءوندىرۋشى وتاندىق كاسىپورىنداردىڭ ونىمدەرى دە پايدالانىلۋدا. ءوز كەزەگىندە بۇل فاكتورلار قۇرىلىسقا جۇمسالاتىن شىعىندى ازايتۋعا مۇمكىندىك بەرەدى.

الەۋمەتتىك جاتاقحانا قۇرىلىسى جايىندا العاش رەت اقپان ايىندا وبلىس اكىمىمەن كوپ بالالى انالاردىڭ كەزدەسۋىندە ايتىلعان-دى. سوندا ءوڭىر باسشىسى كوپ بالالى انالاردى الەۋمەتتىك قولداۋ شارالارىن جۇزەگە اسىرۋدا مۇمكىندىگىنشە ولاردى باسپانامەن قامتۋ تەتىكتەرىنىڭ قاراستىرىلاتىندىعىن جەتكىزگەن. مىنە 8 اي ىشىندە سوزدەن ىسكە كوشكەن جەرگىلىكتى بيلىك جەلتوقسان ايىندا وبلىس ورتالىعىندا كوپ بالالى جانە از قامتىلعان وتباسىلارعا باسپانالى بولۋى باقىتىن سىيلاعالى تۇر.