سوڭعى كەزدەرى جامبىل وبلىسىنا ينۆەستورلاردىڭ ەرەكشە قىزىعۋشىلىعى ويانا باستادى. ءوڭىردىڭ ترانسپورتتىق جانە گەوگرافيالىق الەۋەتى سىندى ينۆەستيسيالىق كليماتقا اسەر ەتەتىن فاكتورلارمەن بىرگە ونىڭ كليماتتىق جاعدايى دا شەتەلدىك ينۆەستورلاردىڭ وڭىرگە كوپتەپ كەلۋىنە تۇرتكى بولىپ وتىر. ويتكەنى وڭىردە تۇركيالىق ينۆەستورلاردىڭ قارجىلاندىرۋىمەن قۋاتتىلىعى 400 مەگاۆات بولاتىن تاعى ءبىر كۇن ەلەكتر ستانسياسى سالىنباقشى، دەپ جازادى Qamshy.kz اقپارات اگەنتتىگى.
بۇل بىرەگەي ينۆەستيسيالىق جوبانى جۇزەگە اسىرۋعا نيەت ەتىپ وتىرعان «گلوبال ستروي» جاۋاپكەرشىلىگى شەكتەۋلى سەرىكتەستىگىنىڭ قۇرىلتايشىسى بۋلگان احمەت ديۋران مەن باس ديرەكتورى ۋيگۋن ەيۋپتىڭ ايتۋىنشا ينۆەستورلاردىڭ تاڭداۋى جامبىل وبلىسىنا تەكتەن-تەك تۇسپەگەن. ويتكەنى ەلىمىزدىڭ وڭتۇستىگىندە ورنالاسقان بۇل ايماققا كۇن ساۋلەسى وتە كوپ تۇسەدى. سونداي-اق كاسىپكەرلەر وڭىردەگى كۇن مەن جەلدىڭ وڭتايلى قوزعالىسى دا ستانسيا جۇمىسىندا باستى فاكتور سانالاتىنىن جاسىرمادى. ءوز كەزەگىندە، كۇن ەلەكتر ستانسياسى كۇن ساۋلەسىنەن ەنەرگيا الۋدا جاڭا تەحنولوگيالاردىڭ مۇمكىندىگىن مولىنان پايدالانۋعا يەك ارتىپ وتىر. بولاشاقتا «گلوبال ستروي» جاۋاپكەرشىلىگى شەكتەۋلى سەرىكتەستىگىنىڭ ينۆەستيسياسى ەسەبىنەن ەلىمىزدە 8 مىڭ مەگاۆاتتىق ستانسيا سالىنباق.
ءوز كەزەگىندە جەرگىلىكتى بيلىك تۇركيالىق ينۆەستورلاردى بارىنشا قولداۋعا ءازىر. ولاردىڭ ءوز جوبالارىن ىسكە اسىرۋىنا قاجەتتتى بارلىق تەتىكتەر قاراستىرىلادى. جالپى جامبىل وڭىرىندە بالامالى ەنەرگيا ءوندىرۋ باعىتىندا مول تاجىريبەسى بار. ماسەلەن جۋالى اۋدانىنداعى «بۋرنوە سولار» كۇن ەلەكتر ستانسياسى 100 مەگاۆاتتىق قۋاتتىلىقپەن جۇمىس جاساۋدا. جۋالى اۋدانىنىڭ نۇرلىكەنت اۋىلى ماڭىنداعى ستانسياعا قاجەتتى ەلەكتر ەنەرگياسىن وندىرۋگە قاجەتتى كۇن پانەلدەرى 74 گەكتار اۋماققا ورنالاستىرىلعان. وتكەن جىلدىڭ سوڭىندا ەكىنشى كەزەڭى ىسكە قوسىلعان ستانسيا 40 مىڭ ءۇيدى ەلەكتر جارىعىمەن قامتاماسىز ەتۋگە قاۋقارلى. سونىمەن قاتار سارىسۋ اۋدانىندا دا جاڭا ەلەكتر ستانسياسىنىڭ قۇرىلىسى قارقىندى جۇرگىزىلۋدە. سايكەسىنشە بۇل جوبالاردىڭ ينۆەستيسيا تارتىپ، جەرگىلىكتى جەردىڭ ەكونوميكالىق الەۋەتىن كوتەرۋدەن بولەك وڭىردەگى وزگە مەملەكەتتىڭ ەلەكتر ەنەرگياسىنا تاۋەلدىلىك ماسەلەسىنىڭ دە شەشىمىن قاراستىرۋىمەن ەرەكشەلەنەدى.
